Ua faamaonia i valoaga o le Tusi Paia ma mea na tutupu, na avea Iesu ma Tupu i le lagi i le 1914, lea e faailoga ai le amataga o aso e gata ai o le faiga o mea a Satani i le lalolagi. O le ā na faia e Iesu ina ua avea o ia ma Tupu? Pe na ia faasaʻolotoina loa ana auauna i le lalolagi mai i le saisaitia i Papelonia le Aai Tele? Pe na ia tofia lana “pologa faamaoni ma le faautauta” i le 1914, ma amata ai le galuega tele o le seleselega?—Mata. 24:45.

E foliga mai e leai. Ia manatua na faagaeeina le aposetolo o Peteru e tusi, ʻe amata mai le faamasinoga i le aiga o le Atua.’ (1 Pete. 4:17) I se tulaga talitutusa, na valoia e le perofeta o Malaki le taimi e afio mai ai Ieova i lona maota mo le tapuaʻiga faatasi ma “le avefeʻau o le feagaiga,” o le Alo o le Atua. (Mala. 3:1-5) O le vaitaimi lenā o le tofotofoina ma le faamamāina. Pe e ōgatusa na valoaga ma mea na tutupu i le talafaasolopito?

 O le mea moni lenā! O le 1914 seʻia oo i le tau amatamataga o le 1919, sa avea o se taimi faigatā o tofotofoga ma le faamamāina mo Tagata Aʻoga o le Tusi Paia, e pei ona iloa ai Molimau a Ieova i lenā taimi. I le 1914, na lē fiafia ai le toʻatele o tagata o le Atua ina ua lē oo mai le iʻuga o lenei faiga o mea sa latou faamoemoe ai. Sa atili ona lē fiafia le toʻatele i le 1916, ina ua maliu Charles T. Russell o lē na taʻimua i tagata o le Atua i se auala mataʻina. O le pipii tele o loto o isi i le uso o Russell na latou teena ai taumafaiga a le uso o Joseph F. Rutherford, o lē na suitulaga iā Russell. Na iai fevaevaeaʻiga, ma na toetoe lava vaeluaina ai le faalapotopotoga i le 1917. Ae i le 1918, e foliga mai o uunaʻiga a taʻitaʻi lotu na molia ai i le faamasinoga le uso o Rutherford ma ana aumea e toʻafitu, tuuaʻia sesē i latou, ma faasala i le falepuipui. Na tapunia le ofisa ulu i Brooklyn. E manino mai ai, e leʻi faasaʻolotoina tagata o le Atua mai i Papelonia le Aai Tele.

Peitaʻi, o le ā na tupu i le 1919? Na vave lava ona suia le tulaga o mea! I le amataga o lenā tausaga, na toe tatala mai ai Rutherford ma ana aumea mai i le falepuipui ma sa amata loa ona latou toe galulue. E leʻi umi lava ae fuafuaina loa se tauaofiaga mataʻina ma le lomiga fou The Golden Age (lea ua taʻua nei o le Awake!). Sa fuafuaina lenā lomiga fou mo tauiviga o talaʻiga i le lautele. E lē gata i lea, na tofia ovasia i faapotopotoga taʻitasi e faamaopoopo ma faaauiluma le faiva. O le tausaga lava lenā na lomia ai le Bulletin (lea ua taʻua nei o La Tatou Faiva ma le Olaga Faa-Kerisiano—Polokalame mo le Sauniga) e fesoasoani ai i le faamaopoopoina o le galuega talaʻi.

O le ā ua faailoa mai i na mea? E manino mai ai ua faasaʻolotoina e Keriso ona tagata mai i le faaaunuua ai i Papelonia le Aai Tele. Ua ia tofia lana pologa faamaoni ma le faautauta. Ua faagasolo le galuega o le seleselega. Talu mai le tausaga iloga o le 1919, ua matuā agaʻi i luma lenā galuega.