1-3. O le ā le auala na faifai ai tagata Papelonia i tagata tapuaʻi o Ieova, ma aiseā?

 SEʻI faapea o oe o se tagata Iutaia faamaoni o loo e nofo i le aai o Papelonia, ma ua pe ā ma le 50 tausaga talu ona faaaunuua lou nuu i inā. O lau masani i le Sapati le feiloaʻi ma ou uso talitonu e tapuaʻi iā Ieova. A o e agaʻi atu i magāala tumutumu, ua e vaaia ai le tele o malumalu ma nofoaga paia. Ua lolofi atu tagata i na nofoaga e faia ai taulaga ma usuina viiga i atua e pei o Marota.

² A o e agaʻi ese mai i le mea o loo tumutumu ai tagata, ua outou feiloaʻi nei ma se vaega toʻaitiiti o uso tapuaʻi. * Ua outou maua se nofoaga toʻafilemu, atonu o tala ane o se vaitafe o le aai, ma ua outou tatalo faatasi, usuina viiga i le Atua, ma manatunatu i lana Afioga. A o faia la outou tatalo, e tou te lagona atu le ʻoʻī o vaa laupapa o loo taula i le pito o le vaitafe. Ua e fiafia ua maua se nofoaga filemu e potopoto ai, ma faamoemoe o le a lē faalavelave ane tagata o le aai i la outou faatasiga e pei ona masani ai. Aiseā e faia ai e tagata o le aai lenā mea?

³ E tele taua na manumalo ai Papelonia, ma e viiviia e tagata o latou atua sesē i le malosi o lo latou aai. Sa manatu tagata  Papelonia, o le faaumatiaga o Ierusalema ua faamaonia ai e malosi atu lo latou atua o Marota nai lo o Ieova. O lea, ua latou faifai ai i lou Atua ma lona nuu. O nisi taimi e latou te faapea atu ma le aamu: “Ia outou usu mai iā i matou se pese o Siona.” (Sala. 137:3) O le tele o salamo, o loo viiviia ai le manumalo o Siona po o Ierusalema i fili o Ieova. Atonu la o salamo na o loo aamu ai tagata Papelonia. Peitaʻi, o nisi salamo e faatatau atu i tagata Papelonia. O se faaaʻoaʻoga, ua faapea mai se tasi salamo: “Ua latou faia foʻi Ierusalema ma faupuʻega o mea ua faatafunaina. . . . Ua tauemu ma faifai mai ē o loo siʻomia i matou.”—Sala. 79:1, 3, 4.

4, 5. O le ā le faamoemoe na aumaia e le valoaga a Esekielu, ma o le ā o le a tatou iloiloina i lenei mataupu? (Tagaʻi i le ata i luga aʻe o le matua.)

⁴ Sa iai foʻi tagata Iutaia ua liliuese mai i le upu moni, o ē na vave ona tauemu atu ona o lou faatuatua iā Ieova ma ana perofeta. E ui i na tauemuga, ae ua faamāfanafanaina oe ma lou aiga ona o le tapuaʻiga mamā. E lagona le fiafia a o tatalo ma pepese faatasi, ma e faatoʻafilemuina outou i le faitauina o le Afioga a le Atua. (Sala. 94:19; Roma 15:4) Seʻi faapea ua sau so outou uso tapuaʻi i lenā aso ma aumai se mea faapitoa i la outou faatasiga, o le tusi tāʻai lea o loo iai valoaga a Esekielu. Ua matuā faafiafiaina oe i le faalogo atu i le folafolaga a Ieova, o le a ia faafoʻisia ona tagata i lo latou atunuu. Ua faagaeetia lou loto a o faitau leotele mai lenā valoaga, ma ua e manatunatu i le aso o le a outou toe foʻi ai ma lou aiga ma faia so outou sao i lenā taimi mataʻina o le toe faafoʻisiaga!

⁵ E anoanoaʻi folafolaga o le toe faafoʻisiaga o loo iai i valoaga a Esekielu. Seʻi o tatou iloiloina lenā matua o loo aumaia ai se faamoemoe. Na faapefea ona faataunuuina na folafolaga i ē na ave faapagota? O le ā le uiga o na valoaga mo aso nei? O le a tatou iloiloina foʻi se faataunuuga faaiʻu o na valoaga i le lumanaʻi.

6. Na faapefea ona lapataʻia pea e le Atua ona tagata fouvale?

⁶ Na faailoa manino e Ieova i ona tagata e ala mai iā Esekielu, le auala o le a ia faasalaina ai i latou ona o lo latou fouvale. Na fetalai Ieova: “O le a tuliesea i latou ma ave faapagota.” (Eseki. 12:11) E pei ona talanoaina i le Mataupu 6 o lenei lomiga, na faia e Esekielu faatinoga mo lenā faasalaga. Peitaʻi, e lē o le taimi muamua lea na aumaia ai na lapataʻiga. Talu mai aso o Mose i le toetoe afe tausaga muamua atu, na lapataʻia ai e Ieova ona tagata o le a aveina faapagota i latou pe a faaauau ona latou fouvale iā te ia. (Teu. 28:36, 37) Na aumaia foʻi e perofeta o Isaia ma Ieremia na lava lapataʻiga.—Isa. 39:5-7; Iere. 20:3-6.

7. Na faapefea ona faasalaina e Ieova ona tagata?

⁷ E faanoanoa ona sa faataligatuli le toʻatele i na lapataʻiga. Na nutimomoia faalogona o Ieova ona o le fouvale, ifo i tupua, lē  faamaoni ma amioga leaga a lona nuu ona o taaʻiga lē lelei a leoleo mamoe leaga. O lea na latou mafatia ai i le oge, o se mea na puapuagatia ma faalumaina ai i latou pe a fua i lo latou laueleele lea sa “tafe ai le suāsusu ma le meli.” (Eseki. 20:6, 7) E pei ona loa ona valoia mai, na sosoo ma le faatagaina e Ieova o le faasalaina o ona tagata fouvale e ala i le aveina faapagota. I le 607 T.L.M., na iʻu lava ina faaumatia Ierusalema ma lona malumalu e Nepukanesa mai i Papelonia. O le faitau afe o tagata Iutaia na sao mai i le faaumatiaga, na ave faapagota i Papelonia. O i inā na latou mafatia ai i tauemuga ma teteega na faamatalaina i le amataga o lenei mataupu.

8, 9. Na faapefea ona lapataʻia e le Atua le faapotopotoga Kerisiano e faatatau i ē ua liliuese mai i le upu moni?

⁸ Pe na iai se mea na tupu i le faapotopotoga Kerisiano na taitutusa ma le faaaunuua i Papelonia? Ioe na iai! I le pei o tagata Iutaia anamua, ua leva ona lapataʻia soo o Keriso. Na fetalai Iesu i le amataga o lana faiva: “Ia mataala pea i perofeta pepelo, o ē e ō mai iā te outou i ofu mamoe, a o totonu o luko feʻai lava i latou.” (Mata. 7:15) I tausaga mulimuli ane, na faagaeeina foʻi le aposetolo o Paulo e tusia se lapataʻiga faapena: “Ua ou iloa pe a ou alu ese, ona ō mai lea o luko feʻai iā te outou, ma e latou te lē faapelepeleina le lafu, ma e maua foʻi iā te outou ni tane e latou te faauiga sesē mea, ina ia taaʻina ese ai soo e mulimuli atu iā i latou.”—Galu. 20:29, 30.

⁹ Na aʻoaʻoina Kerisiano i le auala e mātaulia ma ʻalofia ai na tane leaga. Na faatonuina foʻi toeaina Kerisiano e aveesea mai i le faapotopotoga ē ua liliuese mai i le upu moni. (1 Timo. 1:19; 2 Timo. 2:16-19; 2 Pete. 2:1-3; 2 Ioa. 10) Ae i le pei o Isaraelu ma Iuta anamua, na faasolosolo ona faataligatuli le toʻatele o Kerisiano i na lapataʻiga alofa. E oo ane i le faaiʻuga o le uluaʻi senituri, ua aafia le faapotopotoga i ē ua liliuese mai i le upu moni. O Ioane le aposetolo mulimuli sa soifua pea e oo i le faaiʻuga o le senituri muamua T.A., ma na ia mātauina le mafatia o le faapotopotoga i taaʻiga leaga ma le faateteleina o le fouvale. O ia le aposetolo mulimuli sa totoe na taofiofia na faiga leaga i le faapotopotoga. (2 Tesa. 2:6-8; 1 Ioa. 2:18) O le ā na tupu ina ua maliu Ioane?

10, 11. O le ā le faataunuuga o le talafaatusa a Iesu i saito ma vao leaga i le senituri lona lua T.A. ma faasolo mai ai?

¹⁰ Na amata ona faataunuu le talafaatusa a Iesu i saito ma vao leaga ina ua maliu Ioane. (Faitau le Mataio 13:24-30.) E pei ona muaʻi silafia e Iesu, na lūlūina e Satani “vao leaga” po o Kerisiano faatagāfai i totonu o le faapotopotoga, ma na vave ona faaleagaina le faapotopotoga. Pagā le nutimomoia o faalogona o Ieova i lona silasila mai i le faapotopotoga na faavaeina e lona Alo, ae ua faaleagaina i ifoga tupua, o faiga ma aso faamanatu faapaupau, ma aʻoaʻoga sesē ia na aʻoaʻoina e le ʻaufaitofā e lē matataʻu i le Atua ma lotu faapaupau! O le ā la na faia e Ieova? E pei ona ia  faia i le nuu lē faamaoni o Isaraelu, na ia faataga lona nuu ina ia faaaunuua. I le pe tusa o le senituri lona lua T.A. ma faaauau mai ai, na faigatā ona mātaulia ē e pei o ni saito ona o le toʻatele o Kerisiano faatagāfai. O le mea moni, o le taimi lenā na faaaunuua ai le faapotopotoga o Kerisiano moni i Papelonia le Aai Tele, po o le emepaea o lotu sesē uma o le lalolagi, ma ua faatasi atu ai Kerisiano faatagāfai i lenā emepaea leaga. A o faatoʻateleina Kerisiano faatagāfai, na aliaʻe mai loa lotu ua faapea mai o Kerisiano.

¹¹ A o malolosi taaʻiga a lotu ua faapea mai o Kerisiano i na tausaga faigatā, na iai lava nisi Kerisiano moni po o “saito” i le talafaatusa a Iesu. Na latou manatua le Atua moni, e pei o tagata Iutaia na faaaunuua o loo faamatalaina i le Esekielu 6:9. Na lototetele nisi e teena aʻoaʻoga sesē a lotu ua faapea mai o Kerisiano. Na tauemua ma sauāina i latou. Po o le a tuua e faavavau e Ieova ona tagata i lenā tulaga pogisa faaleagaga? E leai! E pei ona sa ia faia iā Isaraelu anamua, na talafeagai lelei le auala ma le umi na faaalia ai e Ieova lona toʻasā. (Iere. 46:28, fpl.) E lē gata i lea, e leʻi tuua e Ieova ona tagata e aunoa ma se faamoemoe.  Seʻi o tatou toe talanoa e faatatau i tagata Iutaia na ave faapagota i Papelonia anamua, ma vaai pe na faapefea ona faailoa atu e Ieova iā i latou le faamoemoe o le a faaiʻuina lo latou tulaga faaaunuua.

12, 13. Aiseā na uma ai le toʻasā o Ieova i ona tagata na faaaunuua i aso o Esekielu?

¹² Na fetalai saʻo Ieova e faatatau i lona toʻasā i lona nuu, ae na ia faamautinoa atu foʻi o le a lē tumau e faavavau lona toʻasā amiotonu. O se faataʻitaʻiga, ia mātau ana fetalaiga: “Ona uma ai lea o loʻu ita, o le a faaitiitia foʻi loʻu ita tele iā i latou, ma o le a faamalieina ai aʻu. Pe a uma ona faaoo loʻu ita tele iā i latou, ona latou iloa ai lea o aʻu lava o Ieova, ma ua ou fai atu ma loʻu maumauaʻi e tapuaʻi mai tau lava o aʻu.” (Eseki. 5:13) Aiseā o le a uma ai le toʻasā o Ieova?

¹³ Na iai tagata Iutaia faamaoni na ave faapagota faatasi ma tagata Iutaia lē faamaoni. E lē gata i lea, na valoia e le Atua e ala iā Esekielu o le a iai nisi o lona nuu o le a salamō a o faaaunuua. O le a manatua e na tagata Iutaia salamō mea matagā na latou faia e fouvale ai i lo latou Atua, ma latou ʻaiʻoi atu iā Ieova mo  lana faamagaloga ma lona finagalo malie. (Eseki. 6:8-10; 12:16) O Esekielu o se tasi o na tagata faamaoni, faapea foʻi ma le perofeta o Tanielu ma ana aumea e toʻatolu. O le mea moni, na umi ona soifua Tanielu ma ia molimauina ai le amataga ma le faaiʻuga o le faaaunuua o tagata Iutaia. O loo faamauina i le Tanielu mataupu e 9 lana tatalo faatauanau o le salamō ona o agasala a Isaraelu. E mautinoa o ona faalogona, na faaatagia mai ai faalogona o le faitau afe o ē na ave faapagota na naunau i le faamagaloga a Ieova ma ana faamanuiaga. Maʻeu le faagaeetia o i latou i folafolaga a Esekielu i le faasaʻolotoina o i latou ma le toe faafoʻisiaga!

14. Aiseā na toe faafoʻisia ai e Ieova ona tagata i o latou laueleele?

¹⁴ Peitaʻi, e iai se isi vala e sili atu ona tāua i le faasaʻolotoina ma le toe faafoʻisia o tagata o Ieova. O le a faamutaina le taimi umi na faaaunuua ai i latou ona ua oo i le taimi a Ieova e faapaia ai lona suafa i luma o atunuu uma, ae e lē ona ua tatau ona faasaʻolotoina i latou. (Eseki. 36:22) O le a iloa ai e tagata Papelonia, e matuā lē faatusalia o latou atua sesē e pei o Marota i le Alii Pule Silisili Ese o Ieova! Seʻi o tatou iloiloina ni folafolaga se lima na faagaeeina e Ieova Esekielu e faailoa atu i ē na latou faaaunuua faatasi. Muamua, o le a tatou iloiloina po o le ā le tāua o nei folafolaga taʻitasi i na tagata faamaoni. Lua, o le a tatou tilofaʻia faataunuuga sili o na folafolaga.

15. O ā suiga tau tapuaʻiga o le a faia e ē o le a toe foʻi?

¹⁵ FOLAFOLAGA 1. E lē toe iai ni ifoga tupua po o faiga inosia e fesootaʻi atu i lotu sesē. (Faitau le Esekielu 11:18; 12:24.) E pei ona talanoaina i le Mataupu 5 o lenei lomiga, na faaleagaina Ierusalema ma lona malumalu i tū a lotu sesē e pei o le ifo i tupua. O lea, na agasala ai le nuu ma vavaeese mai iā Ieova. Na valoia e Ieova e ala mai iā Esekielu, e tulimataʻia e ē na faaaunuua le taimi e toe fai ai so latou sao i le tapuaʻiga mamā ma lē ponā. Na faalagolago  isi faamanuiaga uma o le toe faafoʻisiaga i le vala tāua lenei: o le toe faafoʻisia o le faatulagaga a le Atua mo le tapuaʻiga mamā.

16. O le ā le folafolaga a Ieova e faatatau i le laueleele o le a toe foʻi i ai ona tagata?

¹⁶ FOLAFOLAGA 2. O le a toe foʻi i lo latou atunuu. Na fetalai Ieova i ē na faaaunuua: “O le a ou tuuina atu iā te outou le laueleele o Isaraelu.” (Eseki. 11:17) E mataʻina lenā folafolaga, auā e leʻi faia e tagata Papelonia o ē na faifai i tagata o le Atua na faaaunuua, se faamatalaga o le a latou toe foʻi atu i lo latou atunuu pele. (Isa. 14:4, 17) E lē gata i lea, pe a tumau faamaoni ē o le a toe foʻi, o le a lauolaola ma fua tele mai le laueleele e latou te galueaʻiina ma maua ai meaʻai. O le a lē toe pagatia ma faalumaina i latou i se oge.—Faitau le Esekielu 36:30.

17. O le ā na faailoa mai e faatatau i taulaga iā Ieova?

¹⁷ FOLAFOLAGA 3. Toe faaauau le faia o taulaga i le fata faitaulaga a Ieova. E pei ona taʻua i le Mataupu 2 o lenei lomiga, e tusa ai ma le Tulafono sa avea taulaga o se vaega tāua o le tapuaʻiga mamā. O le a talia e Ieova taulaga a i latou o le a toe foʻi pe a faaauau ona usiusitaʻi ma mamā faaleagaga. O le faia faapea, na fai ai e tagata le togisala mo a latou agasala ma vavalalata atu ai i lo latou Atua. Na folafola atu e Ieova: “O i inā e auauna mai ai iā te aʻu le aiga atoa o Isaraelu, o i latou uma i le atunuu. O i inā ou te fiafia ai iā te outou, ma o le a ou tāpā ai a outou foaʻi ma uluaʻi fua o a outou taulaga, mai i a outou mea paia uma.” (Eseki. 20:40) O le a toe faafoʻisia le tapuaʻiga mamā ma maua e tagata o le Atua faamanuiaga.

18. O le a faapefea ona leoleoina e Ieova ona tagata?

¹⁸ FOLAFOLAGA 4. Le aveesea o leoleo mamoe leaga. O se tasi o māfuaaga autū na faia ai e tagata o le Atua agasala matuiā, ona o taaʻiga a tane leaga na taʻimua iā i latou. Na folafola mai e Ieova o le a ia suia lenā tulaga. O lana folafolaga lenei e faatatau i na leoleo mamoe leaga: “Ou te lē toe faatagaina i latou e fafaga aʻu  mamoe . . . O le a ou laveaʻia aʻu mamoe mai i o latou gutu.” Peitaʻi, na faamautinoa mai e Ieova i ona tagata faamaoni: “O le a ou tausia aʻu mamoe.” (Eseki. 34:10, 12) O le a faapefea ona ia faia lenā mea? O le a ia faaaogāina tane faamaoni e avea ma leoleo mamoe.

19. O le ā le folafolaga a Ieova e faatatau i le autasi?

¹⁹ FOLAFOLAGA 5. O le a autasi tagata tapuaʻi o Ieova. Seʻi manatu i le fememeaʻi o tagata tapuaʻi faamaoni a o vaaia le lē autasi o tagata o le Atua a o leʻi faaaunuua i latou. O taaʻiga a perofeta pepelo ma leoleo mamoe leaga, na tetee ai tagata i perofeta faamaoni na auina mai e Ieova ma na fevaevaeaʻi ai le nuu. Peitaʻi, o se tasi o vala iloga o le toe faafoʻisiaga, o le folafolaga lenei na faailoa atu iā Esekielu: “O le a ou tuuina atu iā i latou le loto e tasi, ma o le a ou tuuina i totonu o i latou se agaga fou.” (Eseki. 11:19) Pe afai e tumau ona autasi tagata Iutaia o le a toe foʻi, ma tumau ona autasi ma Ieova le Atua, o le a lē mafai e ē tetee ona faatoʻilaloina i latou. O le a mafai ona latou toe faamamaluina Ieova o se nuu nai lo o le faalumaina o ia.

20, 21. Na faapefea ona faataunuuina folafolaga a le Atua i ē na faaaunuua na toe foʻi?

 ²⁰ Pe na faataunuuina na folafolaga e lima i tagata Iutaia na toe foʻi mai i le faaaunuua i Papelonia? E tāua ona tatou manatua upu a le auauna faamaoni o Iosua: “E leʻi iʻuvale se upu e tasi o folafolaga lelei uma na fetalai mai ai Ieova lo outou Atua iā te outou. Ua faataunuuina uma iā te outou. E leʻi iʻuvale se tasi o na upu.” (Iosua 23:14) E pei ona moni na upu i aso o Iosua, o le a faataunuuina moni foʻi i aso o ē na faaaunuua o le a toe foʻi i lo latou atunuu.

²¹ Na tuua e tagata Iutaia le ifo i tupua ma isi faiga matagā a lotu sesē ia na vavaeesea ai i latou mai iā Ieova. Sa latou toe foʻi i lo latou atunuu, toe atiaʻe o latou olaga ma ola fiafia ai i inā e ui o se mea na foliga mai e lē mafai ona tupu. O se tasi o mea muamua na latou faia, o le toe fausia lea o le fata faitaulaga a Ieova i Ierusalema ma faia ai taulaga i inā. (Esera 3:2-6) Na faamanuia Ieova iā i latou e ala i leoleo mamoe lelei faaleagaga, e pei o le ositaulaga faamaoni ma le tusiupu o Esera, o kovana o Neemia ma Serupapelu, le Ositaulaga Sili o Iosua ma perofeta  lototetele o Hakai, Sakaria ma Malaki. Na olioli tagata i le autasi e latou te leʻi mauaina mo se taimi umi, pe a faaauau ona latou talia le taʻitaʻiga faaleagaga na latou mauaina.—Isa. 61:1-4; faitau le Ieremia 3:15.

22. E faapefea ona iloa o uluaʻi faataunuuga o valoaga o le toe faafoʻisiaga ua na o se faataʻimuaga o se mea e sili atu?

²² O se faalaeiauga le talanoaina o le uluaʻi faataunuuga o folafolaga a Ieova e faatatau i le toe faafoʻisiaga. Peitaʻi, o lenā faataunuuga ua na o se faataʻimuaga o se mea e sili atu. E faapefea ona tatou iloa? Sa iai tuutuuga o na folafolaga. Na faatoʻā faataunuu e Ieova na folafolaga pe afai e tumau ona usiusitaʻi ma gauaʻi tagata. A o faagasolo taimi, na toe fouvale ma lē usiusitaʻi tagata Iutaia. Ae e pei ona faailoa mai e Iosua, e taunuu lava afioga a Ieova. O lea, e iai se faataunuuga tumau ma sili atu o na folafolaga. Seʻi o tatou iloiloina lenā manatu.

23, 24. O anafea ma na faapefea ona amata “le taimi e toe faafoʻisia ai mea uma”?

²³ I le avea ai ma tagata suʻesuʻe o le Tusi Paia, ua tatou iloa na amata aso faaiʻu o lenei faiga leaga o mea i le 1914. Ae mo auauna a Ieova, o nei aso faaiʻu e lē o se taimi e faanoanoa ai. Ua faailoa mai e le Tusi Paia, o le 1914 o le amataga lea o se vaitaimi mataʻina o “le taimi e toe faafoʻisia ai mea uma.” (Galu. 3:21) E faapefea ona tatou iloa lenā mea? O le ā na tupu i le lagi i le 1914? O le tausaga lenā na avea ai Iesu Keriso ma Tupu faa-Mesia! Na faapefea ona avea lenā mea o se toe faafoʻisiaga? Ia manatua, na folafola atu e Ieova i le tupu o Tavita o le a tumau e faavavau le nofoaiga tautupu mai i lona gafa. (1 No. 17:11-14) Na taofia mo se taimi lenā nofoaiga tautupu i le 607 T.L.M., ina ua faaumatia Ierusalema e Papelonia ma faamuta ai pulega a tupu mai i le gafa o Tavita.

²⁴ I le avea ai o Iesu ma “Atalii o le tagata,” na tupuga mai o ia iā Tavita ma avea ai o ia ma suli aloaʻia o le nofoaiga tautupu a  Tavita. (Mata. 1:1; 16:13-16; Luka 1:32, 33) I le 1914, ina ua tuuina atu e Ieova iā Iesu le nofoālii faalelagi, na amata ai loa “le taimi e toe faafoʻisia ai mea uma.” Ua mafai nei e Ieova ona faaaogā lenā Tupu lelei atoatoa e faaauauina le galuega o le toe faafoʻisiaga.

25, 26. (a) O anafea na faaiʻuina ai le taimi umi o le faaaunuua i Papelonia le Aai Tele, ma e faapefea ona tatou iloa? (Tagaʻi foʻi i le pusa “Aiseā e Iloga ai le 1919?”) (e) O le ā na amata ona faataunuuina i le 1919 ma faasolo mai ai?

²⁵ O se tasi o gaoioiga muamua na faia e Keriso i le avea ai ma Tupu, o le faatasi atu i lona Tamā i le asiasia o le faatulagaga mo le tapuaʻiga mamā i le lalolagi. (Mala. 3:1-5) E pei ona valoia e Iesu i lana talafaatusa i le saito ma vao leaga, na umi se taimi e lē mafai ona iloa le eseesega o saito mai i vao leaga, po o le eseesega o Kerisiano moni faauuina mai i Kerisiano faatagāfai. * Peitaʻi, na manino lenā eseesega ina ua amata le vaitau o le seleselega i le 1914. I le faitau sefulu tausaga a o leʻi oo i le 1914, na faaalialia ai e Tagata Aʻoga o le Tusi Paia mea sesē matuiā a lotu ua faapea mai o Kerisiano, ma amata ai ona vavaeesea i latou mai i lenā faalapotopotoga leaga. Ua oo i le taimi a Ieova e toe faafoʻisia atoatoa ai i latou. I le amataga o le 1919, i ni nai tausaga talu ona amata “le tau e selesele ai,” na faasaʻolotoina atoatoa ai tagata o le Atua mai i le saisaitia i Papelonia le Aai Tele. (Mata. 13:30) Ua māeʻa le taimi na faaaunuua ai!

²⁶ Ua amata nei ona vaaia le faataunuuga sili o valoaga a Esekielu e faatatau i le toe faafoʻisiaga, lea e leʻi vaaia muamua e tagata o le Atua i aso anamua. O lea, seʻi o tatou talanoaina faataunuuga sili o folafolaga e lima ia na tatou iloiloina.

27. Na faapefea ona faamamāina e le Atua ona tagata mai i le ifo i tupua?

²⁷ FOLAFOLAGA 1. Lē toe faia ifoga tupua ma isi faiga inosia faalotu. I le faaiʻuga o le senituri lona 19 ma le amataga o le senituri lona 20, na faapotopoto faatasi ai Kerisiano faamaoni ma amata ona lafoaʻia faiga sesē faalotu. Na latou tuua aʻoaʻoga e lē faale-Tusi Paia na tupuga mai i lotu sesē, e pei o le tapuaʻia o le Atua  tolutasi, ola pea o le agaga o le tagata pe a oti, ma le afi i seoli. Na latou faaalialia foʻi, o le ifo i tupua le faaaogā o faatusa i tapuaʻiga. E lē gata i lea, na faasolosolo ona iloa e tagata o le Atua, o le ifo i tupua le faaaogā o koluse i tapuaʻiga.—Eseki. 14:6.

28. O le ā le itu na toe faafoʻisia ai tagata o Ieova i lo latou laueleele?

²⁸ FOLAFOLAGA 2. O le toe faafoʻisia o tagata o le Atua i le laueleele faaleagaga. A o tuua e Kerisiano faamaoni lotu a Papelonia le Aai Tele, na latou maua ai se laueleele faaleagaga lelei, o se tulaga po o se siʻomaga faamanuiaina lea e latou te lē toe mafatia ai i se oge faaleagaga. (Faitau le Esekielu 34:13, 14.) E pei ona o le a talanoaina i le Mataupu 19 o lenei lomiga, ua faamanuia Ieova i lenā laueleele e ala i le tele o taumafa faaleagaga.—Eseki. 11:17.

29. Na faapefea ona uunaʻia e uso le galuega talaʻi i le 1919?

²⁹ FOLAFOLAGA 3. Toe faaauau le faia o taulaga i le fata faitaulaga a Ieova. I le uluaʻi senituri T.A., na aʻoaʻoina ai Kerisiano e  ofo atu taulaga i le Atua, e lē o ni taulaga e faia i manu ae o taulaga e sili atu ona tautele, o a latou faaupuga e viia ai Ieova ma talaʻi ai i isi e faatatau iā te ia. (Epe. 13:15) A o faagasolo le tele o tausaga na faaaunuua ai, e leʻi iai se faatulagaga maopoopo e faia ai na taulaga. Peitaʻi, e oo ane i le faaiʻuga o le taimi na faaaunuua ai, ua faia e tagata o le Atua taulaga o viiga. Ua latou pisi i le galuega talaʻi ma vivii atu ma le fiafia i le Atua i a latou sauniga. Na amata mai i le 1919 ona matuā faatāua e “le pologa faamaoni ma le faautauta” le galuega talaʻi ma faamaopoopoina lelei. (Mata. 24:45-47) A o faatoʻateleina tagata e viiviia le suafa paia o Ieova, ua faatumulia ai lona fata faitaulaga i le tele o taulaga.

30. O le ā na faia e Iesu ina ia maua ai e ona tagata ni leoleo mamoe lelei?

³⁰ FOLAFOLAGA 4. Le aveesea o leoleo mamoe leaga. Na faasaʻoloto e Keriso tagata o le Atua mai i leoleo mamoe leaga ma manatu faapito o lotu ua faapea mai o Kerisiano. Na aveesea mai i le lafu a Keriso leoleo mamoe na faataʻitaʻi i na leoleo mamoe leaga. (Eseki. 20:38) I le avea ai o Iesu ma Leoleo Mamoe Lelei, na ia faamautinoa e tausia lelei ana mamoe. Na ia tofia lana pologa faamaoni ma le faautauta i le 1919. O lenā vaega toʻaitiiti o Kerisiano faauuina faamaoni, sa taʻimua i le sauniaina o meaʻai faaleagaga auā le fafagaina lelei o tagata o le Atua. A o faagasolo taimi, sa toleniina toeaina e fesoasoani i le tausia o “le lafu mamoe a le Atua.” (1 Pete. 5:1, 2) O upu faagaeeina o loo i le Esekielu 34:15, 16, e masani ona faamanatu ai i leoleo mamoe Kerisiano le tapulaa ua faataatia e Ieova le Atua ma Iesu Keriso.

31. Na faapefea ona faataunuu e Ieova le valoaga o loo i le Esekielu 11:19?

³¹ FOLAFOLAGA 5. O le a autasi tagata tapuaʻi o Ieova. A o faagasolo tausaga, na taapeape lotu ua faapea mai o Kerisiano ma faia aʻe ai le faitau afe o lotu ma vaega ua matuā fevaevaeaʻi. Ae i se faaeseesega, na faia e Ieova se vavega ofoofogia i ona tagata ua toe faafoʻisia. Ua faataunuuina i se auala mataʻina lana folafolaga na faia e ala mai iā Esekielu: “O le a ou tuuina atu iā i latou le loto e tasi.” (Eseki. 11:19) I le lalolagi aoao, e faitau miliona soo o Keriso ma e eseese uma talaaga o o latou soifuaga, tapuaʻiga sa iai, tamaoaiga, ma atunuu. E ui i lea, e tutusa upu moni o loo latou aʻoaʻoina ma e tutusa le galuega o loo latou faataunuuina ma le autasi. I le pō faaiʻu o Iesu i le lalolagi, na ia tatalo faatauanau ai ina ia autasi ona soo. (Faitau le Ioane 17:11, 20-23.) Ua faataunuuina e Ieova lenā talosaga i se auala e sili ona mataʻina i aso nei.

32. O ā ni ou faalogona i le faataunuuga o valoaga o le toe faafoʻisiaga? (Tagaʻi foʻi i le pusa “Valoaga o le Faaaunuua ma le Toe Faafoʻisiaga.”)

³² Pe e lē faafiafiaina ea oe i lo tatou ola ai i nei taimi mataʻina o le toe faafoʻisiaga? Ua tatou vaaia le faataunuuga o valoaga a Esekielu i so o se vala o la tatou tapuaʻiga i aso nei. E tatou te mautinoa i le silasila mai o Ieova ma lona finagalo malie i ona tagata, e pei ona ia valoia mai e ala iā Esekielu: ʻO le a ou fiafia iā  te outou.’ (Eseki. 20:41) Pe e lē o se faaeaga ea le avea o oe ma se vaega o tagata e autasi ma tausia lelei o loo viia Ieova i le lalolagi aoao, o ē ua faasaʻoloto mai i le faaaunuua faaleagaga mo le tele o senituri? Peitaʻi, e iai lava nisi valoaga a Esekielu o le toe faafoʻisiaga, e iai o latou faataunuuga sili i le lumanaʻi.

33-35. (a) O le ā le uiga o le valoaga o loo i le Esekielu 36:35 mo tagata Iutaia na faaaunuua? (e) O le ā le uiga o lenā valoaga mo tagata o Ieova i aso nei? (Tagaʻi foʻi i le pusa “Le Taimi e Toe Faafoʻisia ai Mea Uma.”)

³³ E pei ona tatou talanoaina, o “le taimi e toe faafoʻisia ai mea uma” na amata i le toe faafoʻisia o le gafa tautupu o Tavita ina ua nofotupu Iesu i le 1914. (Eseki. 37:24) Na sosoo ai ma le avatu e Ieova o le pule iā Keriso e toe faafoʻisia ai le tapuaʻiga mamā a Ona tagata, ina ua mavae le tele o senituri na faaaunuua ai faaleagaga. Ae pe e gata ai i inā galuega a Keriso o le toe faafoʻisiaga? E leai! O le a faaauau lenā galuega i se auala mataʻina i le lumanaʻi, ma na faailoa mai i valoaga a Esekielu nisi o faamatalaga faaoso naunau.

³⁴ O se faaaʻoaʻoga, seʻi manatu i upu faagaeeina nei: “Ona faapea ane lea o tagata: ʻUa avea le laueleele na faatafunaina e pei o le faatoʻaga o Etena.’” (Eseki. 36:35) O le ā le uiga o lenā folafolaga mo Esekielu ma ē na latou faaaunuua faatasi? E mautinoa e latou te leʻi faatalitalia se faataunuuga atoatoa faaletino o lenā folafolaga, o le toe faafoʻisia o le laueleele ia pei o le uluaʻi faatoʻaga po o le Parataiso, lea na totōina e Ieova lava ia! (Kene. 2:8) Nai lo o lea, na latou malamalama o loo faamautinoa atu e Ieova o le a matagofie ma fua tele mai le laueleele o le a toe faafoʻisia i ai i latou.

³⁵ O le ā le uiga o lenā folafolaga mo i tatou i aso nei? E tatou te lē faatalitalia se faataunuuga faaletino o lenā folafolaga i aso nei, i se lalolagi leaga o loo pulea e Satani le Tiapolo. Nai lo o lea, e tatou te iloa e iai sona faataunuuga faaleagaga i aso nei. I le avea ai ma auauna a Ieova, ua tatou nofoia se laueleele faaleagaga ua toe faafoʻisia, o se tulaga po o se siʻomaga o loo tatou auauna ma maua ai iʻuga lelei, ma taulaʻi atu o tatou olaga i le auaunaga paia. O loo faasolosolo ina faamatagofieina pea lenei laueleele faaleagaga. Ae o le a faapeʻī le lumanaʻi?

36, 37. O ā folafolaga o le a faataunuuina i le Parataiso i le lumanaʻi?

³⁶ Pe a māeʻa le taua tele o Amaketo, o le a faalautele atu e Iesu lana galuega o le toe faafoʻisiaga e aofia ai ma le lalolagi paneta. A o faagasolo lana Pulega i le Afe Tausaga, o le a ia taʻitaʻia tagata e liua lenei lalolagi atoa e avea ma faatoʻaga o Etena, po o le Parataiso lea na finagalo ai Ieova mai lava i le amataga! (Luka 23:43) O le a autasi tagata uma ma latou tausia lelei le lalolagi. O le a leai ni mea e lamatia ai pe faamataʻu mai. Seʻi mafaufau i le taimi o le a faataunuuina ai lenei folafolaga: “O le a ou osia foʻi  se feagaiga o le filemu ma i latou, ma o le a ou aveesea manufeʻai o le laueleele, ina ia latou nonofo ai i le toafa ma le saogalemu ma momoe i le vaomatua.”—Eseki. 34:25.

³⁷ Pe e mafai ona e faaata lenā vaaiga? O le a e lē fefe e asiasi i so o se vaega o le lalolagi. E lē osofaʻia oe e se manu, ma e te lē toe fefe i se mea. O le a mafai ona e savali toʻatasi i se vaomatua telē ma e matamata i lona matagofie. E mafai foʻi ona e moe lelei i inā ma e ala aʻe ma le saogalemu!

38. O ā ni ou faalogona pe a vaaia le faataunuuina o le folafolaga o loo i le Esekielu 28:26?

³⁸ O le a tatou vaaia foʻi le faataunuuga o le folafolaga lenei: “O le a latou nonofo ai [i le laueleele] ma le saogalemu ma fau fale ma totō togāvine, e latou te nonofo foʻi ma le saogalemu pe a ou faaoo atu le faasalaga iā i latou uma, o ē o loo siʻomia i latou ma tauemua i latou; ona latou iloa ai lea o aʻu lava o Ieova lo latou Atua.” (Eseki. 28:26) Pe a māeʻa ona faaumatia fili uma o Ieova, ona tatou olioli lea i le filemu ma le saogalemu i le lalolagi aoao. A o tatou tausia le lalolagi, e mafai foʻi ona tatou tausia i tatou ma ē e pele iā i tatou, fausia fale lelei e nonofo ai, ma totōina togāvine.

39. Aiseā e te mautinoa ai o le a faataunuuina moni valoaga a Esekielu e faatatau i le Parataiso?

³⁹ Po ua na o ni miti nei folafolaga iā te oe? Pe afai o lea, ia manatua mea ua e vaaia a o faagasolo lenei taimi o le ʻtoe faafoʻisia o mea uma.’ E ui i osofaʻiga malolosi a Satani, ae ua mafai e Iesu ona toe faafoʻisia le tapuaʻiga mamā i lenei taimi e sili ona leaga o le lalolagi. O se faamaoniga malosi lenā e iloa ai, o le a faataunuuina moni folafolaga uma a le Atua na auala mai iā Esekielu!