PE E le o se tama laitiiti aulelei ea lenei? O lona igoa o Samuelu. Ma o le tamaloa lena e tuu atu lona lima i luga o le ulu o Samuelu o le faitaulaga Sili a Isaraelu o Eli. O le tamā lena o Samuelu o Elekana ma lona tinā o Hana o loo la aumaia Samuelu i a Eli.

E tusa na o le fa pe lima tausaga o Samuelu. Ae o le a nofo nei o ia i le fale fetafai o Ieova faatasi ma Eli ma isi faitaulaga. Aiseā na tuuina atu ai e Elekana ma Hana Samuelu e auauna i le fale fetafai o Ieova? Sei o tatou vaai i ai.

I ni nai tausaga muamua atu a o lei oo lenei mea sa faanoanoa tele Hana. O le mafuaaga ona e leai sana pepe, ae sa ia manao tele i ai. I le isi aso a o asiasi atu Hana i le fale fetafai o Ieova, sa ia tatalo ai: ‘Ieova e, aua e te faagaloina aʻu! Afai e te foaiina i a te au se tama, ou te tauto atu o le a ou avatua o ia e auauna ia te oe i lona olaga atoa.’

Sa tali mai Ieova i le tatalo a Hana, ma i ni masina mulimuli ane ai sa ia fanaua ai Samuelu. Na alofa tele Hana i lana tama laitiiti, ma na aʻoaʻoina o ia e uiga i a Ieova a o itiiti lava. Sa ia faapea atu i lana tane: ‘Afai e matua Samuelu ma ua le toe manaomia le susu, o le a ou avea loa o ia i le fale fetafai e auauna ai i a Ieova i ina.’

O le mea lena o loo faia e Hana ma Elekana i le ata. Ma talu ai sa lelei tele le aʻoaʻoina o Samuelu e ona matua, ua fiafia tele ai o ia e auauna i a Ieova i inei i le fale ie o Ieova. I tausaga taitasi uma lava e ō mai ai Hana ma Elekana e tapuai i lenei fale ie faapitoa, ma asiasi i la la tama itiiti. Ma i tausaga taitasi e aumaia ai e Hana se ofu fou sa ia faia mo Samuelu.

A o faagasolo pea tausaga sa auauna pea Samuelu i le fale fetafai, ma sa alofagia o ia e Ieova ma tagata. Ae o atalii o Eli o Hofeni ma Fineaso, sa la faia ni mea leaga se tele ma taumafai ia aua le usiusitai isi tagata i a Ieova. Sa tatau ona aveesea i laua e Eli mai le tofi o le faitaulaga, ae na te lei faia.

Sa lei faatagaina e Samuelu laitiiti mea leaga na tutupu i le fale fetafai e taofia ai lana auaunaga i a Ieova. Peitai talu ai e toaitiiti tagata na alolofa moni i a Ieova sa umi ai le taimi e lei fetalai mai Ieova i se tagata ola. Ina ua fai sina matua o Samuelu o le mea lenei sa tupu:

Sa moe Samuelu i le fale fetafai ae na fafagu o ia e se leo. Sa ia tali atu: ‘O au lenei.’ Sa tu o ia i luga ma tamoe i a Eli ma fai atu: ‘Sa e valaau mai i a te au, ma o au lenei.’

Peitai sa tali atu Eli: ‘Ou te lei valaau iā te oe; foi ia i lou moega.’ Ona toe foi lea o Samuelu i lona moega.

Ona sau foi lea o le valaau lona lua: ‘Samuelu!’ Ona toe tamoe foi lea o Samuelu i a Eli. ‘Sa e valaau ia te au, ma o au lenei,’ o lana tala lena. Ae na tali atu Eli: ‘Ou te lei valaau iā te oe, lou atalii e. Toe taoto ia i lalo.’ Ona toe foi atu lea o Samuelu i lona moega.

‘Samuelu!’ O le faatolu ai lea o valaau. Sa toe tamoe atu foi Samuelu i a Eli. ‘O au lenei, auā sa e valaau moni mai i a te au,’ o ana upu ia. Ua iloa nei e Eli o Ieova lea sa valaau. Ona ia faapea atu lea: ‘Ia e toe foi e taoto, ma afai e toe valaau atu o ia, ona e fai atu lea: “Fetalai mai ia, Ieova e, auā o loo faalogo atu lau auauna.”’

O le tala lena sa faia e Samuelu ina ua toe valaau mai Ieova. Sa taʻuina atu e Ieova i a Samuelu o le a ia faasalaina Eli ma ona atalii. Mulimuli ane, sa fasiotia Hofeni ma Fineaso i le taua ma Filisitia, ma ina ua faalogo i ai Eli ona paʻū lea o ia ma gau lona ua ma oti ai. O lea na taunuu moni lava afioga a Ieova.

Na avea Samuelu ma faamasino mulimuli o Isaraelu. Ina ua toeaina o ia, sa fai atu tagata: ‘Ia e filifili se tupu e pule i a i matou.’ Sa lei manao i ai Samuelu, auā o Ieova o lo latou tupu. Ae peitai sa tulei atu Ieova e faalogo i le manaoga o tagata.