UA TOE o mai foi Filisitia e tau ma Isaraelu. O isi uso matutua e toatolu o Tavita ua i ai nei i le autau a Saulo. I le tasi aso na fai atu ai Iese i a Tavita: ‘Ia e ave ni saito tunu ma ni papa falaoa mo ou uso, ma vaai pe o faapefea mai i latou.’

Ina ua taunuu Tavita i le mea na malolo ai le autau, sa ia tamoe loa i le laina o le taua e vaai ona uso. Sa sau le Filisitia tinoese o Koliata e tauemu i a Isaraelu. Sa ia faia lenei mea i taeao ma afiafi uma mo le 40 aso. Na ia fonō mai: ‘Ia filifili mai se tasi o outou e tau ma aʻu. Afai e malo o ia ma fasioti i a te au, o le a fai i matou ma a outou pologa. Ae afai ou te manumalo ma ou fasioti iā te ia, ona fai lea o outou ma a matou pologa. Ma o lau luʻi lea i a te outou ia filifili mai se tasi ma te tau.’

Na fesili Tavita i isi fitafita: ‘O le ā e maua e se tagata na te fasiotia le Filisitia ma faasaoloto Isaraelu mai i lenei luma?’

‘O le a avatua i ai e Saulo le tamaoaiga e tele,’ o le tala lea a fitafita. ‘Ma avatu lona afafine e fai ma ana avā.’

Peitai ua fefefe uma Isaraelu talu ai e lapoa tele Koliata. E sili atu i le 9 futu lona umi (pe tusa e 3 mita), ma e i ai foi le isi ana fitafita na te aveina lana talita.

Sa o isi fitafita ma taʻu i a Saulo e manao Tavita e tau ma Koliata. Ae na fai atu Saulo i a Tavita: ‘E te le mafai ona tau ma lenei Filisitia. O oe o se tama itiiti, ae sa fai o ia ma fitafita i lona olaga atoa.’ Na tali Tavita: ‘Na ou tapeina le urosa ma le leona. O le a pei foi le Filisitia lena o se tasi o i laua. O le a fesoasoani Ieova i a te au.’ Ona faapea mai lea o Saulo: ‘Ina alu ia, ia fesoasoani Ieova iā te oe.’

Sa alu Tavita i le alia ma aumai ni maa lamolemole se lima, ma tuu i totonu o lana ato. Sa ia ave foi lana maatā ma alu loa e fetaiai ma le tagata lapoa. Ina ua vaai atu i ai Koliata sa manatu o ia e faigofie tele ona fasiotia Tavita.

‘Sau ia i a te au,’ o upu ia a Koliata, ‘ma o le a ou tuu atu lou tino e aai ai manu lele ma mea ola.’ Ae na fai atu Tavita: ‘E te sau i a te au i le pelu ma le tao ma le tao leoleo, ae ou te alu atu iā te oe i le suafa o Ieova. O le aso lenei e tuuina mai ai oe e Ieova i ou lima ma o le a ou fasia ai oe.’

Na momoe atu loa Tavita i a Koliata. Na ia aumai se maa ma tuu i lana maatā, ma sasau i lona malosi atoa. Na lele saʻo lava le maa i le ulu o Koliata, ma oti ai! Ina ua vaai atu Filisitia ua paʻu lo latou toa, sa faliu uma loa i latou ma sosola. Sa tuliloa atu i latou e Isaraelu ma manumalo ai i latou i le taua.