A O malaga Iesu i le nuu, e faamalolo e ia e ua mamaʻi. O tala e uiga i nei vavega ua salalau i nuu ma taulaga uma. Ona aumaia lea iā te ia e tagata o e pipili ma tauaso ma tutuli, ma le tele o e mamaʻi. Ma na faamalolo i latou uma e Iesu.

E tusa ua tolu nei tausaga talu le papatisoina e Ioane o Iesu. Ma na taʻu atu e Iesu i ona aposetolo ua toeitiiti ona alu lea o ia i Ierusalema, o le a fasiotia ai o ia, ma toe faatu mai le oti. I le taimi lava lea, sa faamalolo pea e Iesu maʻi.

O le tasi aso na aʻoaʻo ai Iesu i le Sapati. O le Sapati o se aso malolo mo Iutaia. O le fafine o loo e vaai atu i ai sa maʻi tele o ia. E 18 tausaga na le mafai ai ona tu saʻo o ia. Ona tuu lea e Iesu ona lima iā te ia, ma amata loa ona ia tu saʻo. Ua malosi o ia!

Na feita tele ai le au taʻitaʻi lotu. ‘E ono aso e tatau ai ona tatou galulue,’ o le valaau lea a se tasi o i latou agaʻi i le aofia. ‘O aso na mo faamalologa, ae le o le Sapati!’

Ae na tali atu Iesu: ‘O outou o tagata leaga. Tou te tatalaina a outou asini ma ave e faainu i le Sapati. O lea pe e le tatau ea ona faamalolo si nei fafine, na maʻi mo le 18 tausaga, i le Sapati?’ O le tali a Iesu na mama ai nei tamaloloa leaga.

Mulimuli ane ona malaga lea o Iesu ma ona aposetolo agaʻi i Ierusalema. Ina ua latalata i latou i Ieriko, na faalogo ni tagata tauaso e toalua o loo malaga aʻe Iesu. O lea na la valaau ai: ‘Iesu e, fesoasoani mai i a i maua!’

Na talia e Iesu nei tauaso ma fesili: ‘O le ā lua te mananao ou te faia mo oulua?’ Sa la faapea mai: ‘Le Alii e, ia faapupula o ma mata.’ Ona paʻi lea o Iesu i o la mata ma la fepulafi loa! Pe e te iloa ai se ā na fai ai e Iesu na vavega uma? Auā e alofa o ia i tagata ma manao e faatuatua atu tagata iā te ia. Ua tatou mautinoa foi afai e pule o ia o se Tupu o le a le toe maʻi se tasi i le lalolagi.