PE E mafai ona e taʻu mai o le a o faitauina e le teine itiiti ma ana uo? Ioe, o le tusi lea e te faitauina—Laʻu Tusi o Tala o Le Tusi Paia. Ma o loo latou faitauina le tala o loo e faitauina—“Faapefea ona Tatou ola e Faavavau.”

Pe e te iloaina mea o loo latou aʻoaʻoina? Muamua, e manaomia ona tatou iloaina Ieova ma lona Alo o Iesu. Ua faapea mai le Tusi Paia: ‘O le ola e faavavau foi lenei. Ia iloa le Atua moni e toatasi, ma le Alo na ia auina mai i le lalolagi, o Iesu Keriso lea.’

E faapefea ona tatou aʻoaʻoina e uiga i a Ieova ma lona Alo o Iesu? O le tasi o auala o le faitau lea o Laʻu Tusi o Tala o Le Tusi Paia ia uma. O loo faamatala ai ni mea se tele e uiga i a Ieova ma Iesu, a ea? Ma mea e tele na la faia ma mea o le a la faia. Ae e manaomia ona tatou faia ni isi mea e sili i le na o le faitau i ai.

Pe o e iloaina atu le isi tusi lena e taatia mai? O le Tusi Paia. Ia ave i se isi na te faitauina atu iā te oe vaega o le Tusi Paia o loo faavae aʻe ai tala o lenei tusi. Ua aumaia e le Tusi Paia faamatalaga atoatoa tatou te manaomia ina ia tatou auauna atu i a Ieova i le auala saʻo ma maua ai le ola e faavavau. O lea la ia fai ma a tatou masani le suesueina o le Tusi Paia e le aunoa.

Ae e le lava le na ona iloa o Ieova le Atua ma Iesu Keriso. E mafai ona tele lo tatou poto e uiga i a i laua ma a la aʻoaʻoga, ae tatou te le mauaina lava le ola e faavavau. Pe e te iloa o le a se isi mea e manaomia?

E manaomia foi lo tatou ola e talafeagai ma mea ua tatou aʻoaʻoina. Pe e te manatua Iuta le Sekara? O ia o se tasi o le toa 12 na filifilia e Iesu e fai ma ona aposetolo. Sa tele le poto sa i a Iuta e uiga i a Ieova ma Iesu. Ae o le ā na tupu iā te ia? Ina ua mavae sina vaitaimi ona ia manao tele ai lea, ma na ia faalataina Iesu i ona fili mo le 30 fasi ario. E le mauaina la e Iuta le ola e faavavau.

Pe e te manatua Kiasi, mai le Tala e 69? Na ia manao e maua ni ofu ma ni tupe e le o ni ana mea. O lea na ia faia ai se pepelo e uiga i nei mea. Ae na faasalaina o ia e Ieova. Ma o le a ia faasalaina foi i tatou pe afai tatou te le usiusitai i ana tulafono.

A e toatele tagata lelei e auauna atu pea i latou i a Ieova ma le faamaoni. Tatou te mananao ia pei o i latou a ea?

O Samuelu o se faaaʻoaʻoga lelei lea tatou te mulimuli ai. Manatua e pei ona tatou iloa i le Tala e 55, e na o le fa i le lima ona tausaga a e amata ona auauna i a Ieova i le fale fetafai. O lea, e tusa lava po o le a lou laitiiti, e le faapea ua le aoga ona e auauna i a Ieova.

O le mea moni, e tatau ona tatou mulimuli i a Iesu Keriso E ui lava o se tama itiiti o ia e pei ona faaalia mai i le Tala e 87, ae sa i ai o ia i le malumalu e talanoa e uiga i lona Tamā o i le lagi. Sei o tatou mulimuli i lana faataʻitaʻiga. Sei o tatou taʻu atu i tagata e uiga i lo tatou Atua matagofie o Ieova ma lona Alo, o Iesu Keriso. Afai tatou te faia nei mea, ona tatou ola ai lea e faavavau i le parataiso fou a le Atua i le lalolagi.