PE E te iloa ai se ā na tatalo ai lenei tamaloa i a Ieova? Aiseā ua ia fofola ai na tusi i luma o le fata faitaulaga? O le tamaloa o Esekia. O ia a le tupu o ituaiga e lua a Isaraelu. Ma ua i ai o ia i ni faalavelave se tele. Aiseā?

Talu ai ua uma ona faaumatia e au a Asuria ia ituaiga e 10 i matu. Na faatagaina e Ieova lenei mea talu ai sa leaga tele na tagata. Ma o le taimi la lenei ua o mai ai Asuria e tau faasaga i le malo o ituaiga e lua.

Ua faatoa uma lava ona aauina e le tupu o Asuria ni tusi i le Tupu o Esekia. O tusi na o loo tuuina e Esekia i luma o le Atua. Ua faifai nei tusi i a Ieova, ma fai atu i a Esekia ia faamavae. O le mafuaaga lena ua tatalo ai Esekia: ‘Ieova e, faaola mai i matou mai le tupu o Asuria. Ona iloa ai lea e nuu uma na oe lava le Atua.’Pe o le a faalogo ea Ieova i a Esekia?

O Esekia o se tupu lelei. E le pei o ia o tupu leaga o le ituaiga e 10 o le malo o Isaraelu, po o lona tamā le tupu leaga o Aasa. Na faaeteete Esekia ia usiusitai i tulafono uma a Ieova. O lea, ina ua uma ona tatalo Esekia, sa auina atu loa e le perofeta o Isaia lenei feau mai i a Ieova: ‘E le oo mai le tupu o Asuria i totonu o Ierusalema. E le taitai foi ona latalata mai i ai se tasi o ana fitafita. Latou te le fanaina mai se ū e tasi i le aai.

Vaai i le ata o i lenei itulau. Pe e te iloa o ai e ana na fitafita ua feoti? O tagata Asuria. Na auina atu e Ieova lana agelu, ma i le po e tasi na fasiotia ai e le agelu le 185,000 fitafita Asuria. Ona siilima lea o le tupu o Asuria ma toe foi atu i lona fale.

Ua laveaiina le ituaiga e lua, ma sa filemu tagata mo sina vaitaimi. Ae ina ua uma le oti o Esekia sa avea lona atalii o Manase ma tupu. O Manase ma lana atalii o Amone na sosoo ma ia o ni tupu leaga i laua. O lea na toe tumu le nuu i le solitulafono ma le amioleaga. Ina ua fasiotia Amone e ana lava auauna, ona fai lea o lana atalii o Iosia ma tupu o le ituaiga e lua.