VAAI atu i galuega e tele na e fai mai. O loo tele galuega a Isaraelu i le toe fausiaina o pa o Ierusalema. Ina ua faaumatia e le Tupu o Nepukanesa Ierusalema i le 152 tausaga muamua, na ia talepeina i lalo pa ma susunu faitotoa o le aai. E lei toe fausia e Isaraelu pa ina ua faatoa taunuu atu mai Papelonia.

Pe o le ā sou manatu i faalogona o tagata a o ola i latou e aunoa ma ni pa? Sa latou faalogoina le fefe. E faigofie e fili ona osofai i latou. Ae o Neemia lena ua fesoasoani i tagata mo le toe fausiaina o pa. Pe e te iloa o ai Neemia?

O Neemia o se Isaraelu mai le aai o Susana, o le mea e nonofo ai Eseta ma Moretekai. Sa galue Neemia i le maota o le tupu, o lea atonu o ia o se uo lelei a Moretekai ma le Masiofo o Eseta. Ae e le o taʻua e le Tusi Paia faapea na galue Neemia mo le tane a Eseta, o Asueru le Tupu. Na ia galue mo le tupu na sosoo ai, le Tupu o Aretaseta.

Manatua, o Aretaseta o se tupu lelei na ia tuuina atu i a Esera ni tupe e ave i Ierusalema mo le toe faia o le malumalu o Ieova. Ae na lei fausiaina e Esera pa o le aai na solo i lalo. Sei o tatou vaai pe na faapefea ona faia e Neemia lenei galuega.

Ua tusa ma le 13 tausaga talu ona tuuina atu e Aretaseta le tupe i a Esera mo le toe faia o le malumalu. Ua avea nei Neemia ma tautu uaina sili mo le Tupu o Aretaseta. O ia e tuuina atu uaina a le tupu, ma ia ona faamautinoa lelei e leai se tasi e taumafai e faaoonaina le tupu. O se galuega tāua tele.

O le tasi aso na o mai ai le uso o Neemia o Hanani ma isi tamaloloa mai Isaraelu e asiasi i a Neemia. Sa latou taʻu atu ia te ia faafitauli o loo feagai ma Isaraelu, ma pa o Ierusalema o loo solo pea. Sa faanoanoa tele Neemia, ma sa tatalo o ia i a Ieova e uiga i lena mea.

I le tasi aso na vaaia ai e le tupu ua faanoanoa Neemia, ma na fesili atu ai: ‘Aiseā ua e foliga faanoanoa ai?’ Na taʻu atu e Neemia talu ai ona ua leaga tele Ierusalema ma o loo solo pea pa. ‘O le ā la le mea e te manao i ai?’ o le fesili lea a le tupu.

‘Tuu mai aʻu ou te alu i Ierusalema,’ o le tala lea a Neemia, ‘ina ia ou toe fausia pa.’ E agalelei tele le Tupu o Aretaseta. Na ia taʻu atu e alu Neemia ma fesoasoani i ai mo ni laau mo le faia o le galuega. Ina ua taunuu mai Neemia i Ierusalema, ona ia taʻu atu lea i tagata ana fuafuaga. Sa latou mananao i ai, ma faapea mai: ‘Sei o tatou amata loa le galuega.’

Ina ua iloa atu e fili o Isaraelu ua alu aʻe i luga le pa, ona latou faapea lea: ‘O le a tatou o ma fasioti i latou, ma taofi le galuega.’ Ae na faalogo i ai Neemia, ma na ia tuuina atu i le au faigaluega ni pelu ma ni tao. Ma fai atu: ‘Aua tou te fefefe i o outou fili. Tau mo o outou uso, fanau, ma a outou avā ma mo o outou fale.

Ua totoa tagata. Na sauniuni a latou auupega i ao ma po, ma faaauau pea le galuega. O lea na o le 52 lava aso ae uma le pa. Ma ua mauaina e tagata se faalogona malu puipuia i totonu o le aai. Na aʻoaʻo e Neemia ma Esera tagata e uiga i tulafono a le Atua, ma ua fiafia ai tagata.

Ae ua le tutusa lava mea pei ona i ai a o lei aveina faapagota Isaraelu i Papelonia. Ua pulea Isaraelu e le tupu o Peresia ma e tatau ona latou auauna i ai. Ae na folafola e Ieova o le a na aumaia se tupu fou, ma o lena tupu fou o le a ia aumaia le filemu i tagata. O ai lenei tupu? E faapefea ona ia aumaia le filemu i le lalolagi? E tusa ma le 450 tausaga na mavae, ae e lei toe iloa lava se isi tala e uiga i lenei mea. Ona i ai lea o se fanauga tāua o se pepe. Ae o se isi tala ese lena.