PUSA E AʻOAʻO AI 19A
Vaitafe o Faamanuiaga Mai iā Ieova
Seʻi o tatou iloiloina nisi o mau eseese o le Tusi Paia o loo faaaogā ai upu o le “vaitafe” ma le “vai” e faaata mai ai faamanuiaga mai iā Ieova. Pe a faitau i nei mau, e matuā faalaeiauina i tatou i le iloaina o auala o loo faamanuia ai i tatou e Ieova. I le ā le itu?
IOELU 3:18 O loo taʻua i lenei valoaga se punāvai o loo tafe mai i le malumalu, ma e faasūsūina ai “le vanu o Laau o le Setima” lea e mātūtū. O lea, o le vaitafe na vaaia e Ioelu ma Esekielu, e maua ai le ola i nofoaga e lē fua mai. O le vaitafe foʻi na la vaaia, e tafe mai i le maota o Ieova po o le malumalu.
SAKARIA 14:8 Na vaaia e le perofeta o Sakaria le tafe mai o “vai ola” mai i le aai o Ierusalema. O le isi ʻafa o le vai na tafe atu i le sami i sasaʻe, po o le Sami Mate. Ae o le isi ʻafa na tafe atu i le sami i sisifo, po o le Sami o Metitirani. Sa avea Ierusalema ma ʻaai o le Tupu sili’ o Ieova le Atua. (Mata. 5:35) O le taʻua e Sakaria o lenā aai, ua faamanatu mai ai le pulega a Ieova i le lalolagi atoa i se taimi o i luma. Ua leva ona tatou malamalama, o vai o loo taʻua i lenei valoaga ua faailoa mai ai o le a faamanuia e Ieova ni vaega se lua o tagata faamaoni i le Parataiso: O i latou o le a sao mai i le puapuaga tele, ma ē o le a faatutūina i se taimi mulimuli ane.
FAAALIGA 22:1, 2 Na vaaia foʻi e le aposetolo o Ioane se vaitafe faafaatusa, e tai pei lava o le vaitafe na vaaia e Esekielu. Peitaʻi, e lē tafe mai lenei vaitafe mai i le malumalu, ae e tafe mai i le nofoālii o Ieova. O lea, o lenei faaaliga e taitutusa ma le valoaga a Sakaria. O loo faamatilatila mai ai faamanuiaga o le pulega a le Atua i le Afe Tausaga.
O le mea moni, e leai se eseesega tele o faamanuiaga mai i le pulega a Ieova, ma faamanuiaga ia e faaatagia mai e le vaitafe na vaaia e Esekielu. O na faamanuiaga uma e mai iā Ieova ma e faasafua atu i tagata faamaoni uma.
SALAMO 46:4 Seʻi mātau le auala o loo faamatilatila ai i lenei fuaiupu vala e lua, o le tapuaʻiga ma le pulega. O loo taʻua i inei se vaitafe o le a faafiafiaina ai “le aai o le Atua,” lea e faasino atu i le Malo ma le pulega. E lē gata i lea, o le a fiafia ai foʻi “le faleʻie paia matagofie o Lē e Silisili Ese,” lea e faasino atu i le tapuaʻiga mamā.
O nei mau uma, ua faamautinoa mai ai o le a faamanuia e Ieova ē e faamaoni i ni auala se lua. E lē gata o le a tatou maua aogā e faavavau mai i lana pulega, ae o le a tatou maua foʻi aogā mai i lana faatulagaga mo le tapuaʻiga mamā. Seʻi o tatou maumauaʻi nei e faaauau ona saʻili iā Ieova le Atua ma lona Alo mo “vai o le ola,” o a la sauniuniga alofa ia e maua ai le ola e faavavau.—Iere. 2:13; Ioa. 4:10.
