Na auina atu le agelu o Kaperielu i se fafine talavou ma lelei e igoa i a Maria. Sa ia taʻu atu o le a i ai sana tama o le a pule o se tupu e faavavau. O le tama itiiti, o Iesu, sa fanau i le fale o manu, i le mea na asiasi atu i ai leoleo mamoe. Mulimuli ane, sa taʻitaʻiina e se fetu ni tamaloloa mai i le itu i Sasae i le tama itiiti. Ua tatou aʻoaʻoina po o ai na faaalia atu i a i latou le fetu, ma na faapefea ona faasaoina Iesu mai taumafaiga ia fasiotia o ia.

Sosoo ai, ua tatou mauaina ai Iesu, ina ua 12 ona tausaga, o talanoa ma faiaʻoga i le malumalu. Sefulu valu tausaga mulimuli ane ai ona papatisoina lea o Iesu, ona amata lea ona ia talaʻi le malo ma aʻoaʻo atu e tusa ma le galuega na auina mai ai o ia e le Atua i le lalolagi e fai. Ina ia fesoasoani iā te ia i lana galuega, na filifilia ai e Iesu ni tamaloloa e toa 12 ma fai ma ona aposetolo.

Na faia foi e Iesu ni vavega se tele. Na ia fafagaina le faitau afe o tagata i ni nai iʻa ma ni falaoa laiti. Na ia faamaloloina foi e mamaʻi ma faatutuina e na oti. Mulimuli ai lava, ua tatou aʻoaʻoina ai ni mea se tele sa tutupu i a Iesu i le toe aso o lona soifuaga, ma pe na faapefea ona fasiotia o ia. Na talaʻi Iesu e tusa ma le tolu ma le afa tausaga, o lea la o le VAEGA 6 e aofia ai se vaitaimi e sili laitiiti ae i le 34 tausaga.