NA malolo Iesu i se vaieli i Samaria. Na o ona soo i le aai e faatau mai ni mea ai. O le fafine o loo tautala atu i ai Iesu sa sau e asu vai. Na ia fai atu iā te ia: ‘Aumai sina vai sei ou inu.’

Na tei le fafine. Pe e te iloa ai se ā? Ona o Iesu o se Iutaia, ae o ia o le Samaria. O le toatele o Iutaia e le fiafia i Samaria. E le tautatala foi i a i latou! A e alofa Iesu i ituaiga uma o tagata. Ona ia faapea atu lea: ‘Afai e te iloaina le na fesili atu iā te oe mo sina vai, se manū ua e fesili iā te ia, ma na te avatua mo oe le vai o le ola.’

‘Alii e,’ o le tala lea a le fafine, ‘e maulalo tele le vaieli, a e leai foi sau pakete. O fea o le a e aumaia ai lea vai mo le ola?’

‘Afai e te inuina vai mai lenei vaieli e te toe fia inu foi,’ o le faamatalaga lea a Iesu. ‘Ae o le vai ou te avatua e mafai ona faaolaina ai le tagata e faavavau.’

‘Alii e,’ o le tala lea a le fafine, ‘aumaia i a te au lena vai! Ona ou le toe fia inu ai lea. O le a ou le toe sau ai i inei e asu vai.’

Ua manatu le fafine o loo tautala Iesu i vai moni. Ae o loo ia talanoa i le upu moni e uiga i le Atua ma lona malo. O lenei upu moni e pei o se vai faaola. E mafai ona avatua i le tagata le ola e faavavau.

Ona fai atu lea o Iesu i le fafine: ‘Alu e valaau i lau tane ona e toe sau ai lea.’

‘E leai sau tane,’ o lana tali lea.

‘Ua saʻo lau tali,’ o le upu lea a Iesu. ‘Ae sa i ai au tane e toalima, a o le tamaloa o loo lua nonofo nei e le o sau tane.’

Ua ofo le fafine, auā e saʻo uma na mea. Na faapefea ona iloa e Iesu? Ioe, talu ai ona o Iesu o le na folafolaina e auina mai e le Atua, ma na tuuina atu i ai e le Atua na faamatalaga. Ma o le taimi tonu lea ua foi mai ai soo o Iesu, ma ua tetei i latou o loo tautala atu o ia i le fafine Samaria.

Ua tatou aʻoaʻoina ai e agalelei Iesu i tagata uma o soo se ituaiga. E tatau foi ona faapena i tatou. E le tatau ona tatou manatu e leaga isi tagata ona e o mai i isi ituaiga. E manao Iesu ia iloa e tagata uma le upu moni e taʻitaʻi atu ai i le ola e faavavau. Ma o i tatou foi e tatau ona mananao e fesoasoani i tagata ia aʻoaʻoina le upu moni.