I TOTONU o le Tusi Paia o le a e mauaina ai se tusi e igoa o Ruta. O le tala i se aiga na ola i le vaitaimi o faamasino. O Ruta o se fafine talavou mai Moapi e le o ia o se tagata o le nuu o le Atua o Isaraelu. Ae ina ua faalogo Ruta e uiga i le Atua moni o Ieova, sa oo ina alofa tele i ai o ia. O Naomi o se fafine matua lea sa fesoasoani i a Ruta e aʻoaʻo e uiga i a Ieova.

O Naomi o se fafine Isaraelu. Sa o atu o ia ma lona toalua ma la fanau tama e toalua i Moapi i le vaitaimi sa oge ai Isaraelu. Ona oti ai lea o le toalua o Naomi i le tasi aso. Ona faaipoipo lea o lana fanau tama i a Ruta ma Orepa. Ae ina ua mavae le 10 tausaga, ona feoti lea o le fanau tama e toalua a Naomi. Sa faanoanoa tele nei teine e toalua ma Naomi. O le ā nei le mea o le a fai e Naomi?

I le tasi aso na manao ai Naomi e fai se malaga umi i ona lava tagata. Na mananao Ruta ma Orepa e nonofo ma ia, o lea sa latou o ai. Ae ina ua mavae sina savaliga i le ala, ona faliu atu lea o Naomi i teine ma faapea atu: ‘Ia oulua toe foi atu ia ma nonofo ma o oulua tinā.’

Ona sogi faatofa atu lea o Naomi i a i laua. Ona la fetagisi lea, auā e alolofa tele i laua i a Naomi. Sa la faapea mai: ‘E leai! Tatou te o faatasi ma oe i ou tagata.’ Ae sa tali atu Naomi: ‘Toe foi atu ia si aʻu fanau e. O le a sili ona lelei ia o i o oulua aiga.’ Ona toe foi ai lea o Orepa. Ae sa lei alu Ruta.

Sa faapea atu Naomi: ‘Ua alu Orepa. Alu atu ia e o ma ia. Ae sa tali atu Ruta: ‘Aua e te taumafai e faaoso aʻu ia ou tuua oe! Tuu mai ia aʻu ta te ō. O le mea e te alu i ai ou te alu foi i ai, O le mea e te nofo ai ou te nofo ai foi. O ou tagata o oʻu tagata ia, ma o lou Atua o loʻu Atua foi lea. O le mea e te oti ai ou te oti ai, ma o i ina o le a tanumia ai aʻu.’ Ona le toe taumafai lea o Naomi e toe faafoi iā te ia.

Mulimuli ane ona oo lea o i laua i Isaraelu. O i ina sa nonofo ai loa ma ola ai. Na amata ai loa e Ruta ona galue i le fanua, auā o le taimi lea mo le aoaoina o karite. O le tamaloa e igoa i a Poasa sa faatagaina o ia na te aoaoina karite mai i lona fanua. Pe e te iloaina le tinā o Poasa? O Raava, mai le aai o Ieriko.

I le tasi aso, sa faapea atu ai Poasa i a Ruta: ‘Ua ou faalogo i le tala atoa iā te oe ma lou agalelei i a Naomi. Ua ou iloaina ua e tuua lou tamā ma lou tinā ma lou nuu moni ma ua e ola faatasi ma tagata e te lei iloaina lava i latou. Talosia ia agalelei atu Ieova iā te oe!’

Sa tali atu Ruta: ‘Ua e alofa tele mai i a te au, le alii e. Ua e faafiafia mai foi i a te au e ala i mea lelei uma ua e tautala mai ai.’ Ua manao tele Poasa i a Ruta, ma ua faaipoipo nei i laua. Sa fiafia tele Naomi! Peitai sa sili atu lona fiafia ina ua fanau mai le tama muamua a Ruta ma Poasa, o Opeta. Mulimuli ane ona avea ai lea o Opeta ma tamā o le tamā o Tavita, o lē o le a tatou talatalanoa mulimuli ane i ai.