VAAI atu i le mea mataʻutia ua tupu! Ua fasiotia Iesu. Ua latou tuuina o ia i se laau. Ua tutuʻi fao i ona lima ma ona vae. Aiseā e manao ai se tagata na te faia se mea faapena i a Iesu?

Talu ai ona e i ai isi tagata e inoino i a Iesu. Pe e te iloa o ai i latou? O le isi o le agelu amioleaga o Satani le Tiapolo. O ia lea na mafua ai ona le usitai Atamu ma Eva i a Ieova. Ma o Satani foi na mafua ai ona faia e fili o Iesu lenei solitulafono mataʻutia.

A o lei tutuʻiina Iesu i lenei laau, ua fai e ona fili ni sauaga iā te ia. Manatua le auala na latou o ai i le togalaau i Ketesemane ma ave Iesu? O ai na fili? Ioe, o le au taʻitaʻi lotu. Ia, sei tatou vaai po o le a le isi mea o sosoo nei.

Ina ua aveina Iesu e taʻitaʻi lotu, na sosola ese ona aposetolo. Ua latou tuua na o Iesu auā ua fefefe. Ae o le aposetolo o Ioane ma Peteru e lei o mamao i laua. Sa la mulimuli e fia iloa pe o le a le mea o le a oo i a Iesu.

Ona aveina lea e le au ositaulaga Iesu i a Ana, o le sa avea ma ositaulaga sili. E lei nonofo umi le motu o tagata i ina. Ona latou toe aveina lea o Iesu i le fale o Kaiafa, o le ua avea nei ma ositaulaga sili. E toatele taʻitaʻi lotu ua faapotopoto i lona fale.

I ina i le fale o Kaiafa ua fai ai se faamasinoga. Ua aumaia tagata ina ia molimau pepelo i a Iesu. Ona faapea mai lea o le au taʻitaʻi lotu uma lava: ‘Ua tatau ona fasiotia Iesu.’ Ona latou feanu ai lea i ona mata, ma fetui iā te ia.

A o tutupu na mea, sa i ai Peteru i fafo o le pa. O se po malulu ma na faia ai e tagata se afi. A o faamafanafana i latou i tala ane o le afi, ona tilotilo atu ai lea o se auauna teine i a Peteru ma fai atu: ‘O le tagata lenei sa i ai faatasi ma Iesu.’

‘Leai, ou te lei i ai!’ o le tali lea a Peteru.

E faatolu ona fai atu tagata i a Peteru sa i ai o ia ma Iesu. Ae o taimi uma e faafiti ai o ia. O le lona tolu o faafitiga a Peteru na faliu ai Iesu ma vaai atu iā te ia. Na faanoanoa Peteru ina ua pepelo, ma o lea na ia alu ese ai ma tagi.

I le oso aʻe o le la i le Aso Faraile, na aveina ai e le au ositaulaga Iesu i lo latou nofoaga tele e faatasitasi ai, le Maota o le au taupulega. I lea na latou talanoaina le mea o le a fai iā te ia. Na latou avatua o ia i a Ponotio Pilato le pule o le itumalo Iutaia.

‘O se tamaloa leaga lenei,’ o upu ia a le au ositaulaga i a Pilato. ‘Ua tatau ona fasiotia o ia.’ Ina ua uma ona fesiligia Iesu, ona faapea mai lea o Pilato: ‘Ou te le iloaina se mea sese ua ia faia.’ Ona auina atu lea e Pilato Iesu i a Herota Anetipa. O Herota o le pule i Kalilaia, ae ua nofo nei i Ierusalema. Ua le iloa foi e Herota se mea sese i a Iesu, ona toe auina atu lea o ia i a Pilato.

Na manao Pilato e tuu atu Iesu e alu. Ae na mananao fili o Iesu i se isi pagota e tatala. O se tamaloa gaoi o Parapa. Ua tusa nei o le aoauli ua aumaia ai e Pilato Iesu i fafo. Ona ia faapea atu lea i tagata: ‘Vaai! O lo outou Tupu!’ Ae na alalaga atu ositaulaga sili: ‘Ave ese iā te ia! Fasioti iā te ia! Fasioti iā te ia!’ Ona faasaolotoina lea e Pilato Parapa, a e ave Iesu e fasioti.

I le afiafi o le Aso Faraile na tuʻituʻi ai Iesu i le laau. E te le iloaina atu i laua i le ata, ae i itu taitasi o Iesu ua fasiotia ai foi ni pagota i ni laau. A o lei oo ina oti Iesu, na faapea mai ai le isi o pagota iā te ia: ‘Ia e manatua mai au pe a e oo i lou malo.’ Ma na tali atu Iesu: ‘Ou te tautino atu iā te oe, o le a e i ai faatasi ma au i le Parataiso.’

Pe e le o se folafolaga manaia ea lena? O le ā le parataiso o loo taʻua e Iesu? O fea sa i ai le parataiso lea na faia e le Atua i le amataga? Ioe, i le lalolagi. Ma pe a pule Iesu o se tupu i le lagi, o le a ia toe faaolaina mai lenei tamaloa i le Parataiso fou i le lalolagi. Pe tatou te le fiafia i lena mea?