VAAI i le agelu lena e taofia le faitotoa ua matala o le fale puipui. O loo ia faasaolotoina mai aposetolo o Iesu. Sei o tatou sueina le pogai ua faafalepuipuiina ai i latou.

Faatoa mavae sina taimi puupuu talu ona liligiina ifo le agaga paia i luga o soo o Iesu. Ma o le mea lenei na tupu: O loo o atu Peteru ma Ioane i le malumalu i Ierusalema i le isi afiafi. I tafatafa o le faitotoa, sa i ai se tamaloa na pipili i lona olaga atoa. E ave o ia e tagata i ina i aso uma ina ia aisi ai mo ni tupe mai e o loo o atu i le malumalu. Ina ua ia iloa atu Peteru ma Ioane, ona ia aisi lea i ai. O le ā le mea o le a faia nei e aposetolo?

Sa la tutu ma tilotilo atu i lenei tamaloa mativa. ‘E leai saʻu tupe,’ o le tala lea a Peteru; ‘ae o le a ou avatua iā te oe le mea o loo i a te au. I le suafa o Iesu, tu ia i luga ma savali!’ Ona tago atu lea o Peteru i lona lima ona ia oso ai lea i luga ma savali. Ina ua vaai tagata i lenei mea, ona latou ofo lea ma fiafia i lenei vavega uiga ese.

‘O le mana mai le Atua, o le na faatuina Iesu mai le oti, ua ma faia ai lenei vavega,’ o le tala lea a Peteru. A o talatalanoa o ia ma Ioane, ona o mai lea o isi taʻitaʻi lotu. Ua feita i latou auā o loo taʻu atu e Peteru ma Ioane i tagata le toe faatuina mai o Iesu. O lea na latou pueina ai i laua ma tuu i le fale puipui.

I le aso na sosoo ai na fai ai se fono tele a le au taʻitaʻi lotu. Ona aumaia lea o Peteru ma Ioane ma le tamaloa na la faamaloloina. ‘O le ā le mana na lua faia ai lenei vavega?’ o le fesili lea a le au failotu.

Na faapea atu Peteru o le mana mai le Atua, o le na toe faatuina mai Iesu. Ua le iloa e le au ositaulaga se mea e fai, auā e le mafai ona latou teteeina lenei vavega moni ua tupu. Ona latou faasaina lea o le au aposetolo e aua neʻi toe talanoa i a Iesu, ma tuu atu i latou e o.

A o gasolo pea aso na talaʻia pea e aposetolo Iesu ma faamalolo e mamaʻi. Na salalau tala i nei vavega. Ma e oo foi i tagata e toatele mai le aai i autafa o Ierusalema ua sii mai a latou maʻi i aposetolo ina ia faamaloloina. Na loto leaga ai le au taʻitaʻi lotu i lenei mea, ma na latou tuuina loa aposetolo i le fale puipui. A e lei umi se taimi na nonofo ai i ina.

I le po, na tatala ai e le agelu a le Atua le fale puipui, e pei ona e vaai atu i ai. Na fai atu le agelu: ‘Ia o ma tutu i le malumalu, ma talaʻi atu pea i tagata.’ I le isi taeao, ina ua aauina atu e taʻitaʻi lotu tagata e o e aumai le au aposetolo, ua leai i latou. Mulimuli ane, na maua i latou o loo aʻoaʻo i le malumalu ma avatu loa i latou i le fale o le au taupulega.

‘Na matou faatonuina malosi outou e aua neʻi toe aʻoaʻo i le suafa o Iesu,’ o upu ia a le au taʻitaʻi lotu. ‘Ae ua tou faatumulia Ierusalema i a outou aʻoaʻoga.’ Ona tali atu lea o aposetolo: ‘E tatau ona matou usiusitai i le Atua o le pule na i lo tagata.’ Ona latou faaauau pea lea ona aʻoaʻo le “tala lelei.” Pe e le tatau ea ona tatou mulimuli i nei faaʻoaʻoga lelei?