O LE aposetolo o Peteru lena e tu mai, ma o isi na o ana uo o loo i ona tua. Ae ai se ā o loo ifo atu ai lena tamaloa i a Peteru? Pe e tatau ea ona ia faia? Pe e te iloa o ai o ia?

O Konelio. O ia o se ofisa o le vaegaau a Roma. E le iloa e Konelio Peteru, ae na taʻuina atu iā te ia e valaaulia mai Peteru i lona fale. Sei o tatou sailia pe na faapefea ona tupu.

O e na muamua mulimuli i a Iesu o Iutaia, ae o Konelio e lē o se Iutaia. E ui i lea e alofa o ia i le Atua, e tatalo i ai, ma na te faia mea lelei mo tagata. O le isi aoauli, na faaali atu ai le agelu a Ieova iā te ia ma faapea atu: ‘Ua fiafia le Atua iā te oe, ma o le a tali mai o ia i au tatalo. Ia aauina atu ni tagata e aami i a Peteru. O loo nofo ia i Iopa i le fale o Simona, e latalata i le sami.’

Ona aauina lea e Konelio ni tagata e sailia Peteru. I le aso na sosoo ai ina ua latalata nei tagata i Iopa, sa i ai Peteru i luga o le fale o Simona. O i ina na faamafaufauina ai e le Atua Peteru ua ia vaaia ai se ie tele ua sau mai le lagi. O loo i ai i le ie ituaiga eseese o mea ola uma. E tusa ai ma le tulafono a le Atua, o mea ola na e le mamā mo mea ai, ae na faapea mai loa le leo: ‘Tu ia i luga, Peteru. Fafasi mate ma ai.’

‘Leai!’ o le tali lea a Peteru. ‘Ou te lei aiina lava se mea e le mamā.’ Ae na toe fai mai le leo i a Peteru: ‘Aua e te toe taʻua mea e le mamā ua faamamāina nei e le Atua.’ E faatolu ona tupu lenei mea. A o mafaufau Peteru po o le ā le uiga o nei mea, ae taunuu atu loa tagata na aauina atu e Konelio ma fesili atu mo Peteru.

Ona alu ifo lea o Peteru i lalo ma faapea atu: ‘O aʻu lea tou te mananao i ai. Aiseā ua tou o mai ai?’ Ina ua faamatala atu e tagata na faaali se agelu i a Konelio ma fai atu na te valaaulia Peteru i lona fale, ona malie lea o Peteru latou te o ma ana uo e asiasi i a Konelio i Kaisareia.

Ua faapotopotoina e Konelio lona au aiga ma ana uo e alofa tele i ai. Ina ua taunuu atu Peteru, ona faafeiloai atu lea o Konelio i ai. Na ia faapaū i lalo ma ifo atu i vae o Peteru, e pei ona e vaai atu i ai. Ae na faapea atu Peteru: ‘Tu i luga; ua na o aʻu o se tagata.’ E faasa e le Tusi Paia le ifo i se tagata ma tapuai atu i ai tau lava o Ieova.

Ona talaʻi lea o Peteru i e uma ua faapotopotoina. ‘Ua ou iloa e talia e le Atua tagata uma o e mananao e auauna atu iā te ia,’ o upu ia a Peteru. A o tautala o ia, ua auina mai e le Atua lona agaga paia, ma na tautatala ai tagata i gagana eseese. Sa ofo tele le au soo Iutaia na o mai ma Peteru, auā ua latou manatu e fiafia le Atua i na o tagata Iutaia. Ua aʻoaʻoina ai i latou e lē silasila le Atua i tagata faapea ua sili se tasi ituaiga i lo se isi ituaiga o tagata. Pe e le o se mea lelei lea mo i tatou e ao ona manatua?