O LE tele o aai i Kanana ua nonofo sauni nei e tau ma Isaraelu. Ua manatu e manumalo i latou. Ae peitai o tagata o le aai e latalata ane o Kipeona sa le faapena lo latou manatu. Latou te le mananao e tau ma le Atua auā o loo fesoasoani o ia i a Isaraelu. O lea, o le ā le mea sa faia e tagata Kipeona?

Sa latou faafoliga mai e mamao se mea o latou nonofo ai. O ni isi o tamaloloa ua fai ni ofu masaesae ma seevae malepelepe. Sa teu asini i ni taga masaesae, ma ave ni falaoa ua leva. Ona latou o atu lea i a Iosua ma faapea atu: ‘Ua matou o mai i se nuu mamao lava, talu ai ua matou faalogo i lo outou Atua silisili o Ieova. Sa matou faalogo i mea uma lava na ia faia i a te outou i Aikupito. O lea, sa poloai mai ai lo matou taʻitaʻi e sauni ni mea ai mo le malaga, ma ia fai atu iā te oe: “O matou o a outou auauna. Ia e tauto mai nei o le a outou le sii taua mai i a i matou.” Ua masaesae o matou ofu i le mamao o le malaga ma ua magumagu a matou falaoa.’

Sa talitonu Iosua ma isi taʻitaʻi i tagata Kipeona. O lea sa latou faia se tautoga latou te le tau ma i latou. Peitai na mavae aso e tolu ona latou iloa lea o loo nonofo latalata atu tagata Kipeona.

‘O le ā le mea na outou fai mai ai e mamao le mea na outou o mai ai?’ o le fesili lea a Iosua i a i latou.

Ona tali atu ai lea o tagata Kipeona: ‘Ua ala ona matou faia talu ai sa taʻuina mai i a te i matou ua tauto lo outou Atua o Ieova o le a ia avatua le laueleele o Kanana mo outou. O lea la ua matou fefefe ai neʻi tei ua outou fasiotia i matou.’ Peitai sa tausia pea e Isaraelu la latou folafolaga, ma sa latou le fasiotia tagata Kipeona. Ae sa fai i latou ma a latou auauna.

Ua ita tele le tupu o Ierusalema ona ua osi filemu Kipeona ma Isaraelu. Sa ia faapea atu i tupu e toafa: ‘Ia outou fesoasoani mai i a te au e tau ma Kipeona.’ O le mea lena sa fai e tupu e toalima. Pe sa popoto Kipeona e osia le filemu ma Isaraelu, ua mafua ai nei ona o mai tupu e tau faasaga i a i latou? O le a tatou vaai i ai.