O LE tamaloa o loo tootuli o Setefano. O ia o se soo faamaoni o Iesu. Ae vaai atu i le mea ua tupu nei iā te ia! O nei tamaloloa o loo fetogi ni maa lapopoa iā te ia. Aiseā ua latou inoino ai i a Setefano ua latou faia ai lenei mea leaga? Sei o tatou vaai i ai.

Na fesoasoani le Atua i a Setefano i le faia o vavega uiga ese. E lei mananao i ai nei tamaloloa, ma na latou faia se finauga ma ia ona o lona aʻoaʻo atu o tagata i le upu moni. Ae na tuuina atu e le Atua i a Setefano le poto, ma ua ia faaalia i nei tamaloloa ua latou aʻoaʻoina mataupu sese. Ona feita ai lea o i latou. Na latou puea o ia ma aumai ni tagata e fai ni pepelo e uiga iā te ia.

Na fesili le ositaulaga sili i a Setefano: ‘Pe e saʻo ea nei mea?’ Na tali atu Setefano i lona faia o se lauga lelei mai le Tusi Paia. I le faaiʻuga, na ia taʻua le leaga o tagata na inoino i perofeta a Ieova anamua. Ona ia fai atu lea: ‘Ua pei lava outou o nei tagata. Ua outou fasiotia le auauna a le Atua o Iesu, ma ua outou le usiusitai i ana tulafono.’

Na avea lea ma mea na atili feita ai le au taʻitaʻi lotu ma ū o latou nifo! Ae na ea aʻe le ulu o Setefano, ma faapea atu: ‘Vaai! Ua ou iloa atu Iesu o loo tu i le itu taumatau o le Atua i le lagi.’ I le taimi lea na tapuni ai taliga o nei tagata ma latou feoso mai i a Setefano. Na latou pue ma toso o ia i tua o le aai.

O i ina na latou aveeseina ai o latou ofu talaloa ma avatu i a Saulo na te vaavaaia. Pe o e iloaina atu Saulo? Ona amata lea ona fetogi e isi tamaloloa Setefano. Na tatalo Setefano i le Atua: ‘Ieova e, aua e te faasalaina i latou ona o lenei mea leaga.’ Ua ia iloa o isi o i latou ia ua faavaleaina e le au taʻitaʻi lotu. Ona oti ai lea o Setefano.

Afai e fai e se tasi se mea leaga iā te oe, pe o le a e taui ma sui i ai, po o lou fai atu foi i le Atua ia faatiga i a i latou? E lei faapena Setefano ma Iesu. Na la agalelei i e na le alolofa i a i laua. Sei o tatou faaaʻoaʻo i a i laua.