PE E te manatua na e faalogo e uiga i nei taulelea e toatolu? Ioe, o i latou o uo a Tanielu ia na lei aai i mea sa le lelei mo i latou. O i latou o Sataraka, Mesako ma Apeteniko. Ae sei vaai i a i latou. Aiseā ua latou le ifo ai i lena faatusa telē e pei o isi tagata uma? Sei o tatou sueina.

Pe e te manatua tulafono na tusia e Ieova e taʻua o Tulafono e Sefulu? O le tulafono muamua e faapea: ‘Aua e te tapuai i se isi atua ese ae na o au.’ O nei taulelea ua usiusitai atu i lena tulafono, e ui lava e le o se mea faigofie ona fai.

O Nepukanesa, le tupu o Papelonia, na ia valaaulia le tele o tagata tāua ia faamamalu i lenei tupua ua faatuina. Faatoa uma lava lana tala i tagata: ‘Afai tou te faalogo i le leo o le pu, kitara ma isi laau pese, ia ifo loa i lalo i le tupua auro. Soo se tasi e le faapau ma ifo i lalo e tapuai o le a lafoina i le ogaumu aasa i lea lava taimi.’

Ina ua iloa e Nepukanesa sa lei ifo Sataraka, Mesako ma Apeteniko, ona ita ai lea o ia. Ona aumaia lea o i latou i ona luma ma tuuina atu i ai se isi avanoa e ifo ai. Ae sa faalagolago taulelea i a Ieova. ‘O le Atua o lē matou te tapuai i ai e mafai ona ia faaola mai i matou,’ o la latou tala lea i a Nepukanesa. ‘A e tusa lava pe na te le faaolaina i matou, matou te le ifo lava i lau tupua auro.’

Ina ua faalogo i ai Nepukanesa ua atili ai lona ita. Ona ia poloai lea: ‘Ia faavevela le ogaumu ia faafitu ona sili atu lona aasa!’ Ona ia fai atu lea i tamaloloa e sili ona malolosi o lana autau ia saisai Sataraka, Mesako ma Apeteniko ma lafo i le ogaumu. Na matuaʻi aasa tele le ogaumu na feoti ai tamaloloa malolosi i le sasao o le afi. A e faapefea taulelea e toʻatolu na na latou lafoina i totonu?

Na tagai atu le tupu i totonu o le ogaumu, ma sa fefe tele o ia. ‘Pe na tatou lei saisaia ea nei taulelea e toatolu ma togi i latou i le ogaumu mumu aasa?’ o lana fesili lea.

‘Ioe, sa faia faapea,’ o le tali lea a ana auauna.

‘Ae ua ou iloa atu ni tamaloloa se toafa o savavali solo i le afi. Ma o lona fa o i latou e foliga mai o se atua.’ Ona tu lea o le tupu i le faitotoa o le ogaumu ma valaau atu: ‘Sataraka! Mesako! Apeteniko! O mai i fafo, o outou o auauna a le Atua Silisili ese!’

Ina ua latou o mai i fafo, ua iloa e tagata e le o afaina i latou. Ona faapea atu lea o le tupu: ‘Ia viia le Atua o Sataraka, Mesako ma Apeteniko! O Le na auina mai lana agelu e laveaʻi i a i latou ona e le ifo ma tapuai atu i se isi lava atua vagana ai lo latou lava Atua.’

Pe e le o se faataʻitaʻiga lelei ea lenei o le faamaoni i a Ieova mo i tatou e mulimuli ai?