PE E mafai ona e iloa le mea sa tupu? Ua toe faasaoina mai e le tama lana tamai mamoe mai i le urosa. Sa ave e le urosa le tamai mamoe e ai. Ae sa tuliloa e le tama, ma ia toe faasaoina mai ai le mamoe mai le gutu o le urosa. Ma ina ua faasaga mai le urosa, sa tago atu le tama ma fasi mate! I le isi taimi na ia faasaoina mai ai le mamoe mai i le leona. Pe e le o se tama toa ea lena? O ai lona igoa?

O le talavou lenei o Tavita. E nofo o ia i Peteleema. O le tamā o lona tamā o Opeta, o le tama a Ruta i a Poasa. Pe e te manatuaina i latou? Ma o le tamā o Tavita o Iese. E leoleo e Tavita mamoe a lona tamā. Na fanau Tavita i le 10 tausaga talu ona fai e Ieova Saulo ma tupu.

Ona oo mai lea o le taimi ua tulei atu ai Ieova i a Samuelu: ‘Ia e ave le suāuu ma alu i le fale o Iese i Peteleema. Ua ou filifilia se tasi o ona atalii e fai ma tupu.’ Ina ua vaai Samuelu i le ulumatua o Eliapo, sa ia faapea ane: ‘O ia moni lava lenei ua filifilia e Ieova.’ Ae na tulei atu Ieova: ‘Aua e te vaai i lona aulelei ma lona umi. Ou te lei filifilia o ia e fai ma tupu.’

Ona valaau lea e Iese o lona atalii o Apinatapa ma aumai i a Samuelu. Ae fai atu Samuelu: ‘Leai, e lei filifilia o ia e Ieova.’ Ona aumaia lea e Iese o lona atalii o Sama. ‘Leai, e lei filifilia foi o ia e Ieova,’ o le tala lea a Samuelu. Na aumaia uma ona atalii e toafitu i a Samuelu, ae e lei filifilia se tasi. ‘Pe na o le pau ia o tama?’ o le fesili lea a Samuelu.

‘O loo i ai le aupito itiiti,’ o le tala lea a Iese. ‘Ae peitai o loo leoleo o ia i mamoe.’ Ina ua aumai Tavita, na mafai e Samuelu ona iloa o ia o se tama lalelei. ‘O ia lena,’ o afioga ia a Ieova. ‘Liligi le suauu i ona luga.’ O le mea lena na faia e Samuelu. O le a oo mai le taimi e fai ai Tavita ma tupu o Isaraelu.