A O lei oti Tavita, na ia tuuina atu i a Solomona le ata mai le Atua mo le fausiaina o le malumalu o Ieova. I le tausaga lona fa o lana pulega, na amata ai e Solomona ona fausia le malumalu, ma na faaaluina ai tausaga e fitu ma le afa. E faitau sefulu afe o tagata na galulue i le malumalu, ma e tele ma tele ni tupe na faaaluina i le fale. Talu ai sa tele auro ma ario na faaaogaina ai.

E lua ni potu faapitoa o le malumalu, e pei lava ona i ai i le fale fetafai. Ae o nei potu e faaluaina le tetelē na i lo potu o le fale fetafai. Na tuuina e Solomona le atolaau o le feagaiga i totonu o le potu pito i totonu o le malumalu, ma o isi mea sa i le fale fetafai, sa teuina i le isi potu.

Ina ua uma le malumalu, ona fai ai lea o se fiafia tele. Na tootuli Solomona i luma o le malumalu ma tatalo. ‘E le lava le tele o le lagi e te afio ai,’ o upu ia a Solomona i a Ieova, ‘po o le ā lava le tele o lenei malumalu e te le ofi ai. Peitai, Lou Atua e, faamolemole faafofoga mai i ou tagata pe afai e tatalo atu i lenei nofoaga.’

Ina ua uma le tatalo a Solomona, ona sau ai lea o le afi mai le lagi. Na faamuina ai taulaga na faia i manu. Ma na faatumuina foi le malumalu i se malamalama mai i a Ieova. Ua faaalia ai i lenei mea na faafofoga mai Ieova, ma ua fiafia foi o ia i le malumalu, ma le tatalo a Solomona. Ua avea nei le malumalu, ae le o le fale fetafai, ma mea e o mai i ai tagata e tapuai ai.

Na pule Solomona mo se taimi umi i se auala poto, ma na fiafia tagata. Ae na faaipoipo atu Solomona i fafine e toatele o atunuu e le tapuai i a Ieova. Pe e te iloa atu le tasi o i latou lena e tapuai atu i se tupua? Mulimuli ane, ona faaoso lea e avā a Solomona o ia e tapuai atu i isi foi atua. Pe e te iloa le mea na tupu ina ua faia e Solomona lenei mea? Ua ia le toe tausia lelei ona tagata. Ua saua, ma ua le fiafia tagata.

Ua le fiafia nei Ieova i a Solomona, ona ia tulei atu lea: ‘O le a ou aveesea le malo mai iā te oe ma foaiina atu i se isi tagata. Ou te le faia lenei mea a o e ola, ae i le taimi o le pulega a lou atalii. Ou te le toeseina uma tagata o le malo mai i lou atalii.’ Sei o tatou vaai pe na faapefea ona tupu lenei mea.