AFAI e te oti o le ā se faalogona o lou tinā pe afai e te toe ola mai? O le a fiafia tele! Ae pe e mafai e se tagata ua oti ona toe ola? Pe na tupu muamua lenei mea?

Vaai atu i lena tamaloa, ma le fafine ma le tama itiiti. O le tamaloa o le perofeta o Elia. A o le fafine ua oti lana tane, mai le aai o Sarefata, ma o le tama itiiti o lana tama. O le isi aso na maʻi ai le tama itiiti. Na tigaina o ia ma oo lava ina oti ai. Ona fai atu lea o Elia i le fafine: ‘Tuu mai le tama i a te au.’

Na ave e Elia le tama itiiti i le falealuga ma tuu i le moega. Ona ia tatalo lea: ‘Ieova e, ia e toe faaolaina lenei tama itiiti.’ Ma na toe amata ona manava le tama itiiti! Sa toe avatu e Elia le tama itiiti ma fai atu i le fafine: ‘Vaai, ua ola lau tama!’ O le mafuaaga lena ua fiafia ai le tinā.

O le isi perofeta tāua a Ieova o Elisaia. O ia e fesoasoani i a Elia. I se taimi na faaaoga ai e Ieova Elisaia e faia vavega. O le tasi aso na alu ai Elisaia i le aai o Sunema, ma na agalelei se fafine iā te ia. Mulimuli ane ai ona fanau lea o lana tama tane.

A o tuputupu aʻe le tama, na faatasi atu o ia i lona tamā o loo galue i le faatoaga. Na faafuasei ona alaga le tama itiiti: ‘Ua tiga lou ulu!’ E avatu le tama i le fale ua oti o ia. Sa faanoanoa tele lona tinā! I le taimi lava lena na alu ai o ia ma aami Elisaia.

Ina ua taunuu Elisaia, sa alu o ia i le potu faatasi ma le tama itiiti ua oti. Na tatalo o ia i a Ieova, ma fāo i luga o le tino. E lei umi ae mafanafana le tino o le tama itiiti ma mafatua faafitu o ia. Sa fiafia tele le tinā ina ua ola lana tama!

E toatele tagata ua feoti. Ma ua faanoanoa ai tele o latou aiga ma uo. E le i a i tatou se mana e faatutu mai ai e ua feoti. Ae o loo i a Ieova. Mulimuli ane o le a tatou aʻoaʻoina pe faapefea ona ia toe aumaia le faitau miliona o tagata ia ola.