MAVAE le maliu o Ierepoamo, sa leaga uma tupu na pulea le ituaiga e 10 o le malo o Isaraelu i matu. Ae na silisili ona leaga le tupu o Aapo. Pe e te iloa ai se ā? O le isi mafuaaga tele ona o lana avā, le Masiofo amioleaga o Iesepela.

O Iesepela e le o se Isaraelu. O ia o le afafine o le tupu o Saitonu. E tapuai i le atua sese o Paala, ma na ia aumaia Aapo ma le toʻatele o isi Isaraelu ia tapuai i a Paala. E inoino tele Iesepela i a Ieova ma ia fasiotia le toʻatele o ana perofeta. O isi e lalafi i ana neʻi fasiotia i latou. Afai e manaʻo Iesepela i se mea, na te fasiotia le tagata ina ia mauaina ai.

O le tasi aso na faanoanoa ai le tupu o Aapo. Ona fesili lea i ai o Iesepela: ‘Aiseā ua e faanoanoa ai i lenei aso?’

‘Ona o le tala na fai e Napota i a te au,’ o le tali lea a Aapo. ‘Na ou manaʻo e faatau mai lana tovine. Ae na fai mai e le mafai.’

‘Aua e te popole,’ o le tala lea a Iesepela. ‘O le a ou aumaia iā te oe.’

Ona tusia lea e Iesepela se tusi e ave i le pule o le aai e nofo ai Napota. ‘Aumai ni taulelea ulavavale latou te taʻuina mai na faifai Napota i le Atua ma le tupu,’ o lana upu lena. ‘Ona outou ave lea o Napota i tua o le aai ma fetogi iā te ia i maa ia oti.’

Ina ua faalogo Iesepela ua oti Napota, ona ia fai atu lea i a Aapo: ‘Ia e alu nei loa ma ave ma oe lana tovine.’ Pe e te le ioe e tatau ona faasalaina Iesepela ona na ia faia se mea e sili atu ona leaga?

I se taimi, sa auina atu ai e Ieova ia Ieu e faasala iā te ia. Ina ua faalogo Iesepela ua sau Ieu, sa ia vali ona mata ma teu faaaulelei. Ae ina ua oo atu Ieu ma vaai atu i a Iesepela o loo i luga i le faamalama, ona ia fonō lea i tamaloloa o loo i le fale o le tupu: ‘Ia togi o ia i lalo!’ Na latou faia e pei ona e vaai atu i ai. Na lafoina o ia i lalo ma oti ai. O le iʻuga lena o le Masiofo amioleaga o Iesepela.