1-3. O le ā na finagalo Ieova e vaai i ai Esekielu i le malumalu i Ierusalema, ma aiseā? (Tagaʻi i le ata ma faamatalaga i le Vaega 2.)

 NA ILOA lelei e le perofeta o Esekielu le Tulafono faa-Mose, auā o ia o le atalii o se ositaulaga. Na masani o ia i le malumalu i Ierusalema, ma le tapuaʻiga mamā iā Ieova na tatau ona faia i inā. (Eseki. 1:3; Mala. 2:7) O mea na tutupu i le 612 T.L.M. i le malumalu o Ieova, o le a faateʻia ai so o se tagata Iutaia faamaoni, e aofia ai ma Esekielu.

² Na finagalo Ieova ina ia vaai Esekielu i mea o loo faia i le malumalu, ma faamatala atu mea na ia vaaia i “toeaina o Iuta” o loo iai i lona fale, o ē na ave faapagota ma ia. (Faitau le Esekielu 8:1-4; Eseki. 11:24, 25; 20:1-3) E ala i le agaga paia, na aveina ai e Ieova Esekielu (i se faaaliga) mai i lona fale i Tele-apipa e latalata i le vaitafe o Kepara i Papelonia, lea e faitau selau maila le mamao i le itu i sisifo o Ierusalema. Na tuu e Ieova le perofeta i le nofoaga o loo iai le malumalu, i le faitotoʻa i le itu i mātū o le lotoā pito i totonu. E ala i se faaaliga, na amata mai i inā ona ave e Ieova Esekielu e matamata i le malumalu.

 ³ Na vaaia e Esekielu ni vaaiga se fā e matuā faateʻia ai lea na atagia ai le tulaga pagatia faaleagaga o le nuu. O le ā ua tupu i le tapuaʻiga mamā iā Ieova? O le ā le uiga o lenei faaaliga mo i tatou i aso nei? Seʻi o tatou faatasi atu iā Esekielu i lana matamataga i le malumalu. Ae seʻi o tatou iloiloina muamua po o le ā e faatalitalia e Ieova mai i ē e tapuaʻi iā te ia.

4. O le ā e faatalitalia e Ieova mai i ē e tapuaʻi iā te ia?

⁴ E pe tusa ma le 900 tausaga a o leʻi oo i aso o Esekielu, na taʻua ai ma le manino e Ieova mea na ia faatalitalia mai i ē e tapuaʻi iā te ia. I le poloaʻiga lona lua o Tulafono e Sefulu, na ia faapea atu i tagata Isaraelu: * “O aʻu o Ieova lou Atua, o le Atua e manaʻo e tapuaʻi mai e tau lava o aʻu.” (Eso. 20:5) O le faaupuga “e tapuaʻi mai e tau lava o aʻu,” ua faaalia ai e Ieova e na te lē taliaina le tapuaʻi i se isi lava atua. E pei ona tatou iloiloina i le Mataupu 2 o lenei lomiga, o le vala muamua e manaʻomia mo le tapuaʻiga mamā, o le avatu lea o la tatou tapuaʻiga tau lava o Ieova. E tatau i ona tagata tapuaʻi ona faamuamua o ia i o latou olaga. (Eso. 20:3) O lona uiga, e faatalitalia e Ieova ona tagata tapuaʻi ina ia tumau ona mamā faaleagaga, e ala i le lē nini faatasi o le tapuaʻiga moni ma tapuaʻiga sesē. I le 1513 T.L.M., na lotomalilie tagata Isaraelu e avea i latou ma vaega o le feagaiga o le Tulafono. O le faia faapea, na latou malilie ai e tapuaʻi e tau lava o Ieova. (Eso. 24:3-8) E faamaoni Ieova i ana feagaiga, ma e na te faatalitalia foʻi e faamaoni lona nuu na latou osi feagaiga.—Teu. 7:9, 10; 2 Samu. 22:26.

5, 6. Aiseā na talafeagai ai ona faatalitalia e Ieova e tapuaʻi atu tagata Isaraelu tau lava o ia?

⁵ Pe na talafeagai le faatalitalia e Ieova o tagata Isaraelu e tapuaʻi atu tau lava o ia? Ioe, e talafeagai! O ia o le Atua e ona le malosi uma lava, o le Pule Silisili Ese i le aoao o mea, o le Puna o le ola ma o Lē e faatumauina le ola. (Sala. 36:9; Galu. 17:28) O Ieova foʻi o Lē na laveaʻiina tagata Isaraelu. Ina ua ia tuuina mai Tulafono e Sefulu, na ia faamanatu atu i lona nuu: “O aʻu o Ieova lou Atua, o lē na aveesea oe mai i le atunuu o Aikupito, o le mea na e nofo pologa ai.” (Eso. 20:2) E manino mai, na alagatatau ona faamuamua Ieova i loto o tagata Isaraelu.

⁶ E lē sui Ieova. (Mala. 3:6) E faaauau ona maumauaʻi Ieova e tapuaʻi atu tau lava o ia. Seʻi faaata la faalogona o Ieova i vaaiga faanoanoa e fā o le a ia faaali atu iā Esekielu i le faaaliga.

7. (a) O le ā na faia e tagata Iutaia lē faamaoni i le faitotoʻa i le itu i mātū o le malumalu, ma o ā faalogona o Ieova i lenā mea? (Tagaʻi i le ata i luga aʻe o le matua.) (e) O le ā e uiga i ai le fuā o Ieova? (Tagaʻi i le faamatalaga pito i lalo.)

⁷ Faitau le Esekielu 8:5, 6. E mautinoa na matuā faateʻia Esekielu! I le faitotoʻa i le itu i mātū o le malumalu, na tapuaʻi atu ai tagata Iutaia lē faamaoni i le faatusa o se tupua. Atonu o se pou paia na fai ma faatusa o Asaira, o le atua fafine na manatu i ai tagata  Kanana o le avā a Paala. Po o le ā lava e faasino atu i ai, ae na solia e tagata Isaraelu ifo i tupua la latou feagaiga ma Ieova. O le avatu i lenā tupua o le tapuaʻiga lea na tatau ona latou avatu tau lava o Ieova, na latou faatupu ai le fuā o le Atua, o se toʻasā talafeagai. * (Teu. 32:16; Eseki. 5:13) Seʻi manatu i ai, ua silia ma le 400 tausaga o avea le malumalu ma mea e afio ai Ieova. (1 Tu. 8:10-13) Ae ona o a latou ifoga tupua i le malumalu, ua faapogaia ai e na tagata le ʻfaamamao ese o le Atua mai i lona malumalu.’

8. O le ā le uiga o le faaaliga a Esekielu e faatatau i le faatusa o le fuā mo o tatou aso?

⁸ O le ā le uiga o le faaaliga a Esekielu e faatatau i le faatusa o le fuā mo o tatou aso? O tagata o Iuta ua liliuese mai i le tapuaʻiga moni, ua faamanatu mai ai lotu ua faapea mai o Kerisiano. Ua taatele le ifo i tupua i na lotu, ma ua lē talia ai so o se tapuaʻiga e latou te avatu i le Atua. Talu ai e lē sui Ieova, e tatou te mautinoa foʻi ua faatupu e lotu ua faapea mai o Kerisiano lona toʻasā amiotonu, e pei foʻi ona faia e tagata lē faamaoni o Iuta. (Iako. 1:17) E mautinoa e matuā mamao ese Ieova mai i nei Kerisiano faatagāfai!

9, 10. O le ā se lesona lapataʻi e tatou te aʻoaʻoina mai i tagata ifo i tupua i le malumalu?

⁹ O le ā se lesona lapataʻi e tatou te aʻoaʻoina mai i na tagata ifo i tupua i le malumalu? Ina ia tatou tapuaʻi tau lava o Ieova, e tatau ona tatou “sosola ese mai i le ifo i tupua.” (1 Kori. 10:14) Atonu e tatou te manatu, ʻE lē taitai ou faaaogāina se faatusa po o se tupua i laʻu tapuaʻiga iā Ieova!’ Ae e eseese auala e faatino ai le ifo i tupua, ma o isi auala e iloagatā. Ua faapea mai se tasi lomifefiloi faale-Tusi Paia: “E mafai ona manatu i le ifo i tupua o se mea e iai sona tāua po o se aafiaga malosi, lea e tatou te taulaʻi i ai nai lo o le taulaʻi i le Atua.” O lea la, o le ifo i tupua e mafai ona aofia ai meafaitino, tupe, feusuaʻiga, faafiafiaga, po o so o se vala lava e faamuamua i o tatou olaga ae lona lua ai le tapuaʻi tau lava o Ieova. (Mata. 6:19-21, 24; Efe. 5:5; Kolo. 3:5) E tatau ona tatou ʻalofia so o se ituaiga o ifoga tupua, auā e na o Ieova e tatau ona faamuamua i o tatou loto ma e tatau i ai la tatou tapuaʻiga.—1 Ioa. 5:21.

¹⁰ O le vaaiga muamua na faaali atu e Ieova iā Esekielu, na aofia ai mea matagā ma inosia. Peitaʻi, na faapea atu Ieova i lana perofeta faamaoni: “O le a e toe vaai atu i mea inosia e sili atu ona matagā.” O le ā se isi mea e sili atu ona matagā nai lo o le tapuaʻi i lenā faatusa o le fuā o loo i le malumalu?

11. O ā mea na faateʻia ai Esekielu a o ulufale atu i le lotoā pito i totonu e latalata i le fata faitaulaga i le malumalu?

¹¹ Faitau le Esekielu 8:7-12. Na eli e Esekielu le pā ma ulufale atu i le lotoā pito i totonu e latalata i le fata faitaulaga i le malumalu, ma ia vaaia ai ni ata na vaneina i le puipui “o mea fetolofi ma manu inosia uma ma tupua inosia uma.” * O ata na vaneina i le puipui sa faaata mai ai atua sesē. Ae o le mea e sosoo ai na vaaia  e Esekielu e sili atu ona faateʻia ai: “O toeaina e toʻa 70 o le aiga o Isaraelu” o loo tutū “i le pōuliuli” ma ofoina atu mea manogi i atua sesē. I le Tulafono, o le faamūina o mea manogi lelei na faaata mai ai tatalo a tagata tapuaʻi faamaoni na taliaina e le Atua. (Sala. 141:2) Peitaʻi, o mea manogi na ofoina atu e na toeaina e toʻa 70 i atua sesē, na avea o se manogi leaga iā Ieova. O a latou tatalo sa pei o se mea manogi na ʻinoʻino ai Ieova. (Faata. 15:8) Sa faasesēina e na toeaina i latou lava ma manatu, “E lē o silasila mai Ieova iā i tatou.” Ae na silasila atu Ieova iā i latou, ma na ia faaali atu iā Esekielu mea o loo latou faia i lona malumalu.

12. Aiseā e tatau ai ona tatou faamaoni e tusa pe e iai “i le pōuliuli,” ma o ai e tāua ona latou faataatia se faaaʻoaʻoga lelei i lenei vala?

¹² O le ā e tatou te aʻoaʻoina mai i le tala a Esekielu e faatatau i na toeaina Isaraelu e toʻa 70 o ē na ofoina atu mea manogi i atua sesē? Ina ia faafofogaina e le Atua a tatou tatalo ma faatumauina le mamā o la tatou tapuaʻiga i lana silafaga, e tatau ona tatou faamaoni e tusa pe e iai “i le pōuliuli.” (Faata. 15:29) Ia tatou manatua o loo silasila mai fofoga o Ieova iā i tatou i taimi uma. Pe afai e moni Ieova iā i tatou, e tatou te lē faia so o se gaoioiga e lē fiafia ai lona finagalo e tusa pe e na o i tatou. (Epe. 4:13) E sili ona  tāua mo toeaina o le faapotopotoga ona faataatia se faaaʻoaʻoga lelei o le auala e ola ai o ni Kerisiano. (1 Pete. 5:2, 3) E aʻoaʻo atu ma taʻimua toeaina i le tapuaʻiga i sauniga. E talafeagai la ona faatalitalia e sui o le faapotopotoga i latou e ola e tusa ai ma mataupu silisili o le Tusi Paia, e tusa pe e iai “i le pōuliuli,” o lona uiga e lē o vāai atu isi iā i latou.—Sala. 101:2, 3.

13. O le ā na vaaia e Esekielu o faia e fafine lē faamaoni i se tasi o faitotoʻa o le malumalu?

¹³ Faitau le Esekielu 8:13, 14. Ina ua māeʻa vaaiga e lua o faiga inosia, na toe faapea atu Ieova iā Esekielu: “O le a e toe vaai atu i mea inosia e sili atu ona matagā o loo latou faia.” O le ā le mea na sosoo ai na vaaia e le perofeta? “I le mea e ulu atu ai i le faitotoʻa o le pā o le fale o Ieova, lea o loo i le itu i mātū,” na ia vaaia ai “fafine o loo nonofo ma fetagisi ona o le atua o Tamusa.” O Tamusa o se atua o Mesopotamia, ma i tusitusiga Sumeria ua taʻua Tamusa o Dumuzi ma e manatu iā te ia o le toʻalua o le atua fafine o le faaautama o Ishtar. * O le fetagisi o fafine Isaraelu, e foliga mai o se tū faalotu e fesootaʻi atu i le maliu o Tamusa. O le fetagisi o na fafine iā Tamusa i le malumalu o Ieova, ua latou faia ai se tū faapaupau i le nofoaga o loo faaautū ai le tapuaʻiga mamā. Peitaʻi, e lē faapea ai ua paia lenā faiga faapaupau, ona o loo faia i le malumalu o le Atua. Ioe, na faia e na fafine lē faamaoni “mea inosia” i le silafaga a Ieova!

14. O le ā se lesona e tatou te aʻoaʻoina mai i le silafaga a Ieova i mea na faia e fafine lē faamaoni?

¹⁴ O le ā se lesona e tatou te aʻoaʻoina mai i le silafaga a Ieova i mea na faia e na fafine? Ina ia faatumauina le mamā o la tatou tapuaʻiga, e lē tatau ona nini faatasi ma faiga faapaupau lē mamā. O lea, e tatau ona tatou matuā faamamao ese mai i aso faamanatu e faapaupau o latou amataga. Ae pe e iai se afāina o le amataga mai o na aso faamanatu? Ioe. I aso nei, e foliga mai e leai se afāina o faiga e fesootaʻi atu i isi aso faamanatu e pei o le Kerisimasi ma le Eseta. Ae aua neʻi galo iā i tatou, na silasila Ieova i faiga faalotu faapaupau lea ua mulimuli ane avea ma aso faamanatu i aso nei. I le silafaga a Ieova, e lē faaitiitia le leaga o nei faiga faapaupau ona ua umi se taimi o faamanatu, po ua faia foʻi taumafaiga e tuufaatasi ai ma le tapuaʻiga mamā.—2 Kori. 6:17; Faaa. 18:2, 4.

15, 16. O le ā na faia e tamāloloa e toʻa 25 i le lotoā pito i totonu o le malumalu, ma aiseā na matuā tigā ai faalogona o Ieova i mea na latou faia?

¹⁵ Faitau le Esekielu 8:15-18. Na toe faatomua e Ieova le vaaiga lona fā ma o le vaaiga mulimuli foʻi lea i upu lava nei: “O le a e toe vaai atu i mea inosia e sili atu ona matagā nai lo o ia mea.” Atonu na taumānatu le perofeta: ʻO ā nisi mea e sili atu ona matagā nai lo o mea ua ou vaaia?’ Ua iai nei Esekielu i le lotoā pito i totonu o le malumalu. A o iai i le mea e ulu atu ai i le malumalu, na ia vaaia ai ni tamāloloa se toʻa 25 o loo punonou ma ifo atu “i le lā i le itu  i sasaʻe.” Na faia e na tane se mea na matuā faatigā ai iā Ieova. O ā na mea?

¹⁶ Ia faaata lenei vaaiga: Na fausia le malumalu o le Atua e faasaga i sasaʻe le mea e ulu atu ai. Pe a ulufale atu tagata tapuaʻi i le malumalu, e latou te faasasaga i le itu i sisifo ae e ū o latou tua i le mea e oso aʻe ai le lā i le itu i sasaʻe. Ae o tamāloloa e toʻa 25 i le faaaliga, na ū o latou tua i le malumalu ae faasasaga i sasaʻe ina ia latou tapuaʻi i le lā. O le faia faapea, na ū ai o latou tua iā Ieova, auā o le malumalu “o le fale o Ieova.” (1 Tu. 8:10-13) O na tamāloloa e toʻa 25, o tagata ua liliuese mai i le tapuaʻiga moni. Ua latou teena Ieova, ma latou soli ai le poloaʻiga o loo i le Teuteronome 4:15-19. Pagā lo latou faatigā i le Atua, o lē e manaʻo e tapuaʻi atu tau lava o ia!

17, 18. (a) O le ā e tatou te aʻoaʻoina mai i le tala i tagata na tapuaʻi i le lā i le malumalu? (e) O ā faiā na faaleagaina e tagata Isaraelu lē faamaoni, ma e faapefea?

¹⁷ O le ā e tatou te aʻoaʻoina mai i le tala e faatatau i na tagata na tapuaʻi i le lā? Ina ia faatumauina le mamā o la tatou tapuaʻiga, e tatau ona tatou vaai atu iā Ieova mo le malamalama faaleagaga. Ia manatua, ʻo Ieova le Atua o le lā,’ ma o lana Afioga o “le malamalama” i o tatou ala. (Sala. 84:11; 119:105) E ala i lana Afioga ma lomiga faale-Tusi Paia mai i lana faalapotopotoga, ua ia faamalamalamaina ai o tatou loto ma mafaufau, ma faaali mai iā i tatou le auala e maua ai se olaga faamalieloto i le taimi lenei ma le ola e faavavau i le lumanaʻi. Peitaʻi, pe a tatou saʻili atu i le lalolagi mo le malamalama i le auala e ola ai, e pei lenā ua ū o tatou tua iā Ieova. O le iʻuga, o le a tatou matuā faatigā ai i lona finagalo. E tatou te lē mananaʻo e faia lenā mea i lo tatou Atua! Ua lapataʻia foʻi i tatou e le faaaliga a Esekielu, ina ia tatou matuā faamamao ese mai i ē ua ū o latou tua i le upu moni, po o tagata ua liliuese mai i le tapuaʻiga moni.—Faata. 11:9.

¹⁸ E pei ona tatou tilofaʻia, na molimauina e Esekielu ni vaaiga inosia e fā o ifoga tupua ma tapuaʻiga sesē, lea ua iloa ai le matuā leaga o le tulaga faaleagaga o tagata o Iuta ua liliuese mai i le tapuaʻiga moni. O lo latou lē mamā faaleagaga, na faaleagaina ai e na tagata Isaraelu la latou faiā ma le Atua. Peitaʻi, e ō faatasi le lē mamā faaleagaga ma amioga lē mamā. E lē o se mea la e faateʻia ai le faia e na tagata Isaraelu lē faamaoni o amioga matagā uma, lea na faaleagaina ai la latou faiā ma le Atua faapea a latou faiā ma isi. Seʻi o tatou tilofaʻia mea na faagaeeina le perofeta o Esekielu e tusia, e faamatala ai amioga matagā a tagata lē faamaoni o Iuta.

19. Na faapefea ona faamatala e Esekielu amioga matagā a le nuu na osi feagaiga ma Ieova?

¹⁹ Faitau le Esekielu 22:3-12. Na matuā leaga amioga a le nuu, e amata mai i taʻitaʻi seʻia oo i tagata lautele. Na faaaogā e “taʻitaʻi” la latou pule e fasioti ai tagata lē sala. Na mulimuli tagata lautele  i o latou taʻitaʻi i le solia o Tulafono a le Atua. I totonu foʻi o aiga, na ʻinoʻino fanau i o latou mātua ma na taatele le mataifale. I totonu lava o le nuu, na ave faagaoi e tagata Isaraelu fouvale meatotino a tagata ese na aumau, ma agaleaga i le tama e leai se tamā ma le fafine ua oti lana tane. Na feusuaʻi foʻi tane Isaraelu ma avā a o latou tuaoi. Na matuā taatele le matapeʻapeʻa ona o faiga faaalatua, le ave faamalosi o tupe a isi, ma nonō atu ina ia maua se polofiti. E mautinoa na tigā le finagalo o Ieova i le silasila mai i lona nuu na latou osi feagaiga, ua latou solia lana Tulafono ma lē amanaʻia lona alofa na faia ai nei tulafono. O a latou amioga matagā, na latou faatigā tuusaʻo ai iā Ieova. Na ia faatonuina Esekielu e fai atu i le nuu amioleaga: “Ua e matuā faagaloina aʻu.”

20. Aiseā e tāua ai iā i tatou i aso nei upu a Esekielu e faatatau i amioga lē mamā a Iuta?

²⁰ Aiseā e tāua ai iā i tatou i aso nei upu a Esekielu e faatatau i amioga lē mamā a Iuta? O faiga faapiʻopiʻo a le nuu lē faamaoni o Iuta, ua faamanatu mai ai iā i tatou amioga matagā a le lalolagi o loo tatou ola ai i aso nei. Ua faaaogā sesē e taʻitaʻi faapolotiki la latou pule e faasauā ai i tagata lautele. Ua taulamua taʻitaʻi lotu aemaise lotu ua faapea mai o Kerisiano, e faamanuia taua a atunuu lea ua fasiotia ai le faitau miliona o tagata. Ua tuumāmāina e taʻitaʻi lotu tapulaa mamā ma manino a le Tusi Paia e faatatau i amioga  mamā taufeusuaʻiga. O le iʻuga, ua faaauau ona paʻū maulalo tapulaa tauamio a le lalolagi o loo tatou ola ai. E pei ona fetalai atu Ieova i le nuu lē faamaoni o Iuta, e mautinoa o le a ia faapea atu foʻi i lotu ua faapea mai o Kerisiano: “Ua [outou] matuā faagaloina aʻu.”

21. O le ā e tatou te aʻoaʻoina mai i amioga lē mamā a le nuu o Iuta i aso anamua?

²¹ I le avea ai ma tagata o Ieova, o le ā e tatou te aʻoaʻoina mai i amioga lē mamā a le nuu o Iuta i aso anamua? E tatau ona mamā a tatou amioga i so o se vala, ina ia talia ai e Ieova la tatou tapuaʻiga. Ae e matuā faigatā lenā mea i lenei lalolagi ua paʻū maulalo le tulaga tauamio. (2 Timo. 3:1-5) Peitaʻi, ua tatou iloa le silafaga a Ieova e faatatau i amioga matagā eseese uma. (1 Kori. 6:9, 10) E tatou te usiusitaʻi i tapulaa tauamio a Ieova, ona e tatou te alolofa iā te ia ma naunau i ana tulafono. (Sala. 119:97; 1 Ioa. 5:3) O lo tatou faia o amioga lē mamā, e faaalia ai lo tatou lē alolofa i lo tatou Atua paia ma mamā. E mautinoa e tatou te lē mananaʻo e faia se mea e faapea mai ai Ieova iā i tatou: “Ua [outou] matuā faagaloina aʻu.”

22. (a) O le ā ua e maumauaʻi e fai mai i le iloiloina o le faaalialia e Ieova o le tulaga leaga o Iuta anamua? (e) O le ā o le a iloiloina i le mataupu o loo sosoo mai?

²² Ua tatou aʻoaʻoina ni lesona tāua, mai i le faaalialia e Ieova o le leaga o le tulaga faaleagaga ma amioga a le nuu o Iuta i aso anamua. E mautinoa ua faamalosia lo tatou faanaunauga e tapuaʻi tau lava o Ieova, ma o se mea ua alagatatau. O lea, e tatau ona tatou ʻalofia so o se ituaiga o ifoga tupua, ma faatumauina le mamā tauamio. Ae o le ā na faia e Ieova i lona nuu lē faamaoni? I le faaiʻuga o le matamataga a Esekielu i le malumalu, na faailoa manino atu e Ieova i lana perofeta: ʻO le a ou gaoioi ma loʻu ita tele.’ (Eseki. 8:17, 18) E tatou te fia iloa le gaoioiga na fai e Ieova i le nuu lē faamaoni o Iuta, auā o le faasalaga foʻi lea o le a ia faaoo mai i lenei lalolagi amioleaga. O le a iloiloina i le mataupu o loo sosoo mai le auala na faaoo mai ai e Ieova le faasalaga i le nuu o Iuta.