Aotelega o Suiga o Malamalamaga
A o faagasolo tausaga, na aumaia i Le Olomatamata fetuunaʻiga o lo tatou malamalamaga i nisi o vala o valoaga a Esekielu. O loo iai foʻi nisi o suiga o lo tatou malamalamaga i lenei lomiga, Toe Faafoʻisia le Tapuaʻiga Mamā iā Ieova! Pe e mafai ona e taliina fesili o loo mulimuli mai?
O le ā ua faaata mai e foliga e fā o foafoaga agaga?
Malamalamaga sa iai: O foliga taʻitasi e fā o foafoaga agaga po o kerupi, ua faaata mai ai se tasi o uiga autū e fā o Ieova.
Suiga o le malamalamaga: E ui o foliga taʻitasi e fā o foafoaga agaga e faaata mai ai se tasi o uiga autū e fā o Ieova, ae pe a tuufaatasi nei foliga e fā, e mafai ona faaatagia mai ai uiga uma o Ieova. O foliga foʻi e fā, ua tatou iloa ai le matuā silisili ese o le mana ma le mamalu o Ieova.
Māfuaaga o le suiga: I le Tusi Paia, o le numera fā e masani ona faaatagia mai ai le atoatoa o se mea, pe e aofia ai mea uma. O lea, pe a tuufaatasi foliga e fā, e tele atu mea e aofia ai nai lo o uiga autū e fā, o le faavae lea o uiga ofoofogia o Ieova. O nei foliga taʻitasi e patino atu i se meafaiola e faaata mai ai le malualii, malosi, ma le mamana. E lē gata i lea, o nei foafoaga e iai foliga e fā i le faaaliga, o loo i lalo ifo o le nofoālii o Ieova. O lenā vaaiga ua faamatilatila ai o Ieova o Lē e Pule Aoao i mea uma lava.
O ai o loo faaata mai e le tamāloa o loo iai le fagu vaitusi a le failautusi?
Malamalamaga sa iai: O loo faaata mai e le tamāloa o loo iai le fagu vaitusi le vaega totoe o le ʻaufaauuina. O loo faailogaina faafaatusa i le taimi lenei e le ʻaufaauuina muāulu o ē o le a avea ma “motu o tagata e toʻatele,” e ala i le galuega talaʻi ma le faia o isi ma soo.—Faaa. 7:9.
Suiga o le malamalamaga: O le tamāloa o loo iai le fagu vaitusi a le failautusi ua faaata mai ai Iesu Keriso. O le a ia faailogaina le motu o tagata e toʻatele, pe a uma ona ia faamasinoina i latou o ni mamoe a o faagasolo “le puapuaga tele.”—Mata. 24:21.
Māfuaaga o le suiga: Ua tofia e Ieova lona Alo e faia le faamasinoga. (Ioa. 5:22, 23) E tusa ai o le Mataio 25:31-33, o le a faia e Iesu le faamasinoga faaiʻu e iloa ai po o ai e avea ma “mamoe” ae o ai e avea ma “ʻoti.”
Po o faaata mai e le ʻauso talitane o Aola ma Aolipa, lotu ua faapea mai o Kerisiano aemaise ona vaega autū e lua o le Katoliko ma le Porotesano?
Malamalamaga sa iai: O Aola (Samaria le laumua o Isaraelu) o le uso matua, ua faaata mai ai le lotu Katoliko, a o Aolipa (Ierusalema le laumua o Iuta) o le uso laʻitiiti, ua faaata mai ai le lotu Porotesano.
Suiga o le malamalamaga: O lenei ʻauso talitane, e lē o faaata faavaloaga mai ai se vaega o lotu ua faapea mai o Kerisiano. Peitaʻi, o lenei ʻauso ua tatou iloa ai faalogona o Ieova i tagata na faamaoni iā te ia, ae ua faia le mulilua faaleagaga. O ona faalogona foʻi na i lotu sesē uma.
Māfuaaga o le suiga: E leai se faavae faale-Tusi Paia e faapea atu ai, o Aola ma Aolipa o ni faaataga faavaloaga o lotu ua faapea mai o Kerisiano. Na avea muamua Isaraelu ma Iuta e pei o ni avā faamaoni a Ieova, ae e leʻi iai lava se faiā faapena a Ieova ma lotu ua faapea mai o Kerisiano. E lē gata i lea, o le faatusatusaga o tagata lē faamaoni o le Atua i fafine talitane i le Esekielu mataupu 16 ma le 23, ua faailoa mai ai se faamoemoe o le toe faafoʻisiaga. Peitaʻi, e leai se faamoemoe faapena o lotu ua faapea mai o Kerisiano. O na lotu o se vaega o Papelonia le Aai Tele.
Pe na faaata mai e le aai lē faamaoni o Ierusalema lotu ua faapea mai o Kerisiano?
Malamalamaga sa iai: Ua faaata mai e le aai lē faamaoni o Ierusalema lotu ua faapea mai o Kerisiano. O lea, o le faaumatiaga o Ierusalema o loo faaata faavaloaga mai ai foʻi le mea o le a oo i na lotu.
Suiga o le malamalamaga: O mea na tutupu i le aai lē faamaoni o Ierusalema, e pei o ifoga tupua ma le sasao faaafi o faiga faapiʻopiʻo, ua faamanatu mai ai iā i tatou mea o loo tutupu i lotu ua faapea mai o Kerisiano. Ae e tatou te lē o toe faapea atu o loo faaata mai e Ierusalema lotu ua faapea mai o Kerisiano.
Māfuaaga o le suiga: E leai se faavae manino faale-Tusi Paia e faapea atu ai o loo faaata mai e Ierusalema lē faamaoni lotu ua faapea mai o Kerisiano. Sa faia muamua e Ierusalema anamua le tapuaʻiga mamā, ae e leʻi faia faapena e lotu ua faapea mai o Kerisiano. Na iai le taimi na faamagaloina ai e Ieova Ierusalema, ae e leai se faamoemoe faapena mo na lotu.
Na faapefea ona faataunuuina le faaaliga o le vanu o loo iai ivi mamago?
Malamalamaga sa iai: I le 1918, na saisaitia ai i Papelonia le Aai Tele Kerisiano faauuina na sauāina, ma na toetoe a feoti ai i se tulaga faaleagaga. Na faaiʻuina i le 1919 lenā vaitaimi puupuu na saisaitia ai, ina ua toe faaolaola e Ieova la latou galuega o ni tagata talaʻi o le Malo.
Suiga o le malamalamaga: Na umi se taimi na pei ai ua feoti ona o le saisaitia faaleagaga, ma na amata a o leʻi taitai oo i le 1918. Na amata i le senituri lona lua T.A. ma faaiʻuina i le 1919 T.A., ma e taitutusa ma le talafaatusa a Iesu i se vaitaimi umi na ola faatasi ai le saito ma vao leaga.
Māfuaaga o le suiga: Na umi le taimi na saisaitia ai Isaraelu anamua, na amata mai i le 740 T.L.M. seʻia oo i le 537 T.L.M. O le faamatalaina i le valoaga a Esekielu o le “mamago” ma le “matuā mamago” o ivi, e faaalia ai ua leva ona feoti i latou na faaata mai e na ivi. Ua faamatalaina foʻi e umi se taimi e faasolosolo ai ona toe faafoʻisia le ola i nei ivi.
O le ā le uiga o le tuufaatasia o laau e lua?
Malamalamaga sa iai: Na toe autasi sui faamaoni o le vaega totoe o Kerisiano faauuina i le 1919, ina ua mavae se vaitaimi puupuu na lē autasi ai a o faagasolo le Taua Muamua a le Lalolagi.
Suiga o le malamalamaga: Na faamatilatila i le valoaga o le a gaoioi Ieova ina ia autasia ona tagata tapuaʻi. Talu mai le 1919, na faasolosolo ona aufaatasi atu i le vaega totoe o Kerisiano faauuina le toʻatele o ē e faamoemoe e ola i le lalolagi. O loo auauna iā Ieova nei vaega e lua o se nuu e tasi.
Māfuaaga o le suiga: E lē o faamatalaina i le valoaga se laau na vaeluaina muamua, ona toe tuufaatasi lea e avea ma laau e tasi. O lea, e lē o faamatalaina i le valoaga se vaega na vaeluaina muamua, ona toe autasia lea mulimuli ane. Nai lo o lea, o loo faamatalaina ai le autasia o ni vaega eseese se lua.
O ai Koku mai i Makoku?
Malamalamaga sa iai: O Koku mai i Makoku o se taʻu faavaloaga mo Satani ina ua tuliesea mai i le lagi.
Suiga o le malamalamaga: O Koku mai i Makoku e faasino atu i le tuufaatasiga o faigāmalo o le lalolagi, lea o le a osofaʻia tagata o le tapuaʻiga mamā a o faagasolo le puapuaga tele.
Māfuaaga o le suiga: O loo faamatalaina i le valoaga e tuuina atu Koku e fai ma meaʻai a manufelelei ma e avatu mo ia se fanuatanu i le lalolagi, ua faaalia ai o Koku e lē o se foafoaga agaga. E lē gata i lea, o le osofaʻiga a Koku e tutusa ma le osofaʻiga a malo o le lalolagi i tagata o le Atua, lea o loo faamatalaina i le tusi o Tanielu ma le Faaaliga.—Tani. 11:40, 44, 45; Faaa. 17:14; 19:19.
Pe na vaaia e Esekielu le malumalu sili faaleagaga lea na faamatala mulimuli ane e le aposetolo o Paulo?
Malamalamaga sa iai: E tutusa le malumalu i le faaaliga a Esekielu ma le malumalu faaleagaga lea na faamatala e le aposetolo o Paulo.
Suiga o le malamalamaga: E leʻi vaaia e Esekielu le malumalu faaleagaga lea na amata i le 29 T.A., ae na ia vaaia se faaataga o le auala e toe faafoʻisia ai le tapuaʻiga mamā e tusa ai o le Tulafono a Mose, pe a mavae le faaaunuua o tagata o le Atua. O faamatalaga a Paulo e faatatau i le malumalu faaleagaga, na taulaʻi atu i le galuega na faataunuuina e Iesu le Ositaulaga Silisili, mai i le 29 seʻia oo i le 33 T.A. E leʻi taʻua i le faaaliga i le malumalu na vaaia e Esekielu le ositaulaga sili, ae na taulaʻi atu i le toe faafoʻisiaga faaleagaga lea na amata i le 1919 T.A. O lea, e tatou te lē faia ni faatusatusaga ma faaataga o vala taʻitasi ma fua uma o le malumalu na vaaia e Esekielu. Nai lo o lea, e tatou te taulaʻi atu i lesona e tatou te aʻoaʻoina mai i le faaaliga a Esekielu e faatatau i tapulaa a Ieova mo le tapuaʻiga mamā.
Māfuaaga o le suiga: E iai vala tāua e eseese ai le malumalu i le faaaliga a Esekielu ma le malumalu faaleagaga. O se faaaʻoaʻoga, e tele taulaga i manu na faia i le malumalu na vaaia e Esekielu, ae e na o le tasi le taulaga na faia i le malumalu faaleagaga, ma “e na o le faatasi lava ona faia.” (Epe. 9:11, 12) I senituri a o leʻi afio mai Keriso, e leʻi faailoaina mai e Ieova i lenā taimi upu moni loloto e faatatau i le malumalu faaleagaga.
