PE O E iloa le fetu pupula o loo faasino atu i ai se tasi o na tamaloloa? Ina ua latou tuua Ierusalema, ona aliali mai lea o le fetu. O nei tamaloloa e o mai Sasae, ma latou te suesueina fetu. Ua latou talitonu o lenei fetu fou o loo taʻitaʻiina atu i latou i se tasi e tāua.

Ina ua latou taunuu i Ierusalema, ona latou fesili lea: ‘O fea le tama o le a fai ma tupu o Iutaia?’ O “Iutaia” o le isi igoa mo Isaraelu. ‘Na matou vaaia le fetu a le tama a o matou i Sasae,’ o le tala lea a tamaloloa, ‘ma ua matou o mai e tapuai iā te ia.’

Ina ua faalogo i ai Herota, le tupu o Ierusalema, sa le fiafia o ia. Na ia le manao e avea e se isi tupu lona tulaga. Na ia valaauina faitaulaga sili ma fesili atu: ‘O fea o le a fanau ai le tupu folafolaina?’ Na latou tali atu: ‘Fai mai le Tusi Paia o Peteleema.’

Ona fai atu lea o Herota i tamaloloa mai Sasae: ‘O e saili le tama itiiti. Afai e maua ona tou taʻu mai lea i a te au. Ou te fia tapuai foi iā te ia.’ Ae, o le mea moni, na manao Herota e fasioti iā te ia!

Ona muamua lea o le fetu i luma o tamaloloa agai i Peteleema, ma tu tonu i le mea o i ai le tama itiiti. Ina ua o tamaloloa i le fale, sa latou iloa ai Maria ma Iesu laitiiti. Na latou aumaia ni mea alofa mo Iesu. Ona lapataia lea e Ieova nei tamaloloa i se miti e aua neʻi toe foi atu i a Herota. Ona latou foi atu lea i lo latou atunuu i se isi auala.

Ina ua iloa e Herota ua toe foi tamaloloa mai Sasae, ona ita lea o ia. Ona ia tuu atu lea o se poloaiga e fasiotia tama uma e tai lua tausaga le matutua i Ierusalema. Ae na lapatai atu Ieova i a Iosefa a o muamua i se miti, ma o loa Iosefa ma lona aiga i Aikupito. Mulimuli ane, ina ua iloa e Iosefa ua oti Herota, ona toe o ai lea ma Maria ma Iesu i lona aiga i Nasareta. O i ina na ola aʻe ai Iesu.

O ai e te manatu na faasusuluina lena fetu? Manatua, na o tamaloloa i Ierusalema ina ua uma ona vaai i le fetu. Na manao Satani le Tiapolo e fasioti le Alo o le Atua, ma na ia iloa o Herota le Tupu o Ierusalema o le a taumafai e fasioti iā te ia. O lea la o Satani lava ia na faasusuluina lena fetu.