1, 2. (a) O le ā e faailoa atu e ala i a tatou upu ma gaoioiga? (e) O le ā le tali atu a se agelu faamaoni ina ua taumafai Ioane e tapuaʻi atu iā te ia?

 E TATAU iā i tatou taʻitoʻatasi ona taliina le fesili tāua lenei: O ai e tatau ona ou tapuaʻi i ai? E ono faapea mai le toʻatele e faigofie le tali o lenei fesili, auā e na o le Atua e tatau ona tapuaʻi i ai. Peitaʻi, e faailoa atu i a tatou upu ma gaoioiga po o tatou tapuaʻi iā Ieova le Atua, po o Satani le Tiapolo.

² E naunau Satani e avatu le tapuaʻiga iā te ia, ma na manino mai lenā vala ina ua ia faaosoosoina Iesu. E pei ona taʻua i le Mataupu 1 o lenei lomiga, na ofo atu e Satani iā Iesu se taui mataʻina o le pule lea i malo uma o le lalolagi. O le ā na manaʻo i ai Satani? Na ia fai atu iā Iesu, ia “tapuaʻi mai iā te aʻu.” (Mata. 4:9) Peitaʻi, e leʻi faapena le agelu na faailoaina atu faaaliga i le aposetolo o Ioane. E leʻi manaʻo o ia e tapuaʻi atu Ioane iā te ia. (Faitau le Faaaliga 22:8, 9.) I le taimi na taumafai ai Ioane e tapuaʻi i le agelu, na tali atu lenei atalii agaga lotomaulalo o le Atua e faapea: “Aua e te faia lenā mea!” Nai lo o le faapea atu o le agelu, “Ia tapuaʻi mai iā te aʻu” ae na ia fai atu, “Ia tapuaʻi i le Atua.”

3. (a) O le ā le fuafuaga o lenei lomiga? (e) O le ā o le a tatou iloiloina?

 ³ O le fuafuaga o lenei lomiga o le faamalosia o lo tatou faanaunauga e faia le mea na faatonuina e le agelu, o le tapuaʻi atu lea tau lava o Ieova le Atua. (Teu. 10:20; Mata. 4:10) O lea, seʻi autalu puupuu mea ua tatou aʻoaʻoina e faatatau i le tapuaʻiga mamā mai i valoaga ma faaaliga a Esekielu. O le a tatou iloiloina foʻi faamatalaga a le Tusi Paia e faatatau i le lumanaʻi, i le taimi o le a fesagaʻia ai e tagata uma le tofotofoga faaiʻu, e iloa ai po o ai o le a vāaitino i le toe faafoʻisiaina atoatoa e Ieova o le tapuaʻiga mamā e oo i le faavavau.

4. O ā matua e tolu o loo faamatilatila i le tusi o Esekielu?

⁴ Ua tatou aʻoaʻoina mai i le tusi o Esekielu, o le tapuaʻiga mamā e lē faasino atu i le faatinoina o tū faalotu. Peitaʻi, e aofia ai lo tatou (1) tapuaʻi tau lava o Ieova, (2) tumau ona autasi i le tapuaʻiga mamā, ma le (3) faaalia o le alofa i isi. Seʻi o tatou tilofaʻia le auala o loo faamatilatila ai na matua e tolu i valoaga ma faaaliga o loo talanoaina i lenei lomiga.

5-9. O le ā ua tatou aʻoaʻoina e faatatau i le tapuaʻi atu tau lava o Ieova?

⁵ Mataupu 3: * O le faaaliga ofoofogia o le siʻosiʻomia o Ieova i se nuanua ma lona afio aʻe i luga o foafoaga agaga malolosi, ua faamatilatila mai ai le upu moni tāua lenei: E na o Lē e ona le malosi uma lava e tatau i ai le tapuaʻiga.—Eseki. 1:4, 15-28.

⁶ Mataupu 5: O se tulaga e faateʻia ai le vaaia o le faia o amioga inosia i le malumalu o Ieova. Ua faailoa mai i lenā vaaiga, e leai se mea e natia mai iā Ieova. E na te silafia gaoioiga lē faamaoni e pei o le liliu o ona tagata i ifoga tupua, e oo lava foʻi i gaoioiga e lē iloa mai e tagata. E matuā tigā o ia i na gaoioiga, ma e na te faasalaina ē e faia na mea.—Eseki. 8:1-18.

⁷ Mataupu 7: O faasalaga na faailoa atu i nuu tuaoi ona o lo latou “aamu” iā Isaraelu, e faamaonia ai e faamasinoina e Ieova ē e agaleaga i ona tagata. (Eseki. 25:6) Peitaʻi, e iai se isi lesona e mafai ona aʻoaʻoina mai i feutagaʻiga a Isaraelu ma na atunuu: E tatau ona tatou faamuamua le faamaoni iā Ieova nai lo o se isi lava mea. E lē tatau ona faagutugutulua i a tatou tapulaa ina ia faafiafia ai tauaiga e lē tapuaʻi iā Ieova, pe faatuatuaina a tatou ʻoa, po o le lē faaalia o le solitū e ala i le lagolagoina o malo faaletagata, lea e na o Ieova e tatau i ai.

⁸ Mataupu 13 ma le 14: O le faaaliga i le malumalu o loo i luga o se mauga maualuga, ua iloa ai e tatau ona tatou ola e tusa ma tapulaa maualuluga a Ieova, ma amanaʻia e sili atu o ia i lo o isi atua uma.—Eseki. 40:1–48:35.

 ⁹ Mataupu 15: O faamatalaga faavaloaga ua faatusa ai Isaraelu ma Iuta i ni fafine talitane, ua faamanatu mai ai le matuā inosia e Ieova o le mulilua faaleagaga.—Eseki., mata. 16, 23.

10-14. Na faapefea ona faamatilatila le manaʻomia ona faatumauina o lo tatou autasi i le tapuaʻiga mamā?

¹⁰ Mataupu 8: O valoaga na folafola mai e Ieova o le a ia faatūina “se leoleo mamoe e toʻatasi” e tausia Ona tagata, ua faamatilatila mai ai le manaʻomia ona tatou galulue autasi ma le filemu i le taʻitaʻiga a Iesu.—Eseki. 34:23, 24; 37:24-28.

¹¹ Mataupu 9: O valoaga a Esekielu e faatatau i le faasaʻolotoina o tagata o le Atua mai i le saisaitia i Papelonia ma toe faafoʻisia i lo latou laueleele, o loo iai foʻi se feʻau mo i latou i aso nei e mananaʻo e faafiafia Ieova. E tatau i tagata o le tapuaʻiga mamā iā Ieova ona saʻoloto ma tumau ona lē aafia i taaʻiga leaga a lotu sesē. E tatau ona tatou faatumau le autasi lea e iloa ai i tatou o tagata o le Atua, e tusa po o ā tapuaʻiga sa iai muamua, tulaga tau tamaoaiga, ma o tatou atunuu.—Eseki. 11:17, 18; 12:24; Ioa. 17:20-23.

¹² Mataupu 10: O loo faamatilatila le matua o le autasi i le faaaliga i ivi mamago o le a toe ola. Maʻeu se faaeaga o le iai faatasi ma tagata o le tapuaʻiga mamā ua toe faafoʻisia ma galulue faatasi o se ʻau!—Eseki. 37:1-14.

¹³ Mataupu 12: O loo matuā faamatilatila foʻi le autasi i le valoaga o laau e lua na avea ma laau e tasi. O le vaaia o le faataunuuina o lenā valoaga e le ʻaufaauuina ma isi mamoe, ua matuā faamalosia ai lo tatou faatuatua. Ua tumau ona fusia i tatou i le alofa ma le faamaoni, e ui o loo tatou ola i se lalolagi fevaevaeaʻi ona o lotu ma faiga faapolotiki.—Eseki. 37:15-23.

¹⁴ Mataupu 16: O le lapataʻiga lenei o loo i le faaaliga i le tamāloa o loo iai le fagu vaitusi ma tamāloloa o loo iai auupega e faatamaʻia ai: E na o i latou e iai i le tapuaʻiga mamā i le taimi e amata ai “le puapuaga tele” o le a faailogaina mo le faasaoina.—Mata. 24:21; Eseki. 9:1-11.

15-18. Aiseā e tatau ai ona tatou faaalia pea le alofa i isi, ma o ā auala e tatou te faia ai faapea?

¹⁵ Mataupu 4: O le faaaliga i foafoaga agaga e fā, ua aʻoaʻoina ai i tatou e faatatau i uiga o Ieova, aemaise lona uiga sili o le alofa. E faamaonia atu o Ieova lo tatou Atua, pe a tatou tautatala ma gaoioi i se auala alofa.—Eseki. 1:5-14; 1 Ioa. 4:8.

¹⁶ Mataupu 6 ma le 11: O le alofa o le Atua na uunaʻia ai o ia e tofia tagata vāai e pei o Esekielu. E lē finagalo le Atua e faaumatia so o se tasi pe a aumaia le iʻuga o le lalolagi a Satani, talu ai o ia o le Atua alofa. (2 Pete. 3:9) Ua tatou maua le faaeaga o  le faaalia atu o le alofa o le Atua, e ala i le faataunuu o la tatou tiute tauave o le lagolagosua i le galuega a le tagata vāai i aso nei.—Eseki. 33:1-9.

¹⁷ Mataupu 17 ma le 18: E silafia e Ieova o le a teena e le toʻatele lona alofa mutimutivale, ma taumafai e tafiesea ona tagata tapuaʻi faamaoni. O le alofa e uunaʻia ai Ieova e puipuia ona tagata, pe a osofaʻia e “Koku mai i Makoku” i latou e faamaoni iā te ia. O le alofa foʻi mo isi e uunaʻia ai i tatou e lapataʻia le toʻatele e faapea, o le a faaumatia e Ieova ē e sauāina ona tagata.—Eseki. 38:1–39:20; 2 Tesa. 1:6, 7.

¹⁸ Mataupu 19, 20, ma le 21: E matuā faamaonia le alofa o Ieova mo tagata i faaaliga i le vaitafe o loo tafe mai ai vai o le ola, ma le vaevaeina o le laueleele. Ua faamatala i na faaaliga aogā o le alofa silisili o Ieova, e ala i le foaʻi mai o le ola o lona Alo ina ia mafai ona faamagaloina a tatou agasala, ma olioli ai i le ola lelei atoatoa o se vaega o le aiga o le Atua. O se tasi o auala sili e faaalia atu ai lo tatou alofa i tagata, o le taʻu atu lea iā i latou o le lumanaʻi matagofie ua saunia e Ieova mo ē e faatuatua i lona Alo.—Eseki. 45:1-7; 47:1–48:35; Faaa. 21:1-4; 22:17.

19. O le ā o le a faia e Iesu a o faagasolo le Pulega i le Afe Tausaga? (Tagaʻi foʻi i le pusa “Fesagaʻia le Tofotofoga Faaiʻu.”)

¹⁹ A o faagasolo le Pulega a Iesu i le Afe Tausaga, o le a ia toe faatutū le faitau piliona o tagata ua maliliu, ma aveesea tigā na faapogaia e lo tatou ʻfili, o le oti lea.’ (1 Kori. 15:26; Mare. 5:38-42; Galu. 24:15) Ua matuā tofo tagata i tigā talu mai le taimi na agasala ai Atamu ma Eva. Ae o le a laveaʻia e Iesu tagata mai i na tigā, ma ia toe faatutūina ē ua maliliu ma latou maua le avanoa e ola fiafia ai i le lalolagi, e pei o le taimi a o leʻi agasala Atamu ma Eva. E ala i le taulaga togiola, o le a toe faaleleia e Iesu faafitauli uma na māfua ona o faamaʻi, taua, ma oge. Ae e sili atu i lea, o le a ia fesoasoani e liaʻiese ma faaumatia le pogai o o tatou mafatiaga, o le agasala na tuufaasolo mai iā Atamu. (Roma 5:18, 19) O le a “faalēaogāina” atoatoa e Iesu “galuega a le Tiapolo.” (1 Ioa. 3:8) O le ā o le a sosoo ai?

20. O le a faapefea ona faaalia e Iesu ma le 144,000 le lotomaulalo i se auala mataʻina? Faamatala. (Tagaʻi i le ata i luga aʻe o le matua.)

²⁰ Faitau le 1 Korinito 15:24-28. O le a faaalia e Iesu ma le 144,000 e latou te pule faatasi le lotomaulalo i se auala mataʻina, e ala i le toe faafoʻi o le Malo iā Ieova pe a ausia e tagata uma le ola lelei atoatoa ma liua le lalolagi e avea ma Parataiso, e pei o le finagalo o Ieova i le amataga. O le a latou lotomalilie e toe faafoʻi ma le filemu le pule sa iā i latou mo le afe tausaga. O le a tumau e faavavau mea uma e faataunuuina e le Malo.

21, 22. (a) O le ā faapeʻī le lalolagi i le iʻuga o le afe tausaga? (e) Aiseā o le a toe tatala mai ai e Ieova Satani ma temoni?

²¹ O le a sosoo ai ma le faia e Ieova o se mea mataʻina, e iloa ai lona matuā maufaatuatuaina o ona tagata i le lalolagi. O le a ia faatonuina le tatalaina o Satani ma ana temoni mai le tō, lea na saisaitia ai i latou mo le afe tausaga. (Faitau le Faaaliga 20:1-3.) O le a matuā ese le lalolagi ma tagata o le a vaaia e Satani ma ana temoni, mai i le lalolagi sa latou iloaina. A o leʻi gāpā Amaketo, sa faasesēina e Satani le toʻatele ma na fevaevaeaʻi tagata ona o le feitagaʻi ma le faailoga tagata. (Faaa. 12:9) Peitaʻi, o le a tapuaʻi iā Ieova tagata uma o se aiga e autasi ma fealofani i le iʻuga o le afe tausaga. O le a avea le lalolagi ma Parataiso filemu.

²² Aiseā o le a toe tatala mai ai e Ieova i se siʻomaga lelei nei foafoaga fouvale o Satani ma temoni? Talu ai o le toʻatele o tagata  e soifua i le faaiʻuga o le afe tausaga, e leʻi tofotofoina muamua lo latou faamaoni o ni tagata tapuaʻi o Ieova. O le toʻatele o ē o le a toetutū mai i le Parataiso, na maliliu e leʻi iloaina Ieova. E lē gata e foaʻi atu e Ieova le ola iā i latou, ae o le a ia tausia foʻi o latou manaʻoga faaletino ma manaʻoga faaleagaga. E na o aumea lelei o le a latou maua ma e leai ni taaʻiga leaga e latou te fesagaʻia. E siʻomia i latou e tagata e alolofa ma auauna iā Ieova. E ono faia e Satani i ē o le a toetutū mai tuuaʻiga sa ia faia foʻi iā Iopu, e pau le māfuaaga e latou te auauna ai i le Atua ona o loo ia faamanuia ma puipuia i latou. (Iopu 1:9, 10) O lea, a o leʻi tusia e faavavau e Ieova o tatou igoa i le tusi o le ola, o le a ia tuuina mai iā i tatou le avanoa e faamaonia atoatoa atu ai lo tatou faamaoni iā te ia, o lo tatou Tamā ma le Pule Silisili Ese.—Faaa. 20:12, 15.

23. O le ā le tofotofoga o le a feagai ma tagata uma?

 ²³ E puupuu le taimi o le a tuuina atu iā Satani e taumafai ai e taofia tagata mai i le auauna atu i le Atua. E lē taumatea o le a feagai tagata taʻitoʻatasi ma le tofotofoga na fesagaʻia foʻi e Atamu ma Eva. E tatau ona latou filifili pe e talia tapulaa a Ieova, lagolagoina lana pulega ma tapuaʻi iā te ia, po o le tetee i le Atua ma lagolagoina Satani.

24. Aiseā o le a taʻua ai ē o le a fouvale o Koku ma Makoku?

²⁴ Faitau le Faaaliga 20:7-10. Ia mātau, o ē o le a fouvale i le iʻuga o le afe tausaga e taʻua o Koku ma Makoku. O le a latou faaalia uiga e talitutusa ma uiga o tagata fouvale na valoia e Esekielu o le a osofaʻia tagata o le Atua i le puapuaga tele. O lenā vaega e taʻua o “Koku mai i Makoku,” e mai i atunuu eseese e tetee i le pule a Ieova. (Eseki. 38:2) I se tulaga talitutusa, ua taʻua foʻi o “atunuu” i latou o le a fouvale i le iʻuga o le Pulega a Keriso i le Afe Tausaga. E faatupu manatu lenei mea. Aiseā? Talu ai o le a lē toe fevaevaeaʻi tagata ona o le lotonuu a o faagasolo le Afe Tausaga. O le a avea tagata uma ma tagatānuu o le faigāmalo e tasi, o le Malo lea o le Atua. E tasi lava le nuu faaleagaga  o le a tatou iai. O le taʻua la i le valoaga o nei tagata fouvale o Koku ma Makoku, ma faapea mai o i latou o ni atunuu, ua faailoa mai ai o le a taulau Satani i le faatupuina o fevaevaeaʻiga i nisi o tagata o le Atua. O le a lē faamalosia se tasi e ʻau atu iā Satani, ae o le a faia e tagata lelei atoatoa taʻitoʻatasi lana ia lava filifiliga.

25, 26. E toʻafia o le a ʻau atu iā Satani, ma o le ā o le a tupu iā i latou?

²⁵ E toʻafia o le a ʻau atu iā Satani? O le faitau aofaʻi o i latou o le a fouvale o le a “pei o le oneone o le sami.” Peitaʻi, e lē faapea ai o le a matuā toʻatele ni tagata o le a fouvale. E faapefea ona tatou iloa? Seʻi mafaufau i le folafolaga na faia iā Aperaamo. Na fetalai Ieova o le a pei le fanau a Aperaamo “o le oneone o le matafaga.” (Kene. 22:17, 18) Peitaʻi, e na o le 144,001 i latou e faia aʻe ai lana fanau. (Kala. 3:16, 29) E mataʻina lenā aofaʻiga ae e matuā laʻitiiti pe a faatusa i le faitau aofaʻi o tagata. I se tulaga talitutusa, e ui e toʻatele o le a ʻau atu iā Satani, ae e toʻaitiiti pe a faatusatusa atu i ē o le a faamaoni. O le a lē faamataʻuina auauna faamaoni a Ieova ona o ē fouvale.

 ²⁶ O le a vave ona faaumatia ē o le a ʻau atu i ē fouvale. O le a tafiesea i latou e faavavau faatasi ma Satani ma ana temoni, e aunoa ma se faamoemoe. E pau le mea o le a manatua e faavavau, o a latou filifiliga leaga ma iʻuga e oo i ai.—Faaa. 20:10.

27-29. O le ā e mafai ona faatalitalia e i latou e sao mai i le tofotofoga faaiʻu?

²⁷ Ae i le isi itu, o ē o le a sao mai i le tofotofoga faaiʻu o le a tusia e faavavau o latou igoa i “le tusi o le ola.” (Faaa. 20:15) O le iʻuga, o le a autasi le aiga o atalii ma afafine faamaoni o Ieova a o latou avatu le tapuaʻiga e alagatatau iā te ia.

²⁸ Seʻi mafaufau i lenā lumanaʻi. O le a e olioli i galuega faamalieloto ma ni faauōga māfana. O le a lē toe oo ni mafatiaga iā te oe ma ē e pele iā te oe. O le a mafai ona e tū atu lava oe i luma o Ieova o se tagata lelei atoatoa e aunoa ma se agasala. O le a lē toe iai se mea e faalavelavea ai le faauōga a le Atua ma tagata uma. Ae o le vala e sili ona tāua, o le a faatinoina i se auala lelei atoatoa le tapuaʻiga mamā i le lagi ma le lalolagi. Ioe, o le faafoʻisiaina atoatoa lenā o le tapuaʻiga mamā!

²⁹ Po o le a e iai i inā e molimauina lenā aso sili? E mafai ona tupu lenā mea, pe a faaauau ona e faatatauina lesona autū e tolu mai i le tusi o Esekielu: Ia avatu le tapuaʻiga tau lava o Ieova, ia tumau ona autasi i le tapuaʻiga mamā, ma ia faaalia le alofa i isi.  Peitaʻi, e toe tasi lava le lesona tāua e mafai ona aʻoaʻoina mai i valoaga a Esekielu. O le ā lenā lesona?

30, 31. O le ā le uiga o le faalauiloaga “ona latou iloa ai lea o aʻu lava o Ieova” (a) mo fili o le Atua? (e) mo tagata o le Atua?

³⁰ E tele taimi o loo taʻua ai i le tusi o Esekielu le faalauiloaga lenei: “Ona latou iloa ai lea o aʻu lava o Ieova.” (Eseki. 6:10; 39:28) O lenā faalauiloaga e iʻu atu i se taua ma le faaumatiaga mo fili o le Atua. E lē gata o le a latou iloa ai o loo soifua Ieova, ae o le a faamalosia i latou e iloaina i se auala tigā le uiga lenei o lona suafa sili: “E Gaoioi o Ia e Tusa ai ma Tulaga Manaʻomia.” O le a gaoioi “Ieova o ʻau” o se “toa malosi” e faasagatau iā i latou. (1 Samu. 17:45; Eso. 15:3) E oo ane i lenā taimi, ua tuai ona latou malamalama i le upu moni tāua lenei e faatatau iā Ieova: E leai se mea e taofia o ia mai i le faataunuuina o lona finagalo.

³¹ Ae i le isi itu, o le faalauiloaga “ona latou iloa ai lea o aʻu lava o Ieova,” e iʻu atu ai i le mauaina e tagata o le Atua o le filemu ma le ola. O le a gaoioi Ieova e faataunuu lona finagalo mo i tatou e pei ona iai i le amataga, o le avea o ni ana fanau e faaatagia atoatoa atu ona uiga. (Kene. 1:26) Ua avea Ieova i le taimi lenei ma o tatou Tamā alofa ma se Leoleo Mamoe e puipuia i tatou. Peitaʻi, ua toe o se aga ona avea lea o ia ma o tatou Tupu manumalo. A o leʻi oo mai lenā aso, seʻi faaauau ona faatāua i o tatou loto le feʻau a Esekielu. Seʻi faamaonia atu i a tatou upu ma gaoioiga i aso taʻitasi, e tatou te iloa Ieova ma le ituaiga Atua e iai o ia. O le faia faapea, o le a tatou lē fefefe ai pe a tatala mai matagi o le faaumatiaga o le puapuaga tele. Peitaʻi, o le a ea i luga o tatou ulu auā ua tatou iloa ua lata ona laveaʻiina i tatou. (Luka 21:28) Ae i le taimi lenei, tau ina ia tatou fesoasoani i tagata uma ina ia latou iloa ma alolofa i le Atua e toʻatasi e tatau i ai le tapuaʻiga, o Lē e ou le suafa silisili o Ieova.—Eseki. 28:26.