SEI o tatou toe foi atu i ni nai tausaga a o lei tuua e Esera Ierusalema. O Moretekai ma Eseta o ni Isaraelu tāua i le malo o Peresia. O Eseta o le masiofo ae o le atalii o le uso o lona tamā o Moretekai e lona lua lona tulaga i le tupu. Sei o tatou vaai pe na tupu faapefea lea mea.

Na feoti matua o Eseta a o laitiiti o ia, o lea na tausia ai o ia e Moretekai. O Asueru, le tupu o Peresia, e i ai lona maota i le aai o Susana, ma o Moretekai o se tasi o ana auauna. I le tasi aso na le usitai ai le avā a le tupu o Vasati, o lea na filifilia ai loa e le tupu se masiofo fou. Pe e te iloa le fafine na ia filifilia? Ioe, o le talavou aulelei o Eseta.

Pe e te iloa atu lena tamaloa faamaualuga o loo ifo atu i ai tagata? O Hamanu lena. O ia o se tagata taua i Peresia. Na manao Hamanu e ifo atu foi Moretekai lena e nofo mai i ina iā te ia. Ae e lei faia e Moretekai. E lei manatu o ia o se mea saʻo le ifo atu i se tagata leaga faapena. Ma na ita tele Hamanu i lenei mea. O le mea la lea na ia faia.

Ona taʻu atu lea e Hamanu i le tupu ni pepelo e uiga i a Isaraelu. ‘O tagata leaga i latou e le usiusitai i au tulafono,’ o lana tala lea. ‘Ua tatau ona fasiotia i latou.’ E lei iloa e Asueru o lana avā o Eseta o se Isaraelu. O lea sa ia faalogo ai i a Hamanu, ma na ia faia ai se tulafono o le a i ai se aso faapitoa e fasiotia ai Isaraelu uma.

Ina ua faalogo Moretekai i le tulafono, sa le fiafia o ia. Ona ia avatu lea o se feau i a Eseta: ‘E tatau ona e ole atu i le tupu ina ia faaolaina i tatou.’ E sa i le tulafono a Peresia ona e alu e vaai le tupu sei vagana ua valaaulia oe. Ae na alu i ai Eseta a aunoa ma le valaaulia o ia. Na sii mai e le tupu lona tootoo auro iā te ia, o lona uiga e le fasiotia o ia. Na valaaulia e Eseta le tupu ma Hamanu i se faigaai tele. Na fesili le tupu ia Eseta po o le ā se mea e manao na te faia mo ia. Ona fai atu lea o Eseta pe e mafai ona la o mai ma Hamanu mo se faigaai i le isi aso.

I lena faigaai na taʻu atu e Eseta i le tupu: ‘O oʻu tagata ma aʻu o le a fasiotia.’ Ua ita le tupu. ‘O ai na te mafai ona faia lena mea?’ o lana fesili lea.

‘O le fili, o lenei Hamanu leaga!’ o upu ia a Eseta.

Ua ita tele le tupu. Na ia poloaiina ai e fasiotia Hamanu. Ina ua mavae lena, ona tofia lea e le tupu Moretekai e sosoo atu lana pule iā te ia. Ona vaai lea o Moretekai ua i ai se tulafono fou e faia e faataga ai Isaraelu e tau mo o latou ola i le aso o le a fasiotia ai i latou. Ona ua tāua nei Moretekai, o le toatele o tagata sa fesoasoani i a Isaraelu, ma na faasaoina ai i latou mai i o latou fili.