NA AVEINA e le Tupu o Nepukanesa tagata ua aʻoaʻoina lelei o Isaraelu i Papelonia. Ona ia filifilia mai ai lea o ni taulelea e sili le aulelei toe atamamai. O ni isi tama na e toafa o loo e vaai atu ai i ina. O le tasi o Tanielu ae o le isi toatolu ua faaigoaina e Papelonia o Sataraka, Mesako ma Apeteniko.

Na fuafuaina e Nepukanesa e aʻoaʻoina ia taulelea e auauna i lona maota. A uma tausaga e tolu ona ia filifilia lea na o e aupito popoto e fesoasoani iā te ia e foia ona faalavelave. Na manao le tupu e malolosi ma ola maloloina nei tama a o aʻoaʻoina i latou. O lea na ia fai atu ai ni faatonuga malolosi e tuuina atu i a i latou uma lava mea ai lelei ma uaina e pei o mea o loo maua e lona aiga.

Vaai atu i le talavou lena o Tanielu. Pe e te iloa lana tala lena e fai atu i le auauna sili a Nepukanesa o Asepenasa? O loo fai atu Tanielu na te le manao e ai ni mea ai lelei mai le laulau a le tupu. Ae na popole Asepenasa: ‘Ua filifilia e le tupu mea tou te aai ai ma inu ai,’ o lana tala lea. ‘Afai tou te le ola maloloina lelei e pei o isi taulelea, atonu o le a ia fasiotia au.’

Sa alu atu loa Tanielu i le leoleo na tofiaina e Asepenasa e vaaia i latou. ‘Faamolemole tuu mai ni aso se 10 e iloiloina ai i matou,’ o lana tala lea. ‘Ia tuuina mai i a i matou ni fualaau matou te aai ai ma ni vai matou te inuina. Ona e faatusatusa lea o i matou ma isi taulelea o loo aai i mea ai a le tupu, ma iloa ai po o ai e sili ona ola lelei.’

Na malie i ai le leoleo. Ina ua uma aso e 10, na sili atu le ola lelei o Tanielu ma ana uo e toatolu i lo isi taulelea uma. O lea na faatagaina ai e le leoleo i latou ia faaauau pea ona latou aiina fualaau na i lo mea na saunia e le tupu.

Mavae tausaga e tolu ona aauina uma atu lea o taulelea i a Nepukanesa. Ina ua maea le suesuega a le tupu, ona ia iloa ai lea na sili atu le atamai o Tanielu ma ana ou e toatolu. Ona ia taofia ai lea o i latou e fesoasoani iā te ia i lona maota. Ae po o le ā lava le mea e fai atu ai le tupu i a Tanielu, Sataraka, Mesako ma Apeteniko, o se fesili, po o le tuuina atu i a i latou o faalavelave faigata, e faasefulu ona sili atu lo latou iloa i lo soo se tasi o ana faitaulaga po o ana tagata popoto.