INA ua uma ona fasiotia e Tavita o Koliata ona avatua lea o ia e Apineru i a Saulo. Sa fiafia tele Saulo i a Tavita. Na ia tofia o ia e fai ma taʻitaʻi i lana autau ma faanofo i le fale o le tupu.

Mulimuli ane, ina ua foi mai le taua ma Filisitia, na pepese loa fafine: ‘Na fasiotia e Saulo le toaafe, ae na fasiotia e Tavita le sefulu o afe.’ Sa tupu le loto leaga o Saulo, auā ua tele le viiga mo Tavita na i lo ia. Ae o le atalii o Saulo o Ionatana e lei loto leaga o ia. E alofa o ia i a Tavita, ma sa alofa foi Tavita i a Ionatana. Ona fai ai lea o se la tautoga o le a uo pea i laua.

E lelei tele le ta kitara a Tavita, ma sa fiafia Saulo i pese na ia taina. Ae i le isi aso o le loto leaga o Saulo na mafua ai ona ia faia se mea mataʻutia. A o taina e Tavita le kitara, sa velo e Saulo lana tao, ma faapea ane: ‘O le a ou faamauina Tavita faatasi ma le puipui.’ Ae na alo Tavita ma sa ‘ela ai. Mulimuli ane na toe ‘ela foi le velo a Saulo i a Tavita. Ua iloa nei e Tavita e tatau ona ia matuā faaeteete.

Pe e te manatua le tautoga a Saulo? Fai mai o ia na te tuuina atu lona afafine e fai ma avā a le tagata na te fasiotia Koliata. Mulimuli ane sa fai atu Saulo i a Tavita e mafai ona fai ma ana avā lona afafine o Mekala, a e tatau ona ia fasiotia se toa 100 o fili o Filisitia. Sa faamoemoe Saulo ia fasiotia e Filisitia Tavita. Peitai e leai, ma o lea na avatu ai e Saulo lona afafine e fai ma avā a Tavita.

O le tasi aso na fai atu ai Saulo i a Ionatana ma ana auauna uma e manao o ia e fasioti Tavita. Ae sa faapea atu Ionatana i lona tamā: ‘Aua e te faia se mea leaga i a Tavita. Na te lei faia lava se mea sese iā te oe. Ae sa ia fesoasoani tele iā te oe. Na le manumanu o ia i lona ola ina ua ia fasiotia Koliata, ma sa e fiafia i ai.’

Na faalogo Saulo i lona atalii ma na ia tauto na te le toe faia le mea leaga i a Tavita. Ua toe aumai nei Tavita, ma toe auauna i a Saulo i lona fale. O le tasi foi la aso, a o ta pese a Tavita, sa toe velo ai foi e Saulo Tavita. Na alo Tavita, ma tu ai le tao i le puipui. O le faatolu ai lenei! Ua iloa nei e Tavita e tatau ona sola ese o ia!

Ona alu atu lea o Tavita i lona fale i lena po. Ae na aauina atu i ai e Saulo ni tagata e fasioti iā te ia. Ua iloa e Mekala fuafuaga a lona tamā. Ona ia fai atu lea i lana tane: ‘Afai e te le sola ese nanei, o le a e oti taeao.’ Ona fesoasoani ai lea o Mekala i a Tavita ia sola ese i le faamalama. E tusa e fitu tausaga na lafi solo ai Tavita ina neʻi maua o ia e Saulo.