E mafai ona faamatalaina le tapuaʻiga, “o se gaoioiga e faaalia ai le faaaloalo ma le alofa i se atua.” I le Tusi Paia, o upu i le uluaʻi gagana ua faaliliuina “tapuaʻiga” e maua ai le manatu e faapea, o se tasi e matuā faaaloalo pe gauaʻi i isi foafoaga. (Mata. 28:9) O na upu e faamatala ai foʻi se gaoioiga tau tapuaʻiga i le Atua po o se atua. (Ioa. 4:23, 24) O le siʻomaga o le mau e mafai ona iloa ai le mea o loo faatatau atu i ai.

O Ieova o Lē na foafoaina mea ma o le Pule Silisili Ese i le aoao o mea, e na o ia e tatau i ai le tapuaʻiga atoatoa. (Faaa. 4:10, 11) E tatou te tapuaʻi iā Ieova e ala i le faaaloalo i lana pule silisili ese ma faamamaluina lona suafa. (Sala. 86:9; Mata. 6:9, 10) O vala nei e lua e matilatila i le tusi o Esekielu: o le pule silisili ese a Ieova ma lona suafa. O le faaupuga “le Alii Pule Silisili Ese o Ieova” e 217 taimi o loo faaaogā ai i le tusi o Esekielu, ae o le faaupuga “ona outou iloa ai lea o aʻu lava o Ieova” ma isi faaupuga faapena, e 55 taimi o loo faaaogā ai.—Eseki. 2:4; 6:7.

Peitaʻi, o la tatou tapuaʻiga e lē na o faalogona e aofia ai, ae o le tapuaʻiga moni e aofia ai gaoioiga. (Iako. 2:26) Ina ua tuuina atu o tatou ola iā Ieova, na tatou tautō ai o le a tatou usiusitaʻi iā te ia o lo tatou Pule Silisili Ese i vala uma o o tatou olaga, ma faaalia le matuā faaaloalo mo lona suafa. Ia manatua, ina ua tali atu Iesu i le faaosoosoga lona tolu, na ia faafesootaʻi ai le tapuaʻiga i “le auaunaga paia.” (Mata. 4:10) E tatou te naunau e auauna iā Ieova, ona e tatou te tapuaʻi iā te ia. * (Teu. 10:12) E tatou te tuuina atu le auaunaga paia i lo tatou Atua, pe a tatou auai i galuega e fesootaʻi tuusaʻo atu i la tatou tapuaʻiga, ma manaʻomia ai le agaga faataulaga. O ā na galuega?

E eseese auala e faia ai le auaunaga paia, ma e tautele uma iā Ieova. E tatou te faia le auaunaga paia pe a tatou molimau atu i isi, auai i sauniga i le Maota mo Sauniga, ma fausia ma tausia maota mo le tapuaʻiga. E lē gata i lea, e tatou te tuuina atu le auaunaga paia pe a faia se sao i le tapuaʻiga a le aiga, lagolagosua i galuega fesoasoani mo uso o loo puapuagatia, galue tauofo i tauaofiaga, pe auauna i le Peteli. (Epe. 13:16; Iako. 1:27) O le a tatou ʻtuuina atu le auaunaga paia i le ao ma le pō’ pe a faamuamua le tapuaʻiga mamā i o tatou mafaufau ma loto. O se fiafiaga iā i tatou le tapuaʻi i lo tatou Atua o Ieova!—Faaa. 7:15.