UA MAVAE atu lea tausaga ma lea tausaga—10 tausaga, 20 tausaga, 30 tausaga, 39 tausaga! Ma ua i ai pea Isaraelu i le vaomatua. Peitai o na tausaga uma sa tausia pea e Ieova ona tagata. Na ia fafaga i a i latou i le manai. Na ia taʻitaʻiina mai i latou i se ao faaniutu i le ao, ma i le afi faaniutu i le po. Ma i na tausaga uma sa lei masaesae o latou ofu ma sa le tiga foi o latou vae.

Ua oo nei i le masina muamua o lona 40 tausaga talu ona tuua Aikupito. Ona toe tolauapi foi lea o Isaraelu i Katesa. O i ina sa latou i ai muamua ina ua aauina atu tagata matamata e toa 12 e vaai le nuu o Kanana. Sa oti le tuafafine o Mose o Miriama i Katesa. Ma e pei lava ona i ai muamua, ua toe i ai foi ni faalavelave.

Ua le maua e tagata se vai i ina. Ona latou faitio ai lea i a Mose: ‘E sili ai pe ana matou feoti. Aiseā na e aumaia ai i matou mai Aikupito i lenei nofoaga matua leaga tele e le ola ai se mea? Leai ni falaoa lelei, leai ni mati, leai ni vine, leai ni rimoni. Ua leai ni vai e inu.’

Ina ua o atu Mose ma Arona e tatalo i le fale fetafai, sa fai atu Ieova i a Mose: ‘Ia e faapotopoto mai tagata. Ma ia e tautala atu i o latou luma i le maa o loo tū mai i o. E lava lelei vai e puna mai ai mo tagata uma ma a latou mea ola.’

Ona faapotopoto mai lea e Mose o tagata, ma faapea atu: ‘Faalogo, outou na e leai se talitonu i le Atua! Pe e aumaia ea e i maua nei ma Arona ni vai mai lenei papa mo outou?’ Ona ta lea e Mose le papa i le laau, ona puna mai ai lea o se vai tele mai le papa. Ua lava ma totoe vai mo tagata ma mea ola.

Peitai ua ita Ieova i a Mose ma Arona. Pe e te iloaina ai se ā? Talu ai ua fai atu Mose ma Arona o le a la aumaia ni vai mai le papa. Ae peitai, o Ieova moni lava sa ona faia. Ma talu ai sa lei taʻuina e Mose ma Arona le mea moni, ona faapea atu lea o Ieova o le a ia faasalaina i laua. ‘O le a oulua le taʻitaʻiina oʻu tagata i totonu o Kanana,’ o lana tala lea.

Ona tuua ai lea e Isaraelu Katesa. Mo sina taimi puupuu ona latou oo ai lea i le Mauga o Horo. O i ina, i le tumutumu o le mauga na oti ai Arona. E 123 tausaga lona matua ina ua oti. Ua faanoanoa tele Isaraelu, ma mo le 30 o aso na fetagisi ai tagata uma mo Arona. O lona atalii o Eleasaro ua avea nei o ia ma ositaulaga sili e sosoo ai mo Isaraelu.