VAAI i a Iesu lena. O loo ia aʻoaʻoina na tagata uma i le mauga i Kalilaia. O ona soo o loo nonofo latalata atu iā te ia. Ua ia filifilia le toa 12 e avea ma aposetolo. O le au aposetolo o soo faapitoa o Iesu. Pe e te iloa o latou igoa?

O Simona Peteru ma lona uso o Aneterea. Ia o Iakopo ma Ioane, o le au uso foi. O le isi foi aposetolo e igoa i a Iakopo, ma le isi e igoa i a Simona. E toalua aposetolo e igoa i a Iuta. O le isi Iuta e faaigoa foi i a Tataio. O Filipo ma Natanielu (e igoa foi i a Patolomaio), ia ma Mataio ma Toma.

Ina ua mavae lona foi mai i Samaria, ona amata lea e Iesu ona talaʻi mo le taimi muamua: ‘Ua latalata le malo o le lagi.’ Pe e te iloa o le ā le malo? O le pulega moni lava lea a le Atua. O Iesu lona tupu. O le a pule mai ia mai le lagi ma aumaia le filemu i le lalolagi. O le lalolagi atoa o le a faia e le malo o le Atua ma parataiso matagofie.

O loo i inei Iesu e aʻoaʻo tagata e uiga i le malo. ‘A outou tatalo ia faapenei,’ o lana upu lea. ‘Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi e pei ona faia i le lagi.’ O le toatele o tagata latou te taʻua lea o le ‘Tatalo a le Alii.’ O isi latou te taʻua lea o le ‘Lo matou Tamā.’ Pe e mafai ona e faia le tatalo atoa?

O loo aʻoaʻoina foi e Iesu tagata pe faapefea ona latou feagai ma isi. ‘Ia e faia i isi e pei lava ona e manao ia latou faia iā te oe,’ o lana tala lea. Pe e te le manao ea e agalelei mai isi iā te oe? O loo faapea mai Iesu ia tatou agalelei i isi. Pe e le o se mea manaia i le lalolagi parataiso pe afai e faia e tagata uma lenei mea?