TOEITIITI lava lua tausaga talu ona mavae le puʻeina o Papelonia e Metai ma Peresia. Ma vaai atu i le mea ua tupu! Ioe, ua tuua e Isaraelu Papelonia. Na faapefea ona faasaʻolotoina i latou? O ai na faatagaina i latou e o?

O Kuresa le tupu o Peresia. I tuā lava a o leʻi fanau mai Kuresa na faapogaia e Ieova lana perofeta o Isaia e tusi e uiga iā te ia. ‘O le a e faia le mea ou te manaʻo ia e faia. O le a tatalaina le faitotoʻa mo oe e toe osofaʻia ai le aai.’ Ma na taʻitaʻi o ia i le puʻeina o Papelonia. Na o atu Metai ma Peresia i le aai i le po e auala atu i puipui na leʻi tapunia.

Ae na tulei mai Ieova e ala i le perofeta o Isaia o le a tuuina atu e Kuresa le poloaʻiga mo le toe fausia o Ierusalema ma lona malumalu. Pe na tuuina atu ea e Kuresa lena poloaʻiga? Ioe, na ia faia. O le mea lenei na taʻu atu e Kuresa i a Isaraelu: ‘O nei, i Ierusalema ma fausia le malumalu o Ieova, lo outou Atua.’ Ma o le mea tonu lena o loo o Isaraelu e fai.

Ae e le o Isaraelu uma o le a toe foʻi atu mai i Papelonia i Ierusalema. O se malaga umi, e tusa e 500 maila (800 kilomita) ma o le toʻatele ua fai si matutua ma mamaʻi e o i lena mamao. Ma e i ai isi māfuaaga na ala ai ona le mananaʻo isi e o. Ae na fai atu Kuresa i e na le o: ‘Avatu ario ma auro ma mea alofa mo tagata o e o le a foi atu e toe fausia Ierusalema ma lona malumalu.’

O lea, e tele ni mea alofa na tuuina atu ma nā Isaraelu o loo i le ala agaʻi i Ierusalema. E le gata i lea na tuuina atu foʻi e Kuresa i a i latou ipu ma pesini na aumaia e le Tupu o Nepukanesa mai le malumalu o Ieova ina ua ia faaumatiaina Ierusalema. O le tele ia o a latou mea sa ave.

Ina ua uma le fa masina o malaga, ona taunuu ai lea o Isaraelu i le taimi tonu e tatau ai. Ua 70 tonu tausaga talu le faaumatiaga o le aai, ma na leai ma se tasi na i ai i le laueleele. E ui lava ina ua toe foʻi mai Isaraelu i lo latou lava atunuu ae o le a feagai i latou ma ni mea faigatā, o le a tatou aʻoaʻoina nei e sosoo mai ai