O LE a o loo e vaai atu i ai i ina? Ioe, o se autau o i solofanua papae. Ae ia matau po o fea e o mai ai. O loo taufetuli mai solofanua mai le lagi i ao! Pe e i ai moni ea ni solofanua i le lagi?

E leai, e le o ni solofanua moni na. Auā e le mafai ona taufetuli ni solofanua i ao. Ae o loo tautala le Tusi Paia e uiga i solofanua i le lagi. Pe e te iloaina ai se ā?

Talu ai o solofanua na faaaogaina tele mo taua. O lea, ua taʻua e le Tusi Paia ni tagata o loo tietie i solofanua mai le lagi e faaalia ai o loo i ai se taua a le Atua e tau ai ma tagata i le lalolagi. Pe e te iloa le nofoaga mo lea taua? O Amaketo. E faaumatia ai e lea taua mea leaga uma o i le lalolagi.

O Iesu le Taʻitaʻi o lenei taua i Amaketo. Manatua o Iesu lea ua filifilia e Ieova e fai ma tupu i Lona malo. O le mafuaaga lena o loo pale ai Iesu i se pale tau tupu. Ma o le pelu ua faaalia ai o le a ia faaumatia uma fili o le Atua. Pe tatou te tetei ea pe a faaumatia e le Atua tagata leaga uma?

Toe vaai i le Tala e 10. O le ā o e vaai atu i ai i ina? Ioe, o le Lolo tele na faaumatia ai tagata leaga. O ai na faatupuina lea Lolo? O Ieova le Atua. Ia toe vaai i le Tala e 15. O le ā o tupu i ina? Ua faaumatia Sotoma ma Komoro i le afi na auina mai e Ieova.

Sue i le Tala e 33. Vaai po o le a o loo tupu i kariota ma solofanua tau a Aikupito. O ai na faatupuina le suasami e tafe atu i o latou luga? O Ieova. Na ia faia ina ia puipui ai ona tagata. Vaai i le Tala e 76. E te iloaina ai na oo lava ina tuuina atu e Ieova ona tagata o Isaraelu e faaumatia talu ai lo latou leaga.

O lea la, tatou te le tetei pe a aauina mai e Ieova ana au i le lagi e aumaia se iʻuga i mea leaga uma o i le lalolagi. Mafaufau po o le a moni lava le uiga o lena mea! Sue le itulau ma sei o tatou vaai i ai.