NA FAI atu Iesu i se tamaloa e ao ona ia alofa i lona tuaoi. Ona fesili atu lea o le tamaloa: ‘O ai loʻu tuaoi?’ Ua iloa e Iesu ona mafaufauga. Ua mafaufau o ia na o tagata o lona ituaiga ma lana lotu o ona tuaoi. O lea sei o tatou vaai po o a le tala a Iesu na fai atu iā te ia.

O isi taimi e aʻoaʻo ai Iesu i lona faia o se tala. O le mea lena ua ia faia nei. Ua ia faia se tala e uiga i le Iutaia ma le Samaria. Ua tatou aʻoaʻoina o le toatele o Iutaia e le fiafia i Samaria. O le tala lenei a Iesu:

I le tasi aso na alu ifo ai le Iutaia mai le mauga agaʻi i Ieriko. Ae na laga atu le au gaoi ma fao ana tupe ma fasi iā te ia, ua tāli oti.

Mulimuli ane, ona ui ane lea o se faitaulaga Iutaia i le auala. Na ia vaaia lenei tamaloa na fasia. Po o le ā na ia faia? Na ia ui ane i le isi itu o le auala ma faaauau lana malaga. Ona sau lea o le isi tagata lotu. O ia o le sa Levi. Pe na tu? E lei tu foi o ia e fesoasoani i le tamaloa na fasia. E mafai ona e iloa atu le faitaulaga ma le sa Levi o loo mamao atu i luma i le auala.

Ae vaai, o ai lena e fesoasoani i le tamaloa ua fasia. O ia o se Samaria. O loo fesoasoani ia i le Iutaia. O loo tuuina atu vailaau i ona manua. Mulimuli ane, ua ia aveina le Iutaia i se nofoaga e malolo ai seia malosi.

Ina ua uma lana tala, ona fesili lea o Iesu i le tamaloa lea na fesili atu iā te ia: ‘O fea o nei tagata e toatolu e te manatu o se tuaoi i le tamaloa na fasia. Po o le faitaulaga, le sa Levi, po o le Samaria?’

Ona tali atu lea o le tamaloa: ‘O le tamaloa Samaria. Na agalelei o ia i le tamaloa na fasia.’

Na fai atu Iesu: ‘Ua saʻo lelei oe. Ia e alu loa ma fai i isi e pei ona sa ia faia.’

Pe e te le manao i le auala na aʻoaʻo ai Iesu? E mafai ona tatou aʻoaʻoina ni mea tāua se tele pe afai tatou te faalogo i mea o taʻua e Iesu i le Tusi Paia, a ea?