O AI le tagata na sili atu lona malosi? O le faamasino e igoa i a Samasoni. O Ieova na avatua le malosi iā te ia. E oo lava i le taimi a o lei fanau mai Samasoni, sa taʻu atu e Ieova i lona tinā: ‘Ua toe itiiti ona maua lea o sau tama. O le a taʻitaʻi o ia i le faasaoina mai o Isaraelu mai a Filisitia.’

O Filisitia o ni tagata leaga e nonofo i Kanana. E toatele ona tagata tau, ma sa latou faasaua i a Isaraelu. A o alu atu Samasoni i lona ala i le mea e nonofo ai Filisitia, sa sau ai se leona tagi tele lava e faafetaui iā te ia. Ae sa fasi mate e Samasoni le leona i ona lima. Sa ia fasiotia foi le faitau selau o Filisitia leaga.

Mulimuli ane ona alofa ai lea o Samasoni i a Talila. Sa folafola atu e taʻitaʻi o Filisitia, latou te taitoatasi ona avatua i a Talila fasi ario e 1,100 pe afai na te taʻuina atu i a i latou le mafuaaga o le malosi o Samasoni. Sa manao Talila i tupe uma na. E le o ia o se uo moni a Samasoni ma ona tagata. Ua soona fesiligia Samasoni po o le ā lona malosi tele.

Na iʻu lava ina taʻu e Samasoni i a Talila le pogai o lona malosi. ‘E lei selea lava loʻu lauulu,’ o lana upu lena. ‘Mai i le taimi na ou fanau ai, na filifilia ai aʻu e le Atua e avea ma ana auauna faapitoa e taʻua o le Naseri. Afai o le a sele loʻu lauulu o le a le iloa loa loʻu malosi.’

Ina ua iloa e Talila, sa ia faamoeina loa Samasoni i ona vae. Ona ia valaau atu loa lea i le isi tamaloa e sau e ‘oti lona lauulu. Ina ua ala i luga Samasoni, ua le toe i ai sona malosi. Ona o mai ai lea o Filisitia ma pue iā te ia. Sa latou saliina ese ona mata e lua ma fai ma pologa.

I le tasi aso sa fai ai se fiafia tele a Filisitia e tapuai atu ai i lo latou atua o Takono, ma sa latou aumaia ai Samasoni e fai i ai ni ulaga. I lena taimi, ua toe tutupu le lauulu o Samasoni. Sa faapea atu Samasoni i le tama itiiti o loo taʻitaʻiina lona lima: ‘Sei tuu mai sei ou tago atu i poutu o loo taofia ai le fale.’ Ona tatalo ai lea o Samasoni i a Ieova mo le malosi ma ia tago atu i poutu. Ona ia alaga ai loa lea: ‘Tuu mai ia sei ou oti faatasi ma nei Filisitia.’ Ina ua loloʻu atu Samasoni agaʻi i poutu sa palasi ai loa i lalo le fale ma fasiotia ai Filisitia e 3,000.