OI! AUE! o le a le mea o tupu i ina? Pe o manua tigaina le tama lena e i le palapala? Vaai! O Paulo lena e sau mai fafo o le fale. Pe e te iloa atu foi ma Timoteo i ina? Pe na paū le tama mai luga o le faamalama?

Ioe, o le mea tonu lena na tupu. Na lauga Paulo i soo i ina i Teroa. Na ia iloa lelei o le a ia le toe vaai i a i latou mo se taimi umi auā o le a alu o ia i se vaa i le aso e sosoo ai. O lea na talanoa ai pea o ia seia oo i le vaeluaga o le po.

O le tama lenei e igoa i a Eutiko sa nofo i le faamalama ma moe ai. Na pau o ia mai le faamalama o le fogafale lona tolu! Ua e iloa nei la le mafuaaga ua foliga popole ai tagata. Ina ua sii e tamaloloa le tama, sa fefefe i latou. Ioe, ua oti o ia!

Ina ua vaai atu Paulo ua oti le tama, ona faō lea i ona luga ma fusi iā te ia. Aua ia faapea atu lea: ‘Aua le popole. O loo lelei pea o ia!’ Sa faapea lava! O se vavega! Ua toe faaola mai o ia e Paulo! Sa fiafia uma tagata.

Ona toe o lea o i latou i le falealuga ma fai se latou ‘aiga. Na talanoa pea Paulo seia oo ina malamalama. Ae ua e mautinoa nei e le toe moe Eutiko! Ona o atu lea o Paulo, Timoteo ma isi sa malaga faatasi ma i latou i le vaa. Pe e te iloa o fea o loo o atu i ai?

Faatoa uma lava le malaga lona tolu a Paulo, ma o loo agaʻi atu nei o ia i lona fale. I lenei malaga na nofo ai Paulo i le aai o Efeso mo le tolu tausaga. Ma o se malaga umi la lenei i lo lana malaga lona lua.

Ina ua tuua e ia Teroa, sa tu le vaa i Meleto mo sina taimi puupuu. Talu ai o Efeso e fai sina mamao ese, na aami ai e Paulo le au toeaiina o le faapotopotoga e o mai i Meleto ina ia talanoa mulimuli o ia i a i latou. Mavae lena, ina ua oo i le taimi e alu ai le vaa, paga le faanoanoa tele o i latou e vaai atu ua alu Paulo!

Mulimuli lava na toe oo mai le vaa i Kaisareia. A o nofo Paulo i le fale o le soo o Filipo, na lapatai atu le perofeta o Akapo i a Paulo. Na ia faapea atu o le a avea Paulo ma pagota pe afai o le a alu o ia i Ierusalema. Ma na tupu lena mea. Mavae tausaga e lua o i ai o ia i le fale puipui i Kaisareia, ona auina atu lea o Paulo i Roma mo lona faamasinoga e le pule o Roma o Kaisara. Sei o tatou vaai po o le a na tupu i le malaga i Roma.