O LE tama talavou lena o Timoteo o loo e vaai i ai o faatasi ma le aposetolo o Paulo. E nofo Timoteo ma lona aiga i Lusa. O le igoa o lona tinā o Eunike a o le tinā o lona tinā o Loi.

O le faatolu lenei ona asiasi atu Paulo i Lusa. E tusa o se tausaga ua mavae talu ona o Paulo ma Panapa i ina i se la talaʻiga muamua. Ae o lenei ua toe foi atu i ai Paulo ma Sila.

Pe e te iloa le tala a Paulo o loo fai i a Timoteo? ‘Pe e te fia sau i a i maʻua ma Sila?’ o lana fesili lea. ‘E mafai ona ma faaaogaina lau fesoasoani i le talaʻi atu i tagata i nuu mamao.’

‘Ua lelei,’ o le tali lea a Timoteo, ‘Ou te fia alu.’ Ona tuua lea e Timoteo lona aiga ae o atu ma Paulo ma Sila. A o lei tatou aʻoaʻoina e uiga i la latou malaga, sei o tatou vaai muamua po o a mea na tutupu i a Paulo. Ua tusa e 17 tausaga talu ona faaali atu Iesu iā te ia i le ala i Tamaseko.

Manatua, na alu atu Paulo i Tamaseko e saua i soo o Iesu, ae o lenei ua avea ia ma soo! Mulimuli ane ua fia fasioti e ni fili Paulo talu ai lana aʻoaʻoga e uiga i a Iesu. Ae na fesoasoani le au soo ia faasola o ia. Na latou tuuina o ia i totonu o se ato ma tuutuu ifo o ia i lalo i le pa o le aai.

Mulimuli ane ona alu lea o Paulo e talaʻi i Anetioka. O i ina na taʻua muamua ai lava soo o Iesu o Kerisiano. Ona aauina atu lea o Paulo ma Panapa mai Anetioka i se malaga talai i atunuu mamao lava. O se tasi o aai na ia asiasi atu i ai o Lusa, le nuu o Timoteo.

E tusa nei ua mavae se tausaga ma ua toe foi mai Paulo i Lusa i lana malaga lona lua. Ina ua o Timoteo ma Paulo ma Sila, pe e te iloa o fea na o i ai? Vaai atu i le faafanua, ma sei tatou aʻoaʻoina ni isi o nofoaga.

Muamua, na latou o i Ikonio, lona lua o le aai o Anetioka. Mavae lena ona latou o lea i luga i Teroa, ma Filipi, Tesalonia ma Perea. Pe o e iloa atu Atenai i le faafanua? Na talaʻi Paulo i ina. Ina ua uma lena na latou faaaluina se tausaga ma le afa e talaʻi ai i Korinito. Mulimuli lava, ona latou malaga puupuu lea i Efeso. Ona latou toe foi mai lea i le vaa i Kaisareia, ma malaga atu i Anetioka, i le mea o nofo ai Paulo.

O lea la, na malaga Timoteo i le selau ma selau o maila e fesoasoani i a Paulo e talaʻi le “tala lelei” ma amata faapotopotoga Kerisiano e tele. A e matua, pe o le a avea ea oe ma se auauna faamaoni a le Atua e pei o Timoteo?