O LE a o tupu i inei? O loo fai se faigaai a tagata. Ua valaaulia e le tupu o Papelonia le afe o tagata tāua e fai ma ana mālo. O loo faaaogaina ipu auro ma ipu ario ma pesini na aumaia mai le malumalu o Ieova i Ierusalema. Ae, na faafuasei lava, ona iloa se lima o le tamaloa ua tu mai i le ‘ea ma amata ona tusi i le puipui. Ua fefefe uma tagata.

Ua tupu nei Pelesara le atalii o le atalii o Nepukanesa. Na ia valaau ia o mai ona tagata popoto. ‘Soo se tasi na te mafai ona faitauina lenei tusitusiga ma taʻu mai lona uiga,’ o upu ia a le tupu, ‘o le a tuuina atu i ai mea alofa e tele ma tofia o ia e fai ma tagata tāua lona tolu o le malo.’ Ae sa leai se isi na te mafai ona faitauina pe iloa foi lona uiga.

Na faalogo le tinā o le tupu i le pisa ma sau loa o ia i le potu ʻai. ‘Faamolemole aua e te fefe,’ o lana tala lea i le tupu. ‘O loo i ai se tamaloa i lou malo na te iloaina atua paia. A o tupu le tamā o lou tamā o Nepukanesa na ia tofia o ia e fai ma taʻitaʻi o ou tagata popoto. O lona igoa o Tanielu. Aami atu iā te ia, ma o le a ia taʻuina atu iā te oe lona uiga.’

Ona aumaia lea o Tanielu. Ina ua uma ona ia teea mea alofa, ona taʻu atu lea e Tanielu le mafuaaga na aveesea ai e Ieova Nepukanesa, le tamā o lona tamā, mai i lona tulaga tupu. ‘Sa faamaualuga tele o ia,’ o le tala lea a Tanielu. ‘Ma na faasalaina o ia e Ieova.’

‘Ae o oe,’ o le tala lea a Tanielu i a Pelesara, ‘ua e iloa mea uma na tutupu iā te ia ae o loo e faamaualuga lava e pei ona sa i ai Nepukanesa. Ua e aumaia ipu ma pesini mai le malumalu o Ieova ma e inu ai. Ua e vivii atu i atua na faia i laau ma maa, ae ua e le vivii i Le na Foafoaina i tatou. O le mafuaaga lea ua auina mai ai e le Atua le lima e tusia upu nei.’

‘O le mea lenei ua tusia,’ o le tala lea a Tanielu: ‘MENE, MENE, TEKELE, UPERESA.’

‘MENE o lona uiga ua faitaulia e le Atua aso o lou malo ma aumaia ai i le iʻuga. TEKELE o lona uiga ua fuaina oe i le fua faatautau ma iloa ai ua e le aogā. UPERESA o lona uiga ua tuuina atu lou malo i a Metai ma Peresia.’

A o tautala Tanielu, sa amata ona osofaia e Metai ma Peresia Papelonia. Na latou pueina le aai ma fasiotia Pelesara. Na taunuu moni lava le tusi lima i le puipui i lena lava po! Ae o le ā o le a tupu nei i a Isaraelu? E toeitiiti ona tatou iloaina lea, ae muamua sei tatou vaai po o le a na tupu i a Tanielu.