NA TALAVOU lava Solomona a o fai o ia ma tupu. E alofa o ia i a Ieova, ma mulimuli i fautuaga lelei a lona tamā o Tavita. Na fiafia Ieova i a Solomona, ma o le isi po na ia faapea atu ai e ala i se miti: ‘Solomona, o le ā le mea e te manao ou te avatua mo oe?’

Ona tali atu lea o Solomona: ‘Ieova e, lou Atua, e laitiiti tele au ma ou te le iloa ona pule. O lea ia e aumai i a te au le poto e pulea ai ou tagata i se auala saʻo.’

Na fiafia Ieova i le mea na fai atu ai Solomona. Ona ia tulei atu lea: ‘Talu ai na e manao mai i le poto ae le o le ola umi po o le tamaoaiga, o le a ou avatua ai iā te oe le poto e sili atu i lo soo se isi lava tagata. Ae ou te avatua foi iā te oe le tamaoaiga ma le mamalu.’

Ua mavae sina taimi puupuu, ona o atu lea o ni fafine se toalua i a Solomona ma se faalavelave faigata. ‘O le fafine lea ma te nonofo faatasi,’ o le tala lea a le isi fafine. ‘Na ou fanaua se pepe tama. I le isi po, na oti ai lana pepe. Sa ou moe, ae na ia aumai lana tama ma tuu i ou tafatafa ae ave lau pepe. Ina ua ou ala ua ou iloa ai e le o sau tama le pepe ua oti.’

Ona fai mai lea o le isi fafine: ‘E leai! O le pepe ola o lau tama lea, ae o le ua oti o lana tama lea!’ Ona tali atu lea o le fafine muamua: ‘E leai! O laʻu tama le pepe lena e ola!’ Ona finau ai pea lea o nei fafine. O le ā nei o le a fai e Solomona?

Na ia poloai mo se pelu, ma ina ua maua mai, na ia faapea atu loa: ‘Ia tipi lua le pepe ola ma avatu e tofu le fafine ma le afa.’

‘Aua’ o le tagi lea a le tinā moni. ‘Faamolemole aua le fasiotia le pepe. Ia avatu ma ia!’ Ae na faapea mai le isi fafine: ‘Aua neʻi aumaia ma se isi o i maua; tipi lua pea le pepe.’

Sa faapea atu loa Solomona: ‘Aua le fasiotia le pepe! Avatu o ia i le fafine muamua. O ia o lona tinā moni.’ Na iloa e Solomona auā o le tinā moni sa alofa tele i le pepe ua naunau ai e tuuina atu i le isi fafine ae aua neʻi fasiotia. Ina ua faalogo tagata i le auala na foia ai e Solomona le faalavelave, na fiafia i latou ina ua fai o ia ma o latou tupu.

I le taimi o le pulega a Solomona, na faamanuia ai le Atua i tagata, sa ia faatupu teleina saito ma karite, vine, mati ma isi mea ai. Na oofu lelei tagata ma nonofo i fale lelei. Ua sili atu ona tele mea e maua i lo mea e manaomia e tagata.