O LE fafine aulelei lea o Maria. O ia o se Isaraelu, e nofo i Nasareta. Ua iloa e le Atua o ia o se tagata lelei. O le mafuaaga lena na ia auina mai ai lana agelu o Kaperielu e tautala iā te ia. Pe e te iloa o le ā o sau Kaperielu e taʻu i a Maria? Sei o tatou vaai.

‘Talofa oe le ua alofagia,’ o le tala lea a Kaperielu. ‘O loo i ai Ieova ma oe.’ E lei vaai muamua Maria i lenei tagata. Ua popole o ia auā ua na le iloa le uiga o lenei mea. Ae na faamafanafana atu i ai Kaperielu i lona fefe.

‘Aua e te fefe, Maria,’ o lana tala lea. ‘Ua fiafia Ieova iā te oe. O le mafuaaga lena o le a ia faia ai se mea lelei mo oe. Ua toeitiiti i ai sau pepe. Ma e te faaigoa o ia i a Iesu.’

Ua faamatala atili e Kaperielu: ‘O le a sili le tama, e taʻua o ia o le Alo o le Atua Silisili Ese.’ O le a faia o ia e Ieova ma tupu, e pei o Tavita. Ae o le a fai pea Iesu ma tupu e faavavau, ma o lona malo e le gata mai!’

‘E faapefea ona tutupu nei mea uma?’ o le fesili lea a Maria. ‘Ou te lei faaipoipo. E lei i ai saʻu tane, e faapefea la ona maua saʻu pepe?’

‘O le mana o le Atua o le a afio iā te oe,’ o le tali lea a Kaperielu. ‘O lea e taʻua le tama o le Alo o le Atua.’ Ona ia fai atu lea i a Maria: ‘Manatua Elisapeta. Fai mai tagata ua matua o ia e le toe fanau. Ae ua toeitiiti ona fanau lea o sana tama. Ua e vaai la, e leai se mea e le mafaia e le Atua.’

Ona faapea atu lea o Maria: ‘O aʻu o se auauna teine a Ieova! Ia oo mai i a te au e pei ona e fai mai ai.’ Ona alu lea o le agelu.

Ona asiasi atu lea o Maria i a Elisapeta. Ina ua faalogo Elisapeta i le leo o Maria, ona osooso lea o le pepe o i totonu o Elisapeta i le fiafia. Na faatumuina Elisapeta i le agaga o le Atua, ma ia fai atu i a Maria: ‘Ua faamanuiaina oe i fafine uma.’ Ona la nonofo lea pe tusa e tolu masina, ona toe foi lea o Maria i lona aiga i Nasareta.

Ua toeitiiti faaipoipo Maria i a Iosefa. Ae ina ua iloa e Iosefa o le a fanau se pepe a Maria, ona manatu lea o ia ua le tatau. Ona faapea atu lea o le agelu a le Atua iā te ia: ‘Aua e te fefe e fai Maria ma au avā. Auā o le Atua le ua ia tuuina atu i ai se tama.’ Ona faaipoipo ai lea o Iosefa ma Maria, ona la faatalitali ai lea mo le fanau mai o Iesu.