PUSA E AʻOAʻO AI 14A
Lesona Mai i le Faaaliga a Esekielu i le Malumalu
Faasilisilia ma Puipuia le Tapuaʻiga Mamā
O le malumalu i le faaaliga, o loo tū i luga o se “mauga e matuā maualuga” (1). Po o tatou faasilisilia le tapuaʻiga mamā e avea ma mea e sili ona tāua i o tatou olaga?
O le pā e siʻo ai (2) le laueleele telē o loo siʻomia ai le malumalu (3), e faamanatu mai ai e lē tatau ona tatou faatagaina se mea e faaleagaina ai la tatou tapuaʻiga iā Ieova. Ua taʻua i le Esekielu 42:20, e iai se pā e vā ai le “laueleele paia” ma le “laueleele e lē paia.” Pe afai e tuueseese le “laueleele paia” mai i le “laueleele e lē paia” e ui e leai ni mea leaga o loo faia i le “laueleele e lē paia,” pe e lē tatau foʻi la i tagata tapuaʻi o Ieova ona faamamao ese mai i amioga lē mamā uma?—Eseki. 42:20.
Faamanuiaga e Faavavau
O se vai o loo tafe mai i le malumalu ua faasolo ina telē ma ola lauusiusi ai le laueleele (4). O le a iloiloina nei faamanuiaga i le Mataupu 19 o lenei lomiga.
E Tutusa Tapulaa mo Tagata Uma
O le maualuluga o faitotoʻa pito i fafo (5) ma faitotoʻa i totonu (9), e faamanatu mai ai e maualuluga tapulaa tauamio a Ieova mo ē e auai i le tapuaʻiga mamā. Ia mātau, e tutusa uma fua o faitotoʻa pito i fafo ma faitotoʻa i totonu. E talafeagai lenā manatu, auā e tutusa tapulaa amiotonu a Ieova mo ana auauna uma e tusa po o ā tulaga po o faaeaga o loo auauna ai.
Se Taumafataga i le Laoai a Ieova
O potu ʻai (8), ua faamanatu mai ai na mafai e tagata i aso anamua ona aai faatasi i le malumalu i se vaega o a latou taulaga, e tai pei lenā o loo taumamafa faatasi ma Ieova. E ese lenā mai i le malumalu faaleagaga o loo tapuaʻi ai Kerisiano i aso nei, lea e ʻtasi le taulaga’ e faia ai ma ua uma ona ofoina. (Epe. 10:12) E ui i lea, o loo tatou faia pea taulaga o viiga.—Epe. 13:15.
Se Faamaoniga Mai i le Atua
Atonu e te mātauina le tele o fua auʻiliʻili o le malumalu o loo i le faaaliga. O na fua e faamaonia ai, e mautinoa ma taunuu moni le finagalo o Ieova e toe faafoʻisia le tapuaʻiga mamā, e pei ona mautinoa ma lē mafai ona suia fua o le malumalu. E ui e leʻi faapea mai Esekielu na ia vaaia se tagata i le faaaliga, ae na ia faamauina fautuaga malolosi a Ieova mo ositaulaga, taʻitaʻi, ma tagata. E tatau i tagata uma o le Atua ona tausisia ana tapulaa amiotonu.
