VAAI i le lupe o loo alu ifo i le ulu o le tamaloa. O ia o Iesu. E tusa ua 30 nei ona tausaga. Ma o Ioane lena la te faatasi. Ua uma ona tatou iloa se mea tau i a ia. Pe e te manatua ina ua asiasi Maria i a Elisapeta, sa osooso le pepe i totonu o Elisapeta i le fiafia? O Ioane lena a o lei fanau mai. Ae o le ā o loo faia e Iesu ma Ioane?

Faatoa uma lava ona faatofu e Ioane Iesu i vai o le Vaitafe o Ioritana. O le auala lena e papatisoina ai se tagata. Muamua, e lolō i lalo o le vai, ma toe aumai i luga. Talu ai ai sa fai e Ioane lea mea i tagata, ua taʻua ai o ia o Ioane le Papatiso. Ae ai se ā ua papatiso ai e Ioane Iesu?

Na faia e Ioane ona sa alu atu Iesu ma fai atu ia papatisoina o ia. E papatisoina e Ioane tagata e faaalia ua salamo mai mea leaga sa latou faia. Ae pe na faia e Iesu se mea leaga e tatau ai ona ia salamo? Leai, auā o ia o le Alo o le Atua mai le lagi o lea na ia fai ai i a Ioane e papatiso o ia mo se isi mafuaaga. Sei o tatou vaai po o le a lea mafuaaga.

A o lei sau Iesu i inei i a Ioane sa avea o ia o se kamuta. O le kamuta o se tagata e faia mea mai laupapa e pei o fale ma nofoa ma laulau. O Iosefa foi o se kamuta, ma na ia aʻoaʻoina Iesu ia avea ma kamuta. A e lei auina mai e Ieova lona Alo i le lalolagi e avea ma kamuta. Sa i ai se galuega faapito mo ia e fai, ma ua oo mai le taimi mo Iesu e amata ai. Ina ia faaalia ua sau nei o ia e fai le finagalo o lona tamā, o lea na fai atu ai Iesu i a Ioane e papatiso o ia. Pe na fiafia le Atua i lena mea?

Ioe, sa fiafia o ia, auā, ina ua alu aʻe Iesu nai le vai, sa faapea mai se leo mai le lagi: ‘O loʻu Atalii pele lena, lē ua ou fiafia i ai.’ E le gata i lena, e foliga mai na avanoa le lagi ma sau i lalo lena lupe i a Iesu. A e le o se lupe moni. O le agaga paia o le Atua.

Ua tele ni mea ua mafaufau i ai Iesu, ona alu lea i se nofoaga tuufua mo aso e 40. Ona faaosooso faatolu ai lea o ia e Satani e fai se mea faasaga i le tulafono a le Atua. A e lei faia e Iesu.

Ina ua uma, sa toe foi Iesu, ma fetaui ai o ia ma isi tamaloloa na avea ma ona soo. O Aneterea, Peteru (e igoa foi i a Simona), Filipo, ma Natanielu (e igoa foi i a Patolomaio). Na o atu Iesu ma na soo fou i le itumalo o Kalilaia. O i ina na latou malolo ai i le nuu o Natanielu o Kana. O i ina na alu ai Iesu i se faigaai o se faaipoipoga, ma fai ai lana vavega muamua. Pe e te iloa o le ā? Na ia faaliliuina vai e fai ma uaina.