O NEI tamaloloa ua i ai nei i se faalavelave. E tatau ona laua o ese, afai e leai o le a fasiotia i laua. O ni tagata matamata laua mai Isaraelu, ma o Raava lena e fesoasoani atu i ai. E nofo Raava i le fale lena e i le pa o le aai o Ieriko.

Ua sauni nei Isaraelu e sopoia le Vaitafe o le Ioritana ma oo atu ai i Kanana. Peitai sa auina muamua atu e Iosua ni tagata matamata se toalua. Sa ia faapea atu: ‘Ia o e vaavaai le laueleele ma le aai o Ieriko.’

Ina ua oo atu nei tagata matamata i totonu o Ieriko, ona la o atu lea i le fale o Raava. Ina ua faalogo i ai le tupu o Ieriko, ona ia aauina atu lea o ni tagata i a Raava, ma poloai atu iā te ia: ‘Aumai i fafo tagata na e i lou fale!’ Ae ua faalafi e Raava tagata matamata i luga o le fale. Ona ia faapea mai lea: ‘Sa o mai ni tamaloloa i lou fale, ae ou te le iloa po o fea e o mai ai. Sa la tuua i inei ina ua amata ona pogisa, a o lei tapunia le faitotoa o le aai. Afai tou te faanatinati nei, o le a outou maua i laua!’ Ona o atu ai loa lea o tagata ma tuliloa i laua.

Ina ua latou o ese, ona faavave atu lea o Raava i luga o le fale. ‘Ua ou iloa e tuuina atu e Ieova i a te outou lenei laueleele. Sa matou faalogo i le faamatutuina o le Sami Ulaula ma le fasiotia o le tupu o Sekono ma Oko. Ua ou agalelei i a oulua, ia oulua tauto mai, faamolemole, o le a oulua agalelei mai foi i a te au. Ia faaola loʻu tamā ma loʻu tinā, ma ou tuagane ma ou uso.’

Sa taʻutino atu e nei tagata matamata o le a la faia, ae e tatau ona faia e Raava se mea. ‘Ia ave lenei maea mumu ma nonoa i lou faamalama, ma ia faapotopoto uma mai ou aiga i totonu o lou fale faatasi ma oe. Ma pe a matou toe foi uma mai e ave Ieriko, o le a matou iloa ai lenei maea i lou faamalama ma o le a le fasiotia ai se tasi o i lou fale.’ Sa taʻuina atu i a Iosua e nei tagata matamata mea uma na tutupu.