VAAI atu i a Iosua. O loo ia fai atu: ‘La ia tumau!’ Sa tumau le la. Na tu tonu lava i le ogatotonu o le lagi mo le aso atoa. Na faatupuina e Ieova! Ae sei o tatou vaai pe ai se a na manao ai Iosua e susulu mai pea le la.

Ina ua amata ona sii tau tupu leaga e toalima o Kanana faasaga i tagata Kipeona, na auina atu e Kipeona se tagata i a Iosua mo se fesoasoani. ‘Ia outou faavave mai i a i matou!’ o lana tala lea. ‘Faasao i matou! Ua o mai uma tupu o lenei atu mauga e tau ma au auauna.’

I le taimi lava lena na o atu ai Iosua ma ana tagata tau uma. Sa latou savavali i le po atoa. Ina ua oo i Kipeona, sa fefefe fitafita a tupu leaga e toalima ma amata ona sosola. Ona lafo ifo lea e Ieova maa mai le lagi, ma e toatele fitafita na feoti ai na i lo e na fasiotia e Iosua ma ana tagata tau.

Ua iloa e Iosua ua toe itiiti ona alu lea i lalo o le la. O le a pogisa, ma e toatele fitafita a tupu leaga o le a sosola. O le mafuaaga lena na tatalo ai Iosua i a Ieova ma faapea atu: ‘Le la e, ia tumau oe!’ Ma a o susulu pea le la, sa mafai e Isaraelu ona faauma ma manumalo i le taua.

E toatele pea ni tupu leaga i Kanana o ē inoino i tagata o le Atua. E tusa ma le ono tausaga na faatoilaloina ai e Iosua ma ona tagata tupu e 31. Ina ua maea lena, sa vaaia lelei e Iosua le vaevaeina o le laueleele o Kanana i isi ituaiga o loo manaomia ni fasi fanua.

E tele ni tausaga na mavae, ma maliu ai Iosua ina ua 110 ona tausaga. A o ola pea o ia ma ana uo, sa usiusitai tagata i a Ieova. Peitai ina ua feoti, na amata loa ona faia e tagata mea leaga ma oo i ai faalavelave. O i ina tonu latou te manaomia ai le fesoasoani a le Atua.