I le aso lona tolu talu ona mavae lona maliu, sa toe faatuina mai ai Iesu. I lena aso na ia faaali faalima ai i ona soo i taimi eseese. Na faaauau ona faaali atu Iesu i a i latou mo le 40 aso. Ma a o vaavaai atu ni isi o ona soo, sa afio aʻe Iesu i le lagi. Sefulu aso mulimuli ane ai ona liligi ifo lea e le Atua le agaga paia i soo o Iesu o loo faatalitali i Ierusalema.

Mulimuli ane, ona lafoina lea e fili o le Atua le au aposetolo i le fale puipui, ae na faasaolotoina i latou e se agelu. Na fetogia e tagata tetee le soo o Setefano i maa ia oti. Ae ua tatou aʻoaʻoina pe na faapefea ona filifilia e Iesu se tasi o ia tagata tetee ia fai ma ana auauna faapitoa, ma na avea o ia o le aposetolo o Paulo. Ina ua tolu ma le afa tausaga talu ona mavae le maliu o Iesu, na auina atu ai e le Atua le aposetolo o Peteru e talaʻi i a Konelio e le o se Iutaia ma lona au aiga.

Pe tusa e 13 tausaga mulimuli ane ai ona amata lea o le malaga faatalaʻi muamua a Paulo. I lana malaga lona lua sa faatasi atu ai Timoteo i a Paulo. Ua tatou aʻoaʻoina ai pe na faapefea e Paulo ma ana aumea ona tele ni taimi uiga ese i le auaunaga i le Atua. I le iʻuga na tuuina atu ai Paulo i le fale puipui i Roma. Lua tausaga mulimuli ane ai sa toe faasaoloto mai o ia, ae na toe tuuina atu foi o ia i le fale puipui ma fasiotia ai. O mea o tutupu i le VAEGA 7 na tutupu i se vaitaimi e tusa ma le 32 tausaga.