INA ua tutupu faalavelave ia Isaraelu, sa latou alalaga loa i a Ieova. Na tali mai i ai Ieova i lona tuuina mai i ai o ni faamasino e fesoasoani i a i latou. O Iosua o le faamasino muamua, ma o igoa nei o isi faamasino, o Otinielu, Euta ma Samekara. Ae o isi tagata e toalua na fesoasoani i a Isaraelu o ni fafine e igoa i a Tepora ma Iaeli.

O Tepora o se perofeta fafine. Na tuuina atu i ai e Ieova ni faamatalaga e uiga i le lumanai, ma sa ia taʻuina atu i tagata mea uma na fai mai ai Ieova. O Tepora foi o se faamasino. E nofo o ia i lalo o le pama i le atunuu maugā, na te tuuina atu ni fesoasoani mo faafitauli o tagata.

O le taimi lea sa tupu ai Iapino i Kanana. Sa iā te ia ni kariota tau e 900. Sa malosi tele lana autau ua toatele ai tagata Isaraelu na faamalosia ia avea ma auauna a Iapino. O le taʻitaʻi o le autau a Iapino e igoa i a Sesera.

I se tasi aso na aami ai e Tepora ia Parako le faamasino, ma faapea atu: ‘Ua tulei mai Ieova: “Ia e aveina ni tagata se toa 10,000 ma outou o atu i le Mauga o Tapora. O le a ou tuuina atu ai Sesera ma ana autau iā te oe.”

Ua fai atu Parako i a Tepora: ‘O le a ou alu pe afai e te sau ta te ō.’ Na alu Tepora, ae sa ia faapea atu i a Parako: ‘E le mauaina e oe le viiga mo le manumalo, auā o le a tuuina atu e Ieova Sesera i lima o se fafine.’ Ma o le mea lena sa tupu.

Ona alu ifo lea o Parako i le Mauga o Tapora ia fetaiai ma fitafita a Sesera. Na faafuasei lava ona faatupu e Ieova se lolo, ma o le toatele o fitafita a le fili sa malelemo. Ae sa sola ese Sesera.

E lei umi ae taunuu Sesera i le fale ie o Iaeli. Sa ia taliaina o ia ma avatu i ai ni sua susu. Sa faaosoina ai lona fia moe, ma e lei umi lava ae moegase. Ona tutui ai lea e Iaeli le pine o le fale ie i le ulu o lenei tamaloa leaga. Mulimuli ane, ina na sau Parako, sa ia faaali atu loa i ai Sesera ua oti! O lea sa taunuu moni lava upu a Tepora.

Ona oti mulimuli ai lea o le Tupu o Iapino, ma ua toe filemu nei Isaraelu mo sina taimi.