PE E te iloa le fafine lalelei lena e sau e feiloai ma Tavita? O ia o Apikaila. E iā te ia ni manatu lelei, ma na ia taofia Tavita mai i lona faia o se mea leaga. Peitai, sei o tatou vaai po o le a na tupu i a Tavita.

Na sola ese Tavita mai i a Saulo, ma lafi i se ana. Sa faatasi atu iā te ia ona uso ma lona aiga. E tusa e 400 tagata na o atu ma avea Tavita ma o latou taʻitaʻi. Sa alu Tavita i le tupu o Moapi ma fai i ai: ‘Faamolemole sei nonofo atu lou tinā ma lou tamā ma outou seia ou iloa po o le a e tupu i a te au.’ Mulimuli ane sa lalafi Tavita ma ona tagata i mauga.

Na tupu lena mea a o lei feiloai Tavita ma Apikaila. O lana tane o Napalu o sē e tele ana fanua. E i ai ana mamoe e 3,000 ma ‘oti e 1,000. E saua tele Napalu. Ae o Apikaila e ese le lalelei. Na te iloa foi fai le mea ua saʻo. Sa ia faasaoina lona au aiga. Sei o tatou vaai i ai pe na faapefea.

Na agalelei Tavita ma ona tagata i a Napalu. Sa latou fesoasoani i le leoleoina o ana mamoe. I le isi aso na aauina atu ai e Tavita ona tagata e fai i a Napalu na te faia se mea lelei mo i latou. Na o atu tagata a Tavita i a Napalu a o sele fulufulu mamoe e Napalu ma ona tagata. O se aso o le faigaai, ma na tele ni mea ai lelei a Napalu. Sa fai atu tagata a Tavita: ‘Sa matou agalelei i a te outou, matou te lei gaoia ni a outou mamoe, ae sa matou fesoasoani i le vaavaaiga. O lea, faamolemole, aumai ni mea ai ma i matou.’

‘Ou te le avatua au mea ai mo outou,’ o le tala lea a Napalu. Na ia tautala i se auala saua ma fai upu leaga agaʻi i a Tavita. Ina ua foi tagata ma taʻu i a Tavita, sa ita tele Tavita. ‘Fusi ia tou pelu!’ o lana faatonuga lea i ona tagata. Ona o lea o i latou i le ala e fasiotia ia Napalu ma ona tagata.

Sa alu se tasi tagata a Napalu ma taʻu i a Apikaila le mea na tupu. Sa sauniunia loa e Apikaila ni mea ai ma tuu i luga o ni asini ma amata loa lana malaga. Ina ua fetaiai o ia ma Tavita, sa ia oso ese loa mai lana asini, ifo i lalo ma faapea atu: ‘Faamolemole, lau susuga, aua e te faalogo i lou toalua o Napalu o ia o se tagata valea, ma e fai mea valea. O le mea alofa lenei. Faamolemole ia ave ma ia outou faamagalo mai i matou i le mea na tupu.’

‘O oe o se fafine poto,’ o le tali lea a Tavita. ‘Ua e taofia aʻu mai le fasiotia o Napalu e toe totogi ai lona saua. Ia e toe foi i lou aiga ma le filemu.’ Ina ua oti Napalu sa avea Apikaila ma se tasi o avā a Tavita.