PE E foliga mai ea lena mea o se gata moni o taviʻoviʻo i se pou? E leai. O le gata lena sa fausiaina i apa memea. Na fai atu Ieova i a Mose ia tuu i luga o le pou ia tilotilo i ai tagata ma feola ai. Ae o isi gata o loo i le eleele o gata moni. Sa latou ūina tagata ma ua mamaʻi ai. Pe e te iloa ea ai se ā ?

Talu ai sa tautala faasagatau tagata i le Atua ma Mose. Sa latou faitio faapea: ‘Aiseā ua e aumaia ai i matou ia oti i le vaomatua? E leai ni vai ma ni mea ai i inei. Ma matou te le toe mafai ona aaiina nei manai.’

Ae peitai o le manai o se mea ai lelei. Na tuuina faavavega i ai e Ieova mo i latou faapena foi ma ni vai. Peitai sa le faafetai tagata i le auala na tausia ai e le Atua i latou. O lea na aauina mai ai e Ieova gata oona ia faasala i a Isaraelu. Na ūina latou e gata, ma o le toatele o i latou na feoti ai.

Mulimuli ane, ona o mai lea o tagata i a Mose ma faapea mai: ‘Ua matou agasala, auā ua matou tautatala faasaga i a Ieova ma oe. Ia tatalo nei i a Ieova ma ia aveese nei gata mai i inei.’

O lea na tatalo ai loa Mose mo tagata. Ma sa taʻu atu e Ieova i a Mose ia fai se gata apa memea. Sa ia fai atu e tuu i luga o se pou, ma soo se tasi ua ū e se gata ia tilotilo i le gata apa memea ma toe malosi ai.

E i ai se lesona tatou te aʻoaʻoina mai i lenei mea. O i tatou uma lava, ua ūina e gata e pei o Isaraelu. Ua i ai uma i tatou i se tulaga oti. Sei e vaavaai solo o le a e iloa ai tagata ua matutua, mamaʻi ma oti. Ua mafua lenei mea ona o Atamu ma Eva ma ua la liliu ese mai i a Ieova, ma o i tatou uma lava o a laua fanau. Ae peitai ua faia e Ieova se ala tatou te ola ai e faavavau.

Ua auina mai e Ieova lona atalii, o Iesu Keriso, i le lalolagi. Na tautau Iesu i se laau, talu ai sa toatele tagata na manatu e leaga o ia. Peitai na auina mai e Ieova Iesu e faasaoina i tatou. Afai tatou te vaavaai iā te ia, afai tatou te mulimuli iā te ia, ona maua ai lea e i tatou le ola e faavavau.