PE SA e faia se tautoga a e tei ua faigata ona faataunuu? Sa faia faapea e le tamaloa lena, ma o le mafuaaga lena ua ia faanoanoa ai. O ia o se faamasino loto toa o Isaraelu e igoa i a Iefata.

Sa ola Iefata i le taimi na le toe tapuai ai Isaraelu i a Ieova. Ua latou toe faia foi mea e leaga. O lea na faataga ai e Ieova tagata Amoni ia faatigaina i latou. Ona alalaga atu ai lea o Isaraelu i a Ieova: ‘Ua matou agasala iā te oe. Faamolemole, faaola mai i a i matou!’

Ua salamo tagata i mea sese sa latou faia. Ua faaalia lo latou salamo i le toe tapuai atu i a Ieova. Ma o lea sa toe fesoasoani atu foi i ai Ieova.

Ua filifilia e tagata Iefata ia tau faasaga i tagata leaga o Amoni. Sa manaomia tele e Iefata le fesoasoani a Ieova. O lea sa ia tauto ai: ‘Afai e te tuuina mai i a te au le manumalo i luga o tagata Amoni, o le tagata muamua e sau mai i lou fale e faafeiloai mai i a te au pe a ou foi mai ma le manumalo, ou te avatua lea mo oe.’

Sa talia e Ieova le tautoga a Iefata, ma sa ia fesoasoani ai iā te ia ia malo i le taua. Ina ua toe foi mai Iefata i lona fale, ona faafeiloai atu ai lea o ia e lona afafine. E na o le pau lava lena o lana tama itiiti. ‘Aue, o lou afafine! O le faanoanoaga tele ua e aumaia i a te au. Ae ua uma ona ou faia se tautoga i a Ieova, ma ou te le mafai ona toe faafoisia mai.’

Ina ua iloa e le afafine o Iefata lana tautoga, sa faanoanoa o ia muamua. Auā o lona uiga o le a ia tuua lona tama ma ana uo. Ae o le a faaalu e ia lona olaga atoa e auauna atu ai i a Ieova i lona fale fetafai i Sailo. O lea sa ia fai atu ai i lona tamā: ‘Afai ua e faia se tautoga i a Ieova, e tatau ona e tausia.’

Ona alu ai lea o le afafine o Iefata i Sailo, ma sa faaaluina ai e ia lona olaga atoa e auauna atu ai i a Ieova i lona fale fetafai. E fa aso mai tausaga taitasi e o atu ai fafine o Isaraelu e asiasi iā te ia ma latou fiafia faatasi ai. Sa alolofa tagata i le afafine o Iefata auā o ia o se auauna lelei tele a Ieova.